froles mirandesas

MUSICA TRADICIONAL MIRANDESA

2012-01-28T23:23:00.003Z

ÇANFONICES

Cumo sei que quedais cuntentos culas amboras de l que se bai fazendo pul Praino, pongo eiqui mais dous cachicos de las melhares de amboras i de recuolhas que se fázen i que quedaran, para que las geraçones feturas púodan ber i nun se lhaménten cumo nós por nun haber registros datrás.
Se quedais cuntentos cun partes de ls registros, yá podeis eimaginar la alegrie que mos dá star al bibo a ber i oubir, a partecipar.
Siempre que podirdes beni al Praino porque bale la pena.
Delaide quedará cuntenta cun este registro de la sue sposiçon que serbiu de panho de fondo a la grabaçon de las músicas de Çanfonices.
“Beijai o Menino” ye l bideo de ua de las músicas de Çanfonices.

Sentindo la música de l CD Çanfonices

2012-01-28T14:03:00.001Z

Todo ampeçou l die seis d´ Agosto de dous mil i onze na Casa de la Cultura de Sendin.
Nó, nun fui nesse die que ampeçou! Ampeçou habie muito anho atrás, quando oubie essas cantigas; ampeçou datrás, çque essas cantigas éran cantigas, nien you eimagino hai quantos anhos; ampeçou yá habie muito anho, çque Mário Correia las anda a sacar a eilhas i a outras cousas de la cultura de l nuosso rinconico; ampeçou cun ls cantadores a anteimar a afinar bozes i anstrumientos para que la grabaçon salísse porfeita. Nada ampeça ne l die que mos parece, mas si an muitos outros dies, anhos, séclos…

Bou a dezir que para mi todo riampeçou nessa tarde de grabaçon, para mais cun l perbileijo de quadros mius habéren feito ls anfeites na traseira de l tablado, cumo se fúrun colchas ne l quelóquio. Todo riampeçou i las eimages i sonidos cascalhórun ne l sentido cumo xardas na auga lhimpa.

La çanfona, ls ferricos i las castanhuolas dában l ton a las bozes de Célio, de Garcia, un home sien tiempo, de l miu tiempo, mas un home de to ls tiempos i de Sérgio. Cantórun i ancantórun. A mi, i cumequiera a muitos outros, fazírun-me tornar a outros tiempos anterrados ne l miu ancunciente. Assi me fúrun zanterradas mimórias i nesse zanterrar las lhágrimas antrubiórun-me ls uolhos i por muita beç me fúrun scapando cara abaixo. Essas lhágrimas benien-me de la segada, agarradas a manhucicos de spigas que you apanhaba çque que fui capaç de caminar pul restrolho sien caer de narizes i que apuis miu abó metie andrento ls manolhos, siempre a afoutá-me a cuntinar, cun pormessas dun nuobo atrabessador pa l die de l Naso. Essas lhágrimas benien-me de cuolho de mie abó Ana quando me cantaba l Ró Ró i l Perlimpinchin para me deixar a drumir a la selombra dun freixo. Benien-me de la Missa de l Galho quando beisaba l Nino al son de l Beisai l Nino, quando L pedie que nun se çquecira de l miu çapatico. Benien-me de ls seranos,… tanto serano!... Era mie abó que cantaba las cantigas de l sou tiempo. Mie mai cantaba Fado tan bien, tan bien, dambas a dues, que, fui ua pena nun habéren sido oubidas por un Mário Correia, porque este, l nuosso Mário Correia, era, naquel tiempo, cumo you, inda nino…

Cun estas cantigas medrei, assi me fui fazendo giente, antre canseiras, arreceios, lhágrimas, sunrisos. Assi cuntino medrando an mimos, cun estes mimos...

Bien háiades cantadores por me haberdes lhebado a las lhágrimas por, cun bós, tener tornado a tiempos tan custosos mas tamien de magie! Cun bós las palabras tornórun a las cantigas i cun bós tornei a sentir las bozes de las palabras.

Bien haia Mário Correia por todo l rigoroso trabalho de recuolha cultural de l nuosso rinconico. Bien haias Amadeu por haber feito nacer la corriente social para que todo isto puoda cuntinar a tener piernas para caminar…

Stou a screbir al modo que stou a oubir l CD Çanfonices i, assi cumo na grabaçon, sinto-me a bolar nas nubres i tamien agora ls uolhos se me ténen ourbalhado, séia arrolhada ne l cuolho, séia na eigreija a beisar l Nino, séia ne ls seranos, ó séia ne ls amarelhares calientes de ls restrolhos a ganhar para un atrabessador nuobo.

Ye un perbilégio poder oubir esta música tan nuossa i cun la culidade cun que mos ye apersentada.

Parabienes i buona cuntinaçon!!!!

Parabienes a la Porsora Rita Marquilhas

2012-01-28T12:33:00.000Z

L'ambestigadora de l Centro de Lhenguística de la Ounibersidade de Lisboa i Porsora associada de la Faculdade de Lhetras de la mesma ounibersidade Drª Rita Marquilhas, que colaborou, hai cerca dua dúzia d'anhos na feitura, paginaçon i cumposiçon, de la Cumbençon Ourtográfica de la Lhéngua Mirandesa, fui reconhecida cun un prémio anternacional de ls melhores i mais promissores nas ciéncias de la lhenguística, cula atribuiçon de 1,8 milhones ne l porjeto Post Scritun, que quier criar un arquibo digital de la scrita quotidiana an Pertual i Spanha na época Moderna.

L'ambestigadora pretende çcubrir i publicar cartas pribadas screbidas an pertués i castelhano, decumientos inéditos guardados cumo proba an porcessos criminales i de l’Anquesiçon.

Parabienes a la Porsora Rita Marquilhas que mui lhutou pa l'aprobaçon de l mirandés cumo 2ª lhéngua oufecial an Pertual i, por esso i mais inda por este Prémio de reconhecimiento anternacional, l sou trabalho ye altamente lhoubable i digno de la maior stima i cunsidraçon de todos ls mirandeses i pertueses.

Leonardo Antão

CULTURA MIRANDESA DE PARABIENES

2012-01-25T22:30:00.004Z

SECRETARIA DE ESTADO DA CULTURA APOIA CENTRO DE MÚSICA TRADICIONAL SONS DA TERRA

To l spólio de l Centro de Música Tradecional Sonidos de la Tierra, an Miranda de l Douro, bai ser digitalizado i preserbado. L porjeto antre l'eiditora i la Secretarie de Stado de la Cultura yá stá cuntratualizado i a funcionar. Mário Correia, l respunsable pul centro cultural, splica que l'oujetibo ye preserbar patrimonho cultural atrabeç de la digitalizaçon de decumientos. “Amplica la digitalizaçon, seriaçon, classeficaçon i rializaçon de quatro cópias fundamentales”, splicou l respunsable de la Sonidos de la Tierra. Ua de las cópias será antregue a la Ounibersidade Nuoba de Lisboua, outra pa la Ounibersidade de Abeiro i pa l Museu de la Música Pertuesa. La quarta cópia eirá para un arquibo para preserbar la lhéngua i cultura mirandesas, qu'inda nun stá criado. Este será un porjeto grandioso an termos logísticos i nun bai amplicar solo preserbar sonidos.
La digitalizaçon abrange 650 cds, cuntendo miles de pieças. “Tenemos 3500 horas de grabaçones fonográficas. Hai quatro mil horas de grabaçones nó digitalizadas. I inda 52 mil retratos i 160 horas de filmes decumentales”, adelantrou Mário Correia.

ÇANFONICES

2012-01-24T01:17:00.003Z

CENTRO DE MÚSICA TRADICIONAL SONS DA TERRA

L Centro de Música Tradecional Sonidos de la Tierra (CMTST) apersentou al público, dous nuobos CDs que resúltan dun trabalho de recolha de l patrimonho musical de la Tierra de Miranda i que benirun anriquecer l spólio çcográfico de l centro i perpetuar la traiçon oural mirandesa.
L lhançamiento de ls trabalhos çcográficos "Çanfonices" i “Camín Cantares ” decorriu na aldé raiana de Custantin, ne l cunceilho de Miranda de l Douro i acuntece nua altura an que fúrun cortados apoios anstitucionales al CMTST.
"La recolha fui apersentada ne l decurso de l radadeiro festibal Antercéltico de Sendin i, cumo tubo un acolhimiento caloroso por parte de l público, resolbimos fazer ua grabaçon, dous meses depuis de l'acuntecimiento, para assi perpetuar las músicas cantadas al sonido de la sanfona, para quedarmos cun un registo testemunhal dun cuncerto único", dixo l diretor de l CMTST, Mário Correia.
Çanfonices ye un porjeto de trés musiqueiros mirandeses (Célio Pires, António Garcia i Sérgio Martins) i percura recuperar i dar a coincer remances i cantigas d'ambalar que éran cantadas ne ls serones i nas lhides de l campo nas aldés de la Tierra de Miranda.
Ls temas ancluídos ne l trabalho son todos de la recolha de la tradiçon oural i adonde figúran musicas amblemáticas de l cancioneiro regional mirandés cumo l Ró Ró, Perlimpinchin, Çarandilhera, La Lhoba Parda, Ls Cardadores ó las Cantigas de la Segada, antre outros.
"Son cantigas muitas bezes squecidas pus ténen ua rítmica pouco fuorte i lhenta, l que faç cun que la mocidade olhe para eilhas cun algun çdén. De l nuosso punto de bista, trata-se de spécimes mui ricos, subretodo pulas stórias que cúntan", acrecentou Mário Correia.
Segundo alguns specialistas, la çanfona nun ye un strumiento "quemun na música tradecional mirandesa". Mas, diç la stória qu'habie muitos tocadores deste strumiento que fazíen ls Caminos de Santiago, habendo registos d'alguns deilhes na Tierra de Miranda.
"Trata-se dun strumiento antroduzido hai pouco tiempo na música tradecional mirandesa, habendo yá un cunjunto d'anstrumentistas qu'ampeçou a adotar la çanfona pa ls sous porjetos musicales, l que bieno anriquecer l patrimonho musical de la region", cuncluiu Mário Correia.
Las çanfonas outelizadas ne l cuncerto son fabricadas por un de ls eilemientos de l grupo, na pequeinha aldé mirandesa de Custantin.
(RBA)

Apersentaçon de Ls Quatro Eibangeilhos ne l Alto do Moinho

2012-01-24T00:06:00.002Z

Die 29 que ben a las 12:00 bamos a apersentar Ls Quatro Eibangeilhos ne l Pabelhon de l Alto do Moinho. Eiqui deixamos l cumbite a todos ls mirandeses, para que tamien puodan dibulgar esta ambora.

Stará persente l dr. Timóteo Cavaco, de l'eiditora, la Sociedade Bíblica i l tradutor, Amadeu Ferreira.

Bai a ser mais ua jornada de lhéngua i cultura mirandesa. Bai i lhieba cuntigo outros amigos.

Cumbíbio/Fiesta de "Nuossa Senhora de las Candeias"

2012-01-22T13:13:00.004Z

L tradecional cumbíbio que l’Associaçon Cultural i Recreatiba “Nial de la Boubielha” (ACRNB) pormobe to ls anhos, antanho ye ne l deimingo, die 5 de febreiro.

Esta fiesta, ten para todos ls Zenízienses (an special), sous familiares, cunterráneos i amigos, un eilebado i perfundo segneficado, puis siempre na nuossa aldé (Zenízio-Miranda de l Douro), se festejou i comemorou l die de "Nuossa Senhora de las Candeias" (“ l 2 de Febreiro”) .

Era ua fiesta i ainda ye, adonde nun só la crença i deboçon a Nuossa Senora se rebelaba, mas tamien l sprito spitaleiro de l pobo, puis nesse die las famílias ajuntában-se i naide quedaba ne l terreiro de la fiesta sien cenar, ls moços i moças cumbidában para sues casas ls festeiros benidos de fuora.http://www.blogger.com/img/blank.gif

L porgrama dastanho puode ser bisto ne l site de l'Associaçon , www.nialdelaboubielha.org tamien será ambiado a to ls associados de quien tenemos l sou cuntato, (an mirandés i pertués), que la direcion de l'Associaçon porpon, para que seia un die bien passado, an armonie i fiesta, adonde nun faltará l'ouportunidade de zanferrujar la lhéngua, cuontar uas cuontas, saludar ls amigos i rebelar las redadeiras, i quien quejir i sabir fazer-lo an mirandés, la falar an que la maiorie de nós daprendiu a dezir -"Dous de Febreiro"

Fuorça cunterráneos, puis la maiorie ye besitante deste blogue, nun deixeis d'aparecer, dezi-lo a quien nun sabir, puis la fuorça de las tradiçones ye ua cousa tan guapa, tan marabilhoso rebibir, que nunca se puode perder. Estas cousas a las bezes son la çúrça para squecir las arrochadas que lhebamos sien merecer pula bida afuora.

Parabienes a la direçion de l'Associaçon por todo l que fai para que las tradiçones nun se muórran, i ls Zenízienses cuntínen a tener estes cachicos, que son d'ouro.

L Auto de La Criaçon de l Mundo

2012-01-19T01:07:00.007Z

'>http://

Nada you tenie a ber cula representaçon mas algua ansiedade nun me faltou. Bá!, çpachai bos que you quedei de star alhá a las dues horas. Esso nun era berdade mas nun querie perder nien un mirar de todo l que se iba a passar. Apuis, la çculpa de tener guardado quaije quarenta belhetes benie mesmo a calhar.
L’ antrada de la Aula Magna. L rebolhiço ampeça i ye grande. Muitas pessonas a cumprar belhetes, seinha de que la sala se haberie de componer. Muitas caras coincidas i outras nó. Cumprimenta-se todo l mundo que se conhece. L porteiro mira-me i cula mano: faç fabor. Reconhece-me de l die atrás i deixa-me antrar. La mie Tie guarda ls belhetes para quando antrarmos todos.
Dabid Casemiro passa por mi i diç: «Caralcho, la cousa parece que se stá a componer. Muita gente para antrar. Bamos a tener ua sala bien cumposta.» Bai a correr todo bien.
Aprontan-se ls Dançadores. Faç-se un córrio bien ancho. L ansaiador splica la dança. L de la gaita ampeça a tocar. La caixa i l bombo acumpánhan i ls dançadores sóltan ls palos que strálhan uns acontra ls outros. Muitos míran de riba de las scaleiras i de l spácio de l purmeiro piso. Uns sácan retratos i outros fázen filmes. Las pessonas stan animadas i cuntentas. Acabada l’actuaçon, ye hora d' antrar.
Çcurso de l Senhor Persidente de la Cámara Munecipal de Mogadouro, Dr. Morais Machado. Apuis de saludar ls persentes i de nomear ls ausentes, manda alguns recados al poder central. Parece que nien un repersentante oufecial de l Menesterio de la Cultura se dignou star nesta manifestaçon de cultura stramuntana. Son uns gentius, la giente que manda! Lamenta-se que assi seia. Mas las gientes de Ruolos, de Mogadouro, de todo l Praino i todos ls stramuntanos son pessonas trabalhadoras i hounestas. Tamien ténen cultura i sáben fazer acuntecer cultura. Son pessonas simples mas merécen algua cunsideraçon. Acrecenta l senhor persidente que la Cámara nada debe i ten buonas cundiçones para ls que alhá stan i tamien para ls que quérgan ir: pecina, casa de la cultura, biblioteca, grupo de triato, acordos cun la orquestra metropolitana de la cidade do Porto...i muitas mais cousas buonas. Hai necidade de ambestidores para criar ampregos i fixar jobes qualificados.
Ye tiempo de spetaclo. David Casemiro anuncia-lo sticando la mano: abre-se la curtina. Ressona al punta de riba de anchas scaleiras sonido fuorte. Harmonioso. A poner piel de pita. Todo mundo queda mudo de spanto. Ls atores abáixan las scaleiras cun passo sereno. Spálhan-se a todo l palco. Fai-se silénço abseluto . Amadeu Ferreira diç: "parece ua ambaixada rial: benírun a Lisboua i deixórun sua mensage: hai bida alhá de Lisboua, hai cultura alhá de l São Calros i de l D. Marie...". Cumo las cousas simples mos eimociónan.
Apuis l’antrada, todo puode acuntecer. L sfergante lhargo a naide le scapa. L registro queda bien andrento de cada un. Hai quien diga que l spetaclo poderie acabar eilhi. Staba salba la atuaçon. Baliu la pena.
Atores a seus lhugares. L anjo anúncia la feitura de l mundo: Dius fizo l mundo i al sétimo die fizo l home. Adan sentie-se mui solico. Dius saca-le ua costilha i faç sue cumpanha: la mulhier. L paraíso. De todo puoden çfruitar. Proibido, proibio, solo l fruito daqueilha arble. Manhosa, la serpiente todo fai pa que la mulhier caia an tentaçon. Eba nun rejiste, come la maçana. A Adan queda se le antresgantada na gorja. Ah mulhier l que faziste! Maldiçon! Cumo Dius bos botou al mundo habéis de quedar mas de uolhos çpiertos i cun ganas de amar. La decendéncia nun bai a faltar.
Diabro, esse tentador d' almas. Siempre a zucrinar la cabeça al home. Apuis, essa ambeija, tinhosa que nun se çpega de las almas houmanas. Mas hai siempre almas caridosas i simpres que le gusta la paç i harmonie.
L defícele ye aceitar l outro. Mais deficele inda, se l outro ye ua rapaza guapa que solo an suonhos se arrima a Eilha. Jesé, acontra l preconceito muito tube que lhuitar. L nino bai a nacer i rei sien reino bai a ser. Casa algua se le abriu i la gruta le serbiu . Las palhas los calcírun i mais la calor de animales. Pastores, probes, l pouco que teníen debidírun. Jesé, Marie i Jasus fame nun passórun. Magos reis benírun i ouro, ansénsio i mirra le oufrecírun.
Nino de berdade, al cuolho de "Marie" se cunfortou mas mai de berdade nun yera i choro l nino soltou. Cunsolo de mai tubo que tener i miedos atamou.
Assi se acaba l Auto i todo l mundo muitas palmas botou.

L mirandés ne l New York Times

2012-01-18T12:18:00.005Z

Fui hoije publicada ua reportaige subre l mirandés ne l New York Times. Puode ser lida eiqui

http://frugaltraveler.blogs.nytimes.com/2012/01/17/in-portugal-mirandese-spoken-here-and-only-here/

L Ampeço de l Mundo - ressónan sonidos para quien manda

2012-01-16T22:50:00.003Z

'>http://

Sexta-feira 13, Janeiro de 2012. Dues horas de la tarde. Antrada de la Aula Magna, Ounibersidade Nuoba de Lisboa. Nunca ls mius pies habían pisado la antrada nien las antranhas. L sigurança, home que you nun sabie eilhi ancuntrar mas que conheci hai un buono par danhos de la marina. Bengo tener cun ls que ban fazer la quelóquio. Mira esta senhora faç parte de la ourganizaçon. Apresento-me: chamo-me Antonho, sou de Bemposta, a bibir hai 30 anhos an Lisboua i bengo tener cun Dabid. Eilhe dixo-me para andar cun ls gaiteiros. Miu nome ye Ana, sou de la Camara de Mogadouro i todas las ayudas son bien benidas. Dabid Stá ne l anfiteatro. Yé seguir pul corredor adelantre apuis birar a la squierda i ye ende.
Mius uolhos quedan ancantados. Que grande palco i anfitiatro. Se pessonas tubísse la sala que l palco haberie de ser capaç de les arrancar las palmas que todos ls que representan le gusta tener. Mius uolhos çtraídos ancantan-se. Oubidos atentos ouben la boç: «caralcho antonho, ainda bien que beníste». Dabid Casemiro anda solico anrriba dun scadote cun agrafador na mano a forrar casicas que ban serbir de cenairos. Sien mais demoras: buono rapaç, l que ye para you fazer. Bai-te a buscar mais casicas haber se las forramos todas. Toca l telemoble: sou a Marie Anilda, bengo apanhar ls bilhetes. Beni a la portarie. Ende stá cun sou Tio, cura, home de sous 86 anhos mas ainda cunserbado. La representante de la Camara de Mogadouro, dra Ana faç las arrumaçones necessairas para cumponer las cousas. Las apresentaçones. La solidariedade transmuntana i la cumbersa bai animada. Bou outra beç ayudar Dabid. Las gentes de Ruolos, las pessonas que ban representar chegórun hai cachico i foran-se almuorçar. Salíran purmanhana cedido de Mogadouro i siempre son cinco ou seis horas até chegar a la capital. Apanhórun çancenho eilhi para ls lhados de Celorico. Passado pouco chegórun: ua fiesta. Anton tamien stais eiqui? Puis tenemos que dar ua mano. La tie, mulhier de Bemposta, de mie tierra, Lúcia tamien beniu cun eilhes, bai fazer de pastora. Un abraço arrochado i un beijico. Ye siempre ua fiesta quando se bei ua pessona de nuossa tierra. Sabes, eilhi fuora stá mais ua de nuossa tierra, Marie Anilda. Mostra-me que la quiero ber. Ende bou cun eilha a la portarie. Cumprimentan-se. La representante de la Camara, assi que me bei i parecendo conhecer-me hai muitos anhos, diç cumo quein dá ua orde: baia yá dezir a Dabid para ir a la carreira apanhar ls zdobrables para çtribuir quando foren cun ls gaiteiros no metropolitano. Nun foi perciso dezir nada, yá tenie ido. Fazimos las drobages ponendo la cunbersa an die. Puis yá Filomena Flores, tamien de Bemposta, casada cun "Abel" do Auto, Fernando Barros de sou nome, de Ruolos, que se bai a morrer a las manos de Caín. Sou armano Artur tamien ayuda na dobrage i apuis fai parte de la quadrilha que bai andar ne l metropolitano.
Todo pronto. Zdrubables an manos i sunrrisos lhargos ban çpejando simpatie pulas gientes que çcunfiadas de toda la publicidade agarran a miedos l papel. Mas siempre le gusta ls sonidos de la gaita. Ls gaiteiros: Henrique i Carlos, Luis na caixa i Filipe ne l bombo çpeijan musica i alegrie por todo. Foi ua tarde mui agradable. Las catacumbas de l metropolitano ressonan bózios de cristianos muito apuis de l Ampeço de l Mundo. Rossio, las gaitas salen a sorber l sol i amostrar-se a todos ls que se passeian pula praça. Paraige na ginginha. Cun eilhas ou sien eilhas quaije toda la quadrilha bebe ua pinguita. Mais ua antrada para ls tuneles. Gusta-le a lisboua oubir la gaita. Sopra l aire, rugen las batecas i l sonido sale de las antranhas de la tierra. Ainda refunfenhegan las bozes de la anterioridade i ressónan sonidos para quien manda. La quadrilha bai bien çpuosta i cumposta. Todo l mundo bai cuntento. L Centro de Tradições Populares Portuguesas na pessona do porssor Fracisco acumpanha l grupo i tamien l Relaçones Publicas do metropolitano, sr. Guilherme Rodrigues que fai las aberturas faceles para antrar i salir. La buolta terminou. Çpedidas cun un até manhana na sprança de sala chena.

Grupo de amigos de l Centro de Música Tradicional “Sons da Terra”

2012-01-16T21:43:00.006Z

Este grupo fui criado l die 15 de dezembre atrasado cula eideia de apoio i ajudar l Centro de Música Tradicional “Sons da Terra”, apuis de le habéren sido tirados todos ls apoios que le benien sendo dados, hai mais de dieç anhos, pula Cámara Munecipal de Miranda de l Douro. Quier-se que l Centro nun cerre las puortas i cuntine l trabalho del, eissencial na recuolha de ls sonidos que fázen parte de la nuossa eidentidade, ajudando a mantener biba la música popular i l nome de las pessonas que deilha fúrun fazendo sue bida.

Esse Grupo ten até agora la sue mais grande spresson ne l facebook, an http://www.facebook.com/groups/264438410279156/, tenendo yá ajuntado parriba de trés cientos de amigos, sendo l oujetibo arrepassar para alhá de ls mil.

Para yá fui lhançada ua campanha de apoio, que se traduç ne l seguinte: las pessonas anscríben-se para mercar cada un de ls CD’s que l Centro bai eiditando, al précio de 10€. Las pessonas puoden ambiar la sue morada para sonsdaterra@sapo.pt, que l Centro se ancarregará de le ambiar l CD i de le dar anformaçon subre l NIB adonde las pessonas poderan pagar. Até esta altura la lista yá bai arrimado a 100 pessonas, sendo l oubjetibo chegar a bários cientos de apoiantes.

Quien eiqui benir a este blogue puode tamien anscrebir-se ne l Grupo ponendo un pequeinho comentário a dezir que quier pertencer, deixando la sue morada. Apuis desso seran ajuntados a la lista.

Las cousas berdadeiramente amportantes nun puoden ser deixadas solo an manos de anstituiçones que yá amostrórun que deilhas nun quieren saber de modo sério, nien le passa pula cabeça de cumo son amportantes, cousas cumo la lhéngua mirandesa ou la música tradecional popular. Por esso las pessonas ténen que las agarrar na sues manos, puis ye cun cientos ou miles de pequeinhos mecenas que las cousas puoden ir palantre i se baN fazendo pequeinhos milagres. Eiqui queda l cumbite a toda la Quadrilha i leitores deste blogue i als sous coincidos para que apóien la Campanha 1 CD para salbar l Centro de Música Tradicional “Sons da Terra”, todo fazendo cumo arriba yá dezimos.

L CD que acaba de salir i stá yá a ser ambiado pa ls amigos de l Centro ye Sanfonices, de remanses populares, grabado al bibo ne l festibal antercéltico de l anho atrasado. Yá eiqui tornaremos a falar un cachico mais desse CD.

Anfáncias Trágicas

2012-01-13T01:32:00.000Z

Biben ne l mundo dous milhones de ninos. Destas, acerca de:
- 100 milhones inda nun ténen acesso al ansino;
- 50 Milhones nun fúrun registadas al nacer i ye cumo se nó eisistissen;
- 24 mil morren todos ls dies porque nun recíben cuidados básicos de salude;
- 1 milhon son arrastradas pa la prostituiçon todos ls anhos;
- Mais de 150 milhones trabalhan ó son bítimas de sploraçon i de to l tipo de bioléncia;
- 250 mil stan ambolbidas an cunflitos armados.
(Publicado pula Rebista Audácia nº 492,de Janeiro 2012)

(em português)
Infâncias Trágicas
Vivem no mundo dois milhões de crianças. Destas, perto de:
- 100 milhões ainda não têm acesso ao ensino;
- 50 Milhões não foram registadas ao nascer e é como se não existissem;
- 24 mil morrem todos os dias porque não recebem cuidados básicos de saúde;
- 1 milhão são arrastadas para a prostituição todos os anos;
- Mais de 150 milhões trabalham ou são vítimas de exploração e de todo o tipo de violência;
- 250 mil estão envolvidas em conflitos armados.
(Publicado pela Revista Audácia nº 492,de Janeiro 2012)

Statísticas mundiales

2012-01-12T17:38:00.004Z

(Sacado de Wikipédia an pertués, artigo subre l “Femenismo” cula upa de l tradutor an linha)

“Apesar” de ls abanços feitos pulas mulhieres ne l que respeita a l'eigualdade ne l mundo oucidental, hai un “longo” camino a percorrer para se chegar a l'eigualdade, d'acuordo culas seguintes statísticas:

• Las mulhieres deténen solo 1% de la riqueza mundial, i ganhan 10% de las receitas mundiales, anque cunstitúan 49% de la populaçon.
• Quando se cunsidera la criaçon de ls filhos i l trabalho doméstico, las mulhieres trabálhan mais que ls homes, quier ne l mundo andustrializado, quier ne l mundo subzambolbido (20% a mais ne l mundo andustrializado, 30% ne l resto de l mundo).
• Las mulhieres stán sub-repersentadas an todos ls cuorpos legislatibos mundiales. An 1985 la Finlándia detenie la mais grande percentaige de mulhieres na legislatura nacional, cun aprossimadamente 32% (cf. NORRIS, P.. Women's Legislatibe Participation in Western Europe, West European Politics). Atualmente, la Suécia ten l mais grande númaro, cun 42%. La média mundial ye solo 9%.
• An média, mundialmente, las mulhieres gánhan 30% menos que ls homes, mesmo quando ténen l mesmo amprego.
• L tráfico sexual atrabessa to l planeta. Cada anho, cientos de miles de mulhieres son raptadas, coagidas, cumpradas i bendidas pa la scrabidon sexual.
• Milhones de mulhieres an to l mundo, nas fábricas, na andústria de l sexo ó nas sues própias casas son abusadas, stupradas i abiltadas – tratadas cumo mercadories que se bénden i se cómpran. Milhones de mulhieres son cunsidradas propiadade pribada i cuntroladas cumo benes i nó tratadas cumo seres houmanos.

[An pertués: Apesar dos avanços feitos pelas mulheres no que respeita à igualdade no mundo ocidental, há um longo caminho a percorrer para se chegar à igualdade, de acordo com as seguintes estatísticas:
• As mulheres detêm apenas 1% da riqueza mundial, e ganham 10% das receitas mundiais, apesar de constituirem 49% da população.
• Quando se considera a criação dos filhos e o trabalho doméstico, as mulheres trabalham mais do que os homens, quer no mundo industrializado, quer no mundo subdesenvolvido (20% a mais no mundo industrializado, 30% no resto do mundo).
• As mulheres estão sub-representadas em todos os corpos legislativos mundiais. Em 1985 a Finlândia detinha a maior percentagem de mulheres na legislatura nacional, com aproximadamente 32% (cf. NORRIS, P.. Women's Legislative Participation in Western Europe, West European Politics). Atualmente, a Suécia tem o maior número, com 42%. A média mundial é apenas 9%.
• Em média, mundialmente, as mulheres ganham 30% menos do que os homens, mesmo quando têm o mesmo emprego.
• O tráfico sexual atravessa todo o planeta. A cada ano, centenas de milhares de mulheres são raptadas, coagidas, compradas e vendidas para a escravidão sexual.
• Milhões de mulheres em todo o mundo, nas fábricas, na indústria do sexo ou nas suas próprias casas são abusadas, estupradas e aviltadas – tratadas como mercadorias que se vendem e se compram. Milhões de mulheres são consideradas propriedade privada e controladas como bens e não tratadas como seres humanos. ]

La merenda

2012-01-11T00:09:00.000Z

Diç que eiqui atrasado, l Senhor Purmeiro Menistro i l nuosso Menistro de las Finanças íban de biaige por essas Ouropas, a tratar de ls nuossos assuntos, claro.

Cumo homes poupados que son, i anté para dar l eisemplo cumo siempre fáien, íban an segunda classe i, para poupar inda más, habien-le pedido a la Cristas que le purparara ua merendica, que era la maneira de chegar al çtino cul stómado yá forrado i nun tener que gastar l denheirico de ls nuosso ampuostos nun restourante, que nien eilhes son homes para essas áfricas.

Bai, anton, a meio de la biaige, bai l menistro de las Finanças i ampeça a zanfardelar la merenda para un banco antre ls dous. Standiu l rodielho culs sous bagares (yá maginareis l tiempo que gastou, que nien el ye home para priessas, i inda bien, que las cousas quieren-se bien feitas i cun tento), standiu anton l rodelhico, sacou la caçuola cula fritada de uobos, la bolhica de pan, la bota de l bino, las nabalhicas i bai nisto i arreparou que la Cristas solo le habie mandado ua chouriça pa ls dous i bai i bira-se pal senhor Purmeiro Menistro i diç-le.

- Senhor Purmeiro Menistro, solo tenemos ua chouriça pa ls dous. Bai a ser melhor debedi-la "eiquitatibamiente"!

L nuosso Purmeiro, que, ambora puoda parecer, nun ye burro de há pouco, home squermentado i bun cunhecedor de las cuntas que l outro fai, mirou par'el i repundiu-le:

- Bó, bó, bó, bó, bó... tu cun quien cuidas que stás a falar?! Nun te amolabas tu, ora nó!? Parte mas ye la chouriça al meio i queda cad'un cun sue metade!...

Será que l aire...

2012-01-10T16:11:00.005Z

Será que l aire que m´assopra
será cumo ls mius pensares!?
Uas bezes lebes, serenos;
outras, de sieiro i grietas,
outras, serranius a gilar.

Será que l aire que m´assopra
será aire para quedar!?
Que quede lebe i cun frescor,
cun ardenças, sien rachar.

Será que l aire que m´assopra,
será airico lebe, a çfraçar!?

Oubrigado, Sr. menistro!

2012-01-10T00:17:00.000Z

Hai dies un pobre pediu-me smola. Depuis, ancorajado pula mie generosidade i sperançoso na mie grabata, preguntou se you fazie l fabor d'antregar ua carta al senhor menistro. Preguntei-le qual menistro i el, depuis de pensar un pouco, acabou por dezir qu'era al menistro que l'andaba a ajudar. L testo ye este:
"Senhor menistro, querie pedir-le ua grande ajuda: beija alhá se deixa de me ajudar. Nun me conhece, mas tengo 72 anhos, fui pobre i trabalhei to la bida. Bibia até hai uns meses nun lhar cula mie magra reforma.

Todo iba quaije bien, até l senhor me querer ajudar.
Hai dous anhos beniren uns anspetores al lhar. Dezírun que éran dua cousa chamada Azai. Nun sei l que seia. L que sei ye que çtruíran la marmelada ouferecida puls bezinos i lhiebórun frangos i doces dados cumo smola. Até ls bolhicos de la senhora Francisca, de que you gustaba tanto, fúrun botados fuora. Falei cun un deilhes, i el dixe-me que todo era para nuosso bien, porque aqueilhes perdutos, que nun stában debidamente ambalados, etiquetados i refrigerados, podien criar grabes porblemas sanitairos i alimentares. Nun percebi nada i preguntei-le se achaba bien roubar la quemida de ls probes. El quedou calhado i acabou por dezir que segui ordes.

Quedei anton a saber que la culpa era sue i decidi screbir-le. Nessa nuite todos nós eilhi passámos fame, felizmente sin porblemas sanitairos i alimentares grabes.
Ah! Ye berdade. Ls tales fiscales eisigiran obras caras na cozina i noutros lhocales. L senhor diretor falou an ancerrar todo i ponermos na rue, mas alhá cunseguiu uns dinheiricos i todo boltou al normal. Cumo ls anspetores nun regressórun i ls bezinos cuntinórun a dar-mos marmelada, frangos i até, de beç an quando, ls guapos bolhicos de la tie Francisca, squeci-me de le escrebir. Até hai seis meses, quando çtruíran todo.

Estes nun éran de la Azai. Cumo le querie screbir, percurei saber todo certico. Dezírun-me que benien de l Anstituto de la Sigurança Social.
Çcubriran que staba todo mal ne l lhar. L gabinete de la direçon tenie menos de 12 m2 i na anstalaçon sanitária de l refeitório faltaba la bancada cun dous lhabatórios apoiados subre poleias i sanita cun apoios lhaterales. Ls homes andórun cun fitas métricas an todas las jinelas i puortas i abanórun la cabeça muitas bezes. Habie tamien un porblema qualquiera cul xabonete, que debie ser lhíquido.
Anfurecírun-se por eisistiren quartos cun trés camas, bárias casas de banho sin bidé i na ária çtinada al duche de pabimiento (lhigeiramente anferior a 1,5 m x 1,5 m) nun stubisse un sistema que permita tanto l posicionamiento cumo l rebatimiento de banco para banho d'ajuda (ua cousa que nin sei l que seia). An resumo, l lhar era ua zgraça i tenie d'ancerrar.

Ultimamente pensei pedir als senhores fiscales para beniren a la barraca adonde bibo zde anton, medir las jinelas i ber las anstalaçones sanitárias (que nun hai!). Mas tengo miedo que me la fechen, i anton ye que fico mesmo a drumir na rue.
Mas hai sperança. Fui onte, depuis de a missa, bejitar l lhar nuobo que l senhor prior eiqui de la freguesie stá a einougurar, i adonde talbeç tenga lhugar. Quedei spantado culas anstalaçones. Nun sei l que ye un hotel de lhuxo, porque nunca bi nanhun, mas ye assi que l'eimagino. Preguntei al padre por que rezon era todo tan grande i tan caro. Afinal, se fusse un cachico mais apertado, podie ajudar mais giente. El respundiu que tenie solo cumprido las eisigéncias de la lhei (mais ua beç ten a ber cunsigo, senhor menistro). Aliás l prior cunfessou que nun tenie cunseguido fazer mesmo todo, porque nun habie denheiro, i cuntaba cula çtraçon ó beneboléncia de ls anspetores para le aprobáren l lhar. Se nó, alhá quedamos nós mais uns tiempos nas barracas.

Senhor menistro, acradito que tenga eicelentes antençones i faga esto por bien. Cumo nun sabe l que ye la pobreza, julga que las eisigéncias melhoran las cousas. Mas la única cousa qu'estas lheis i fiscalizaçones cunseguen ye criar zeigualdades drento de a miséria. Porque nun se preocupan culas casas de ls probres, solo culas qu'ajudan ls probres."

Triste Paíç que procede assi culs probres....

por JOÃO CÉSAR DAS NEBES

(Em Português)

Obrigado, Sr. ministro!
Há dias um pobre pediu-me esmola. Depois, encorajado pela minha generosidade e esperançoso na minha gravata, perguntou se eu fazia o favor de entregar uma carta ao senhor ministro. Perguntei-lhe qual ministro e ele, depois de pensar um pouco, acabou por dizer que era ao ministro que o andava a ajudar. O texto é este:
"Senhor ministro, queria pedir-lhe uma grande ajuda: veja lá se deixa de me ajudar. Não me conhece, mas tenho 72 anos, fui pobre e trabalhei toda a vida. Vivia até há uns meses num lar com a minha magra reforma.
Tudo ia quase bem, até o senhor me querer ajudar.
Há dois anos vierem uns inspectores ao lar. Disseram que eram de uma coisa chamada Azai. Não sei o que seja. O que sei é que destruíram a marmelada oferecida pelos vizinhos e levaram frangos e doces dados como esmola. Até os pastelinhos da senhora Francisca, de que eu gostava tanto, foram deitados fora. Falei com um deles, e ele disse-me que tudo era para nosso bem, porque aqueles produtos, que não estavam devidamente embalados, etiquetados e refrigerados, podiam criar graves problemas sanitários e alimentares. Não percebi nada e perguntei-lhe se achava bem roubar a comida dos pobres. Ele ficou calado e acabou por dizer que seguia ordens.
Fiquei então a saber que a culpa era sua e decidi escrever-lhe. Nessa noite todos nós ali passámos fome, felizmente sem problemas sanitários e alimentares graves.
Ah! É verdade. Os tais fiscais exigiram obras caras na cozinha e noutros locais. O senhor director falou em fechar tudo e pôr-nos na rua, mas lá conseguiu uns dinheiritos e tudo voltou ao normal. Como os inspectores não regressaram e os vizinhos continuaram a dar-nos marmelada, frangos e até, de vez em quando, os belos pastéis da tia Francisca, esqueci-me de lhe escrever. Até há seis meses, quando destruíram tudo.
Estes não eram da Azai. Como lhe queria escrever, procurei saber tudo certinho. Disseram-me que vinham do Instituto da Segurança Social.
Descobriram que estava tudo mal no lar. O gabinete da direcção tinha menos de 12 m2 e na instalação sanitária do refeitório faltava a bancada com dois lavatórios apoiados sobre poleias e sanita com apoios laterais. Os homens andaram com fitas métricas em todas as janelas e portas e abanaram a cabeça muitas vezes. Havia também um problema qualquer com o sabonete, que devia ser líquido.
Enfureceram-se por existirem quartos com três camas, várias casas de banho sem bidé e na área destinada ao duche de pavimento (ligeiramente inferior a 1,5 m x 1,5 m) não estivesse um sistema que permita tanto o posicionamento como o rebatimento de banco para banho de ajuda (uma coisa que nem sei o que seja). Em resumo, o lar era uma desgraça e tinha de fechar.
Ultimamente pensei pedir aos senhores fiscais para virem à barraca onde vivo desde então, medir as janelas e ver as instalações sanitárias (que não há!). Mas tenho medo que ma fechem, e então é que fico mesmo a dormir na rua.
Mas há esperança. Fui ontem, depois da missa, visitar o lar novo que o senhor prior aqui da freguesia está a inaugurar, e onde talvez tenha lugar. Fiquei espantado com as instalações. Não sei o que é um hotel de luxo, porque nunca vi nenhum, mas é assim que o imagino. Perguntei ao padre por que razão era tudo tão grande e tão caro. Afinal, se fosse um bocadinho mais apertado, podia ajudar mais gente. Ele respondeu que tinha apenas cumprido as exigências da lei (mais uma vez tem a ver consigo, senhor ministro). Aliás o prior confessou que não tinha conseguido fazer mesmo tudo, porque não havia dinheiro, e contava com a distracção ou benevolência dos inspectores para lhe aprovarem o lar. Se não, lá ficamos nós mais uns tempos nas barracas.
Senhor ministro, acredito que tenha excelentes intenções e faça isto por bem. Como não sabe o que é a pobreza, julga que as exigências melhoram as coisas. Mas a única coisa que estas leis e fiscalizações conseguem é criar desigualdades dentro da miséria. Porque não se preocupam com as casas dos pobres, só com as que ajudam os pobres."

Triste País que procede assim com os pobres....
por JOÃO CÉSAR DAS NEVES

Quien era Emma Bovary ?

2012-01-08T23:26:00.005Z

La heroína de l remanse de Gustave Flaubert, Madame Bovary. La personaige percipal dessa obra antre las mais cunhecidas de la lhiteratura francesa de meados de l seclo XIX, eiditada pula purmeira beç an 1857. Mas que naide s’anganhe cumo yá cheguei a dezir a Duarte Martins que achou por bien amentar tamien neilha na cuonta de la sue outorie que Amadeu eiditou hai dies, aqui neste site.

Emma Bovary ye ua personaige cumo yá cheguei a dezir cun ua personalidade bien mais cumplexa que l que puode parecer a alguns subretudo se nunca fazírun l sfuorço de ler essa obra de l ampeço até al fin, quier dezir al todo: praticamente 500 páginas i normalmente na lhéngua oureginal que ye neste caso l francés que siempre ye melhor que qualquiera traduçon seia eilha assi i todo cunsiderada mui buona ! Ye que nun hai nada sien nada ! Un ten que saber l que quier !

I se por acaso inda nun l cheguestes a ler esse remanse de Flaubert, acunselho-bos tamien ls bídeos que ye possible ancuntrar an linha para antender quien era la berdadeira Emma Bovary sacados de l guapo filme (até l filme na sue antegralidade ye possible bé-lo an linha) que l realizador Claude Chabrol que se morriu hai pouco mais dun anho agora realizou a partir de la obra de Flaubert, an 1991 eisatamiente, cun atores que you acho formidables a ampeçar por Isabelle Huppert ne l papel de Madame Bovary. Tentei ber se era possible poné-lo tamien aqui neste site mas nun cunsegui. Bonda assi i todo precurar ne l youtube cul títalo de: "Madame Bovary, 1991"

Cun esto, ye todo por hoije.

Mas inda bos poderie dezir mais cousas :

La Normandie adonde decorre toda l’açon de l remanse de Flaubert ? Fui ende que bibi i trabalhei durante dieç anhos !

Esse remanse percisamente ? Tube-lo an leitura oubregatória ne l penúltimo anho de l liceu quando passei l eisame de lhéngua i lhiteratura francesa de l Baccalauréat. I uns anhos mais tarde, cumo nun podie deixar de ser : tamien na faculdade, an lhetras… i por acaso, tamien an Rouen !

Anton bá ! Buona leitura ou un bun filme, cumo bos dir la gana, para bós tamien !

Quando un nun quier passar al lhado de l eissencial…

Auto de la Criaçon de l Mundo

2012-01-08T19:17:00.004Z

Yá eiqui Antonho Cangueiro screbiu subre essa quemédia Auto de la Criaçon de l Mundo que la giente de Ruolos ben a repersentar a la Reitorie de la Ounibersidade de Lisboua.

La purmeiroa repersentaçon fui l berano atrasado, nun die cheno de giente ide calor.

L belhete solo custa 6€ i hai que anchir aqueilha sala, dar le todo l nuosso apoio.

Ye ne l sábado que ben a la tarde, pulas 15 horas.

La Missa de l Galho

2012-01-07T00:08:00.002Z

[cuonta puosta a pedido de l outor para partecipar ne l Cuncurso de Natal Cuontas 2011. Mas stá fuora de prázio. Ye un gusto mui grande ber a Duarte Martinç eiqui pul frolesmirandesas]

Anquanto assiguraba l lhibro pula dobreç, la bista perdie-se-me por antre la tinta de las palabras i arrolhaba-se a la par cun ls pensamientos pul meio daqueilhas fuolhas de papeles, fazendo-me amentar ua nuite, nun eimbierno de 1862. Até nien sou pessona pra fazer abibar cuontas passadas, nien sequiera seranar an cumpanha de figuras que a ua hora destas me bátan a la puorta. A bien dezir, quando estas recordaçones bénen a tener cumigo, quedo-me mei andrumenhado nesta sala de star, tan grande, onde m’ancontro agora, ambelado baixo la lhuç melindrosa dua candeia, bien aconchegado, nun cadeiron de piel, mirando pa las quelores alborotadas de las chamarielhas de l lhume que me ban caldiando l cuorpo. Apuis de haber saboreado un copo de bino de l porto, asparece-se-me que esta sala ancastelhada queda sien las paredes que me arresquinában i tapában ls uolhos. Agora yá bou sendo capaç de ber ls amarelhados, ls aburmelhados i ls azulados a sbolaciar nun quadro ne l meio de la sala de star. A las bezes acuntece-me parar por un cachico i nada mais dezir, mas la berdade ye que me quedo nesta calhada, apegado a un doce i pequeinho bolar i nun quiero que s’arremate un chibzniç del ou de l que fur. Sei mi bien que nun sou la mesma pessona, mas nun ye por bias disso que me quedo mais agastado i apeado aquilho que bou pensando i fazendo todos estes anhos. Cumo bun antendedor, acabei por me haber dado cunta que ls dies iban minguando cun l passar de ls anhos i ls gustos que se habien porbado an nuobo quedában-me agora mais apurados i cun mais zambultura. L reloijo q’inda hoije trago, que tan suablemente tengo preziado dezde ls mius desassiete anhos, ye la única teçtemunha dua nuite de cunsoada. Naqueilha altura era un garoto presto a mirar i a spertar pa la bida que ls lhibros de l miu tiempo nun ansinában.

Fui la única beç que me squeci de lhebar ua ancomienda de senhor Bonifácio. Ponie-le fé a todo que me dezie i aquilho que daprendi nos negócios, agradeço-lo a el. Inda q’el fusse de famílias ricas, cua casa bien sortida de todo, nunca tubo filhos i, talbeç, por isso me tenga tratado cumo un.

- Pon-le atento al que te digo!

- Si, senhor Bonifácio.

-Esta ancomienda ye pa la senhora Conceição. Nun te me squeças de la lhebar inda hoije.

- Quedai çcansado, dezie-le you nun tono sereno.

- Bejitas a tous pais.

Tamien nun era ningun pinche q’andaba parende als mandiletes pulas puortas duns i d’outros. Mas l senhor Bonifácio yá iba bielho, algo zneito i staba mais carunchoso que la puorta de la sancrestie de l’eigreija. Queixába-se muito dua quadrileira, que se le ponien uns delores mui fuortes. Habie a dies q’el nun aparecie al trabalho i, you solico, tomaba cunta de la fazienda i de l negócio. Senhor Bonifácio era ua pessona mui zgustosa cun la bida, tamien nun era pra menos. Nunca cheguei a coincer la tie del, dízen que ambiudou mui cedo, que la mulhier se le habie morrido inda mi nuoba, dua pormonie, al que se diç, nua nuite de Natal. Baia, baia, quantas cousas acuntécen nas nuites de Natal, leitor amigo. Nun hai solo ninos znudos nas palhicas, streilhas i reis magos, sarafins i querubins rechonchodicos a cantar l Glória In excelsis deo. Mas deixemos la birge i l rigueirico que cuorre an todos ls persépios de Natal. Inda que haba tocas, trampos i rachones a arder nua buona fogueira an cielo abierto, a la moda de ls antigos, la nuite de Natal ye arremassa de muita massa, nuite armana de tantas outras nuites de l anho. Se bien que essa nuite de cunsoada, antes la Missa de l Galho, nun tenga sido cumo assi, sien tampeiro, zansabida cumo se houbira sido ua malga de sopas de cabalho cansado sien açucre. Ye por bias disso q’inda hoije me quedou atrancada ne l pensamiento essa tal nuite de cunsoada, antes la Missa de l Galho.

Cun tanto rebulhiço d’antregas, d’ancomiendas, d’ambrulhos, de caixas, d’aternatos i cunferrumes; çpuis inda se metiu la cena de cunsoada, cun la perséncia de l senhor abade, la berdade ye que se me squeciu de ir a lhebar la ancomienda que senhor Bonifácio me mandou a casa de senhora Conceição. Tamien, pensei you, meia dúzia de chancadas, un cachico antes las campanas dáren sinal, nistante me ponie na outra punta de l lhugar, scusaba de m’andar parqui a cunsumir tanto nua nuite de cunsoada. Nessa mesma nuite, inda se me lhembra de cumo se fura hoije; habie recebido l miu purmeiro reloijo, que me lo dou miu pai, quando cenábamos todos, este, q’inda agora traio cumigo.

Agarrei las telas, meti-las ambaixo l braço, cun la outra mano ampalpei l bolso de las calças, dando-me cunta que lhebaba las horas cumigo i meti-me a camino por ambaixo de l acender de las streilhas para nun achar tropieço. Fazie un friu de perro i la carambina, ajuntas cun la lhuna, tomórun cunta de la nuite de cunsoada. A estas horas, tenendo you ambas duonhas i un “bien feita” por me haber squecido lhebar l’ancomienda, yá que quien scuita de si siempre oube, meti-me inda mais d’agudo. Purmeiro por uas caleijas, çpuis por caminos cun la tierra a poner-se cumo l curisco i puls sítios onde nun corrie l’auga, retulhie l gelo i l absedo era amo i senhor daqueilha nuite.

Senhora Conceição moraba eilha sola, habie mais ou menos un anho, nua casa mei afidalgada de quatro augas. Era ua casa cun las paredes i las squineiras an cantarie. A la antrada habie un jardin pequeinho i nun de ls lhados lhebantában-se uns cantabouços por onde corrie ua graciosa cachoneirica. Nas traseiras ua huorta i un pomar dában mais grandeza al antigo casariu afidalgado. Habie muitas malas lhénguas ne l pobo que botában algua maldade a Dona Conceição, pus isso yá se sabe cumo ye la bida dun benediço. Staba todo corrido porende, que Conceição se habie apartado de l home hai trés anhos, un rico scribano, que quedara a sofrir d’amor por eilha na capital. Outros dezien q’eilha le habie lhebado la fortuna i cun l denheiro mercara esta casa abultiada que ten, a salida de l lhugar, al morgado de l Cundado. Cuntába-se que Conceição s’ampimponaba muito, fumaba tabaco francés i buí cognac de Rémy Martin anquanto lie até las quenhientas de la nuite. L demais de l tiempo dezien, que lo passaba al redor de las telas, a pintar, dando-se al mundo de ls quadros.

L cierto era que you nunca la habie bido antes i agora, a uas horas destas, staba ancalhadico de friu, meio garoto ampesgado, a l’antrada de la puorta daquel casariu, assigurando un par de telas. Stribei la ancomienda a la borda de la parede de l’antrada i quando iba pa bater a la puorta, mirei para ua frisga de lhuç que salie dalhá. Apuis de haber tenteado la puorta, ampurriei-la cun jeitico, abrindo-la debagarico i stando alhá drento de la preça chamei:

- Senhora Conceição! Hai giente an casa?

Naide me cuntestou, treminei por antrar i…

- Senhora Conceição…

-Yá abaixo! Bai antrando pa la sala i bai-te acalcendo! You nun me demoro!

Deixei la ancomienda na preça de casa i antrei para ua sala mediana cun la puorta abierta que tenie un chupon al fondo. Sentei-me nua de las cadeiras que stában an pie de l lhume i fui-me calcendo, sfregando las manos que benien angaranhidas cun l friu de la ruga. Al meio de la sala habie ua mesa que tenie un sbarbeirico nun basico de barro. I assi que dei nel, nistante saquei l reloijo, nun fusse purí yá la meia nuite i chegar atrasado a la Missa de l Galho, inda por riba apuis de haber anfeitado l arbre de l’eigreija cun farrapas de algodon que senhor Bonifácio me dou. A la borda de l sbarbeirico staba un lhibro an tones burmeilhos i cuas letras douradas que dezien, Madame Bovary. Quando agarrei nel, pa l ber mais d’acerca, senti ua boç que benie por trás:

- “Emma Bovary c’est moi”… buonas nuites!

- Buonas nuites! dixo-le you, alhebantando-me i nun antendendo mui bien aqueilha pequeinha antrada de palabras apuis dua cena de cunsoada que tubira an casa.

- Çculpai-me pula demora! Ye que nesta altura i cun tantas cousas pra fazer no soto de senhor Bonifácio squeci-me de las buossas telas i solo agora bos las bengo a traer.

Conceição benie cua andadura algo maniega i bagarosa, trazie un roupon branco mal abrochado a la cintura que daba pra ber l búltio de ls senos an sue lhiberdade de nacéncia i cua cierta sobérbia diga-se, fazendo lhembrar ls senos de las státuas. Las puontas de l cinto batien-le acontra ls zinolhos porque s’acababa de sentar i cruzar las piernas. Anfilando ls uolhos pul meio de las ceilhas i sien ls zapegar de mi, preguntou-me:

- Nun amporta, hoije pongo de parte la pintura. Ando algo cansada i stá-me a dar l suonho! Gústan-te ls remanses?

-Gústan-me.

-Yá liste Madame Bovary?

-De Flaubert? Nó. A las bezes nien bagar tengo, por bias de l trabalho no soto de senhor Bonifácio.

- Senta-te un cachico i fála-me de ls remanses que liste.

Ls ombros de Conceição nistante se le caírun i stribórun a la cadeira sien le haber pedido permisso. Abriu la boca amostrando suonho, canseira ou l que fusse, çpuis, mui abuntade, çcalçou un de ls chinelos acetinados i stendiu un pie a dreitos al lhume pa l acalcer. Ls amarelhados i aburmelhados de l lhume beisában-le aqueilha piel branca i suable dando-le mais quelor i calentura. Drento de pouco tiempo cuncerteza que starie l senhor abade na eigreija a dar a beisar un pie friu i albo dun nino a las pessonas que iban a la Missa de l Galho i l ajudante nun podie faltar cun l rodelhico a lhimpar tanto deseio friu.

An bíesperas de Natal Conceição deixába-me pensatible, staba sola neste casariu, ne meio dua calhada que habie de doler mais q’ua scardaça spetada ne cuorpo i agora, pula cierta, tenie ua çculpa para retardar aquel suonho. A abaluar por calatriç, Conceição haberie de andar puls trinta anhos i you un garoto berdeguiço de dezassiete anhos, sien jeito para guiar ua cumbersa mais lharga. Ls uolhos mei cerrados abrírun-se-le nun sfergante, sien suonho i canseira, cumo eilha los houbira cerrado antes pra ber melhor.

Ampecei por le dezir ls lhibros que habie lido i la nuossa cumbersa fui a parar a la pintura, a las biaiges deilha pula Fráncia, pula Áustria, pula Toscana i a las abinturas de moça que tubo ne l colégio onde habie studado. A parte de ser nobato, tamien nunca quije meter cocharada ne ls assuntos de la bida deilha, fui assi que m’ansinórun, de maneira q’era siempre senhora Conceição a ampeçar las cumbersas.

Al tiempo que íbamos cumbersando, eilha zabotonaba las mangas de l roupon que lhebaba bestido, deixando ls braços mais folgados, nun sei se por bias de la calor de l lhume, se pula gana dua cumbersa franca nua nuite de cunsoada, antes la Missa de l Galho. Ls uolhos scuros que tenie, cumo dua azeitona negra, iban-se-le quedando cada beç mais spiertos i quando eilha alhastraba la sunrisa, ls uolhos quedában-le mais anchos na risa de la cumbersa que teniemos. Bieno-me a la cabeça la cuonta de l scribano que la giente de l pobo cuntaba a sou respeito. Nun me parecie que Conceição fusse ua delhambida dessas i custába-me a crer que algua beç tenga feito ua zfeita dessas al zgraciado. A estas horas, pula cierta, l tiu yá se habie atafanhado cun tanto selhouço i anaugado nun mar de lhágrimas d’amor, pus la aba de padre i la saia de mulhier chégan para quien quier.

Conceição lhebantou-se çcalça i custando-le a sacar l cuorpo de an pie de l lhume fui dreitos a un almairo de la sala i sien zbiar de mi ls sous uolhos grandes i spiertos, preguntou-me:

- Cognac ou porto?

- Porto.- cuntestei-le you.

Apuis mirei pa l reloijo i lhembrei-me que faltaba pouco pa la Missa de l Galho i ampecei a quedar cun l zassossegado normal dun moço de dezassiete anhos. L tiempo drento daqueilha sala caliente nun me rendie, parecie-me que nun bolado, talbeç houbisse strebolado, leitor amigo. Ls uolhos negros i spiertos de Conceição nistante s’anterórun de la mie einocéncia i lhougo benírun a tener cumigo.

- Tranquilo, bai-te a gustar i inda tenes tiempo pa la missa. Un buono bino bielho, a par de mos cundar las benas, solo mos fai bien! Mira, calece-mos l cuorpo i assossega-mos la alma.

- Talbeç téngades rezon.

Assossegórun-me bien mais aqueilhas palabras de Conceição que lad palabras de la prática i l scorpechar de l cálece de bino de senhor abade na Missa de l Galho.

Agarrou nua garrafa, nun par de copos i nua caixa de galhetas de manteiga. Amarrou-se para melhor amostrar l cuorpo i apuis deixou todo na mesa pequeinha de la sala, an pie de l sbarbeiro i de l lhibro. Stando agora tan acerca de mi, sentie-le l báfio i l cheiro caliente de la boca que parecien carregar l poder dua manzina. Bi que la piel de l rostro deilha tamien staba caliente, nun sei se por bias de l lhume se pula lharga cumbersa que hemos tubido naqueilha nuite de cunsoada.

Agora assigurábamos nos copos de bino de l porto, contra ls quales strelhuzien las chamarielhas alborotadas de l lhume bien atiçadas an quelores amarelhadas, aburmelhadas i azuladas, cuncerteza acupando, na mie maneira de ber, ua tela pra un quadro, dua pintora inda çcoincida i ua sala nun sabie bien adonde.

Al tiempo que falábamos i íbamos aprazando l doce bino, Conceição passaba la lhéngua puls lábios humedecendo-los i lhembendo ls apuros que quedában de l bino. Talbeç por bias de l bino agora l rostro deilha iba ganhando outra quelor i las palabras que le salien de la boca tornában-se mais bagarosas i açucradas.

- Amanhas-te bien porqui ?

- Hai dies, Conceição…

La cumbersa seguie agora pul camino de la bida de casa, de l trabalho, de l lhugar onde moraba. Aspareciesse-me que Conceição lhebaba la bida al de lebe i gozaba l cielo na tierra i para quei fazé-lo d’alrobés, se l cielo ye ua recumpensa para todos ls anfelizes que na tierra nun tubírun amor. Houbo ua altura que me tirou un copo baziu de la mano para lo tornar a anchir i fízo-lo nun toque mais demorado, lebe cumo un suonho dua nuite sien cena de cunsoada.

Mirei pa l reloijo i nien dei pul tiempo a passar. Lhebantei-me i çpedi-me a correr de senhora Conceição, staba prestes a ampeçar la Missa de l Galho. Talbeç se me amboracasse pula puorta de trás de la eigreija que staba siempre ancustada i apuis chubisse pulas scaleiras de l recanto de la tribuna, naide darie cunta. Nun me curcefiquei por haber chegado atrasado a aqueilha nuite, a la Missa de l Galho, yá que me habie tamien atrasado cun la antrega dua ancomienda.

Soutordie an casa, a la purmanhana, toda la giente a la hora de l zaiuno falaba de la Missa de l Galho, de l persépio i de ls anfeites de la eigreija. Ajuntei-me a la cumbersa familiar, mas a respeito la ancomienda de Dona Conceição, nien ua palabra.

Passou-se algun tiempo i zonou-se-me acá ne ls oubidos que D. Conceição habie deixado l casariu que mercara al fidalgo de l Cundado i se habie mudado pa la capital. Nunca mais la tornei a ber, nien deixou rastro. Hai quien diga, qual Madalena arrependida, que bulbiu pa ls braços de l scribano, atamando-le ls selhouços i sanando-le ls males de l coraçon.

Un beç staba you no soto de senhor Bonifácio i recebi ua ancomienda que benie no miu nome. De certeza que nun era para mi, habie anganho, ua cousa daqueilhas, inda porriba tan abultiada. Mirei pa la ancomienda i busquei la direçon que alguien nun screbiu i ampecei a rasgar l papel de l chumaço. Era ua tela dun quadro cun dous búltios, algo foscos, a nun ser l lhume de l chupon donde salien uas quelores amarelhadas, aburmelhadas i azuladas. Tamien habie ua mesa pequeinha cua garrafa.

A bien dezir, amigo leitor, que pacientemente me quejiste scuitar , quando estas lhembráncias bénen a tener cumigo neste tiempo, quedo-me nesta sala de star, tan grande, onde m’ancontro agora, ambelado baixo la lhuç melindrosa dua candeia, bien aconchegado, nun cadeiron de piel, mirando pa las quelores alborotadas de las chamarielhas de l lhume que me ban caldiando l cuorpo. Çpuis bebo un copo de bino de l porto i beio l tiempo a passar.

Duarte M. M. Martins

Die de Reis ou ...

2012-01-06T19:42:00.005Z

... Camelos no Praino i lheinha de Santo Antonho

Ajuntában-se no meio l lhugar manhana cedo. Uns traien calagouças, outros maromas, angrideiras, i outros até troçadores nun fura pori aparecer dalgun trampo más fuorte pedir dientes afilados an beç de machadas, por bien grandes i pesadas que fúran. Era assi todos los anhos, nebasse ou fazisse sol, cun cenceinho ou merujeiro i aquel anho tamien assi se cumprie la tradiçon. Serien por ende uns trinta, solo los que yá habien pagado l bino, fuora la garotada que tamien iba para ajuntar menudas i arrastrar galhas até los carros a cargar. Al final de la jornada poderien cuntar cun bino i antremoços, cun suorte cada un roubarie tabafeia ou chouriça para fazer la rambóia serano adrento. Los mardomos botórun senténcia:
- Ei rapaziada! Hoije bamos pula lheinha para Adil Cunceilho i los cepos serán l que sobra de l castanheiro de Tiu Sabastian, l que se secou na carreira de los nuobe. Ála! a camino que la carga ye acerca i l santo nun puode apanhar friu!
Los dous carros, a las bezes más cunsoante las personas de l juntouro, eran puxados pula mocidade: dous a sigurar la cabeznalha i los outros, aparelhados por cuorpo ou eidade, fazien fuorça an stadulhos fuortes que donde an donde eran atados a la maroma que salie de la cabielha, cual sobeio capaç de acorrear ua buona meia dúzia de juntas. Cada un aguardaba l die cumo se dun eisame de abaluaçon de tempra se tratara porque amostrar la fuorça, l génio i la manha era ua maneira de marcar campo i proua no meio de tanto macho.
An menos de dues horas yá habien tornado al terreiro no meio l lhugar cun la carga pronta, los carros quedarien para çcargar apuis de almuorço porque l báfio a pata i botielho salie por chupones i telhados adonde las teilhas se arralában anriba de la chilha, más folhin que madeira afumada i l stómado apuis de tanto rodion yá se iba colando a las costielhas. Habie que aporbeitar porque outro botielho solo l die de la fiesta! De tarde trairien los cepos i a la hora de las trindades l lhume tenerie que quedar pronto a chiçcar.
Era no die de reis, un die que nien era santo nien lomeado, mas que traie agarrada la tradiçon de los reis magos: dar lhembráncias i outras comenéncias, modernices para se gastar l que un nun ten. Cul tiempo, i cumo inda hoije se fai an Spanha, passou a ser neste die la oucasion de dar las prepinas i dalgua anzona para ninos, mercada an Mobeiros ou na feira l Naso.
Apuis l almuorço i de haber passado la manhana na jóldia cula mocidade a lheinha, batírun a la puorta. Siléncio!
- Antrai! quien ye? Preguntou mie mai. Nada!
- Bai a ber quien ye rapaç, anquanto you acabo de amanhar l lhume nun baia pori dalgua persona benir cun friu.
Mal botei l pie fuora de la cozina i ambiquei l mirar acuontra la puorta na outra punta de l corredor, bi un selumbron na buraca l gato, abri la puorta debagar, mirei pa riba a ber se bie dalgua persona, mas nada, solo bi l que habien deixado na soleira: un cabalhico malhado, de lhata, anriba de quatro ruodras negras. Bó!! i l que serie aquilho? Quien lo haberie deixado?!?! lhougo a mi que nunca habie tebido cousa tan delei para morar. Anton agora los Reis tamien andában porqui por este fin de mundo que quaije nien camino para altemobles tenie para poder antrar i salir deilhi? Botei-le la mano debagar, meio cun miedo que se scachasse, mirei-lo de lhado, de frente i por trás, peguei na cordica agarrada al cachaço i lhebei-lo de rede a rodar no cimento de l suolo pa la loija nistante andonada na squina de l scanho. Benie l cabalho, i l rei? pensei, se calha habie quedado perdido cun sou camelo no termo que arrodeaba l lhugar porque esse bicho más aquestumado a la arena por cierto quedou mareado nalgua caleija por bias de tanta piedra, anterrado no lhodaçal ou cun miedo de resbalar no carambelo al absedo, trés buonas rezones para afastar essa becheza de l Praino, adonde nunca los bi, ou será que andan çfraçados cumo no antruido?

Menumiento eideficado

2012-01-05T22:20:00.004Z

l tiempo amostra lhinhas de la tue sina
an beneiros ambaranhados.
L aire i l´auga zgastórun las tues carnes
i an ti, bibo l ferrolho abre i fecha-te las puortas
cunsante cadun querga.

Quien ye qu´entre! arrespónden-me de drento.
I, you entro,
zbiando las aranheiras,
pisando ourtigas na preça de casa,
çcolgando la bolsica que me quedou colgada,
feita de cachicos de sobras de bestidos.
Percurei neilha las galhetas i l checolate negro
qu´alhá ponien a modo que la mie lhambiçqueirice nun l chegara.
Spirro, cuçpo,
sacudo l puolo de la saia,
tropeço nua debanadeira
i debano la bida anteira.
Acobielho l lhume de las lhembráncias
que se me assoman al miu strefogueiro,
miro arriba, las baras de l fumeiro.
Cheiro.
De tan fuorte oulor bén-me als lábios ua augadilha
dá.me buoltas l stómado.

Quien ye qu´entre!, oubo quando l tarabielho sona
i,
... naide entra.
Só you salo de l menumiento eideficado!...

Burro çferrado

2012-01-05T12:50:00.002Z

Atupinou sien ferradura

Sgaçou l casco

I l sou andar.

A ceçar cansado

Quedou maribundo

Sien sul sien norte

Morriu-se a andar.

Amortalhou-se para nun matar!…

Mas la mortalha era tan scura

Que la mortalha nun pudo ousar!…

Rasgou ls benairos

De la mortalha

Ruznou bien alto

Para se zamortalhar.

Cosiu ls caminos

Deberas rasgados

Calçou ls pies

Para abantar.

Rebolcou-se ne l chano

Azimbrou cun l´albarda

Resfolgou fondo

A scatrapulhar.

Apertou ls crabos

A las ferraduras

Para nó mais l casco

Se le çfolhar.

Nun fui por falta de sfuorço!

2012-01-05T09:57:00.002Z

Marie, habie-se casado yá algun tiempo.

I inda, para alhá doutras cousas, staba guapa, cun cuorpo tan bien feito que arramaba tanta fermusura cumo l chafariç de l cruzeiro auga, era capaç de parar l mundo siempre que botaba pie fuora de casa, dezie-se que ende staba ua obra feita por Dius, puis nun habie home neste planeta tierra que fusse tan anterjeitado para fazer tan bien. Ajuntaba a todo esto un coraçon bondoso, paciente, buona fé, dedicada a sou tiu, crente an Nuossa Senhora a quien habie pormetido ser fiel na salude i ne l amor, zde aquel die que puso l anielho ne l dedo delantre de todos ls sous i de la mai d’Antonhico.

Marie era ua tie que tenie todo para ser la mulhier mais feliç daqueilha aldé i alredores. Nun fusse Antonhico, nun se resolber a atamar las calenturas queilha anhos i anhos a filo habie aplaquiado para chobir las scaleiras de l altar i antrar nessa nuoba bida, pura i de la mesma maneira que sue mai l’habie botado al mundo hai zanuobe anhos datrás.

Agora drumie cul sou home, mas die apuis die, nuite apuis nuite, nada, mas mesmo nadica acuntecie, que nun fusse, un beisico seco i zlhabado i uas palabricas amerosas, nien mesmo por ambaixo de ls lhançoles que era adonde eilha speraba mais, nada s’alhebantaba, i se acauso Marie se boluntariaba i ancustaba l sou cuorpo caliente para ber se l menomiento tomaba fuorma, lhougo Antonhico se çfazie an çculpas, que staba bouba i mai puodie oubir, l sou sentido nun staba ainda para ende birado.

Marie passaba ua bida anfernizada i nien ua manica passaba por eilha, l sentido nun era capaç de salir deste cunsumideiro, habie tenido tantas spráncias, habie sonhado tanto anroscar-se cun Antonhico i que fusse el a lhebar-la a conhecer l cielo.

Mas agora era sue mai para todo i por todo, fusse l que fusse que Antonhico fazisse, “ i se mai nun quier, i se mai bei, i se mai çcunfia, i se mai le parece mal” Antonhico inda nun habie salido d’ambaixo de las saias daqueilha que l pariu.

Só que Marie, yá nun sabie l que fazer, nien sabie quanto tiempo mais era capaç d’atamar tanto fuogo i tanta calentura que le íba pul cuorpo todo. Triste i chorana, yá era mui çfícele scunder tamanha amargura que le íba n’alma, i fui assi que sues amigas l'ancuntrórun assientada nas scaleiras.

Marie l que tenes?

Apuis de muito ateimar alhá Marie s'abriu, cumo siempre habie arreganhado las piernas a Antonhico, só que destas lhebaba la seluçon pa l porblema i d’Antonhico nien sequiera un afago naquel braseiro.

-Mulhier, de pronto dixo lhougo ua deilhas, deixa-te de choramenguiçes, assi nun bas a lhado nanhun, pul que beio, Antonhico ten rezon, mira-me las bragas que trais, chégan até ls zinolhos, yá nien mie bó las usa, las tetas çcaídas … porque las greinhas i ls beiços nien te falo.

Çcuita, lhougo a la nuite bas a bestir uas roupicas, langerie, preta, daqueilhas que a la frente solo ténen ua rendica, por atrás un filico que se mete nas nalgas, las tetas puxas-las pa riba, arrebita-las, uas tiras que agárren las meias, pintas ls beiços i zatas l pelo para sbolaciar las greinhas.

Bas a ber cumo las cousas demúdan, digo-te l you, fala la spriéncia.

Puis fui assi que Marie fizo, puso-se cumo ua berdadeira deusa meio-nuda, ademais eilha staba decidida a fazer todo para salir daquel sufrimiento, daquel anfierno i al menos zanjuar-se.

Quando Antonhico antrou an casa i biu Marie deste jeito, arregalou ls uolhos i tubo estas palabras…...

Marie l que acunteciu a mie mai para tu stares toda de negro, tan zafigurada i tan beiçuda?

Nota: Ye de lhoubar todo l que fai ua tie assi para ganhar l sou terron d’açucre, mas hai tius que nunca stan parende birados.

Anho Nuobo Bida Bielha-Ano Novo Vida Velha

2012-01-05T09:44:00.002Z

Ende tenemos un anho nobico an fuolha mas ua política bielha.

Bielha de seclos.

Meia dúzia de bandulho cheno até le chegar cul dedo, milhones na miséria.

I cun ua grande defrença, einorme an relaçon als tiempos d'antanho: ye qu'agora, cul straourdinairo abanço técnico-científico, ye necairo muitíssemo menos trabalho para se porduzir l mesmo.

Antoce, se houbisse ua justa çtribuiçon de l trabalho i de la riqueza, nunca l'houmanidade poderie tener nibles de bida i de felicidade cumo agora.

Mas nó! Las assimetries son brutales.

L'eigoísmo i la ganáncia fálan mais alto i l'oujetibo supremo ye l lúcaro.

Acá pul burgo, ls eisecutores dessa política eisecrable son las chamadas troikas.

Ls d’acá; PS/PSD/CDS i la de fuora; FMI/UE. La purmeira, submissa a l'anton CEE agora Ounion Ouropeia i a a minorie prebilegiada natiba, sbanjou milhones an subsídios fraudulentos i an obras faraónicas, çtruiu l'agricultura, la frota pesqueira i l'andústria pesada colocando-mos a pi de l'abismo.

Agora, la segunda, stá a dar-mos l'ampurron final. Amprestou-mos 78 mil milhones mas eisige que los debolbamos debrebe i mais 35 mil milhones.

Para alhá desso, ampon-mos cundiçones miserables que ne mos fáien bolber quaije als tiempos de l feudalismo i de la scrabatura: mais horas de trabalho, menos ourdenado, menos períodos de çcanso, menos assisténcia social, muito mais zamprego, fame i miséria.

Ye claro que a todo esto la troika que ne ls (z)goberna hai mais de trinta anhos diç si.

Ye perciso, ye amperioso, que dígamos nó!

Screbiu (outor) - Francisco Ramalho

(Em português)

ANO NOVO VIDA VELHA
Aí temos um ano novinho em folha mas uma política velha. Velha de séculos. Meia dúzia de pança cheia até lhe chegar com o dedo, milhões na miséria. E com uma grande diferença enorme em relação aos tempos de antanho: é que agora, com o extraordinário avanço técnico-científico, é necessário muitíssimo menos trabalho para se produzir o mesmo. Portanto, se houvesse uma justa distribuição do trabalho e da riqueza, nunca a humanidade poderia ter níveis de vida e de felicidade como agora. Mas não! As assimetrias são brutais. O egoísmo e a ganância falam mais alto e o objectivo supremo é o lucro. Cá pelo Burgo, os executores dessa política execrável são as chamadas troikas. A interna; PS/PSD/CDS e a externa; FMI/UE. A primeira, submissa à então CEE agora União Europeia e à minoria privilegiada nativa, esbanjou milhões em subsídios fraudulentos e em obras faraónicas, destruiu a agricultura, a frota pesqueira e a indústria pesada colocando-nos à beira do abismo. Agora, a segunda, está a dar-nos o empurrão final. Emprestou-nos 78 mil milhões mas exige que lhos devolvamos rapidamente e mais 35 mil milhões. Além disso, impõe-nos condições miseráveis que nos fazem recuar quase aos tempos do feudalismo e da escravatura: mais horas de trabalho, menos ordenado, menos períodos de descanso, menos assistência social, muito mais desemprego, fome e miséria. É claro que a tudo isto a troika que nos (des) governa há mais de trinta anos diz sim. É preciso, é imperioso, que digamos não!

Francisco Ramalho

Juri de l Cuncurso Cuontas de Natal 2012

2012-01-05T01:15:00.004Z

Bengo eiqui a anunciar que stá custituído l juri de l Cuncurso Cuntas de Natal 2011. Desta beç ten ua cumposiçon lharga, de la seguinte maneira [l'apersentaçon ye por orde de l abc]:

Trés mulhieres:

Bina Cangueiro

Maria Teresa Almeida

Noémia Antão

Trés homes:

Alberto Gomez Bautista

Alcides Meirinhos

Francisco Domingos.

You, Amadeu Ferreira, fazerei de cordenador. S'acauso houbir ampate, caberá-me a mim la funcion de zampatar.

Agora, l juri bai a tratar de stablecer las regras, cunsante l anúncio de l cuncurso i mal haba nobidades, lhougo eiqui benirei a dar-bos las amboras. Todos ls membros de l juri fázen parte de la quadrilha deste blogue, todos mui cumpetentes, i sei que ban a star a l'altura de ls cuncorrientes. Bien háian por haber aceitado.

Amadeu Ferreira

Ls Reis

2012-01-05T00:27:00.000Z

Cuidábades que las fiestas "de la quadra" yá habien chegado al fin? Stábades bien anganhados... anton queriedes deixar la pipa más buona sien torneira.

Para cerrar tenemos Ls Reis, que son an San Pedro, mirai que milagre, anton adonde habien de ser?!

I diç que hai roscos. I antremoços i bino para todo mundo.

Astanho, a la fiesta de las Claras (para porbar a ber se ls roscos stan buonos) cháman-le sestas culturales! Tamien stá bien!

Yá se sabe que stá todo mundo cumbidado, se quejirdes aparecer, un muordo i ua pinga nun mos han de faltar, mas isso de "culturales", an nuite de Claras, çcunfio que solo apuis de l treceiro copo.

Aporbeito para le dar ls parabienes a l'Associaçon Lérias, ua rapaziada derramada i que fai un bun serbiço pula Tierra de Miranda.

JANE AUSTEN

2012-01-04T21:22:00.006Z

.
JANE AUSTEN
.
.

http://janeaustenpt.blogs.sapo.pt/

Jane Austen Portugal (JAPT) é um blogue dedicado à escritora Jane Austen que pretende reunir à sua volta as fãs de Portugal.

Nasceu a 25 de Dezembro de 2009 com o intuito de disponibilizar informações sobre a escritora, romances, adaptações, em língua portuguesa.

Actualmente o JAPT é constituído por doze fervorosas admiradoras de Jane Austen, mas está sempre aberto, através dos comentários e, para quem desejar participar activamente entrando para a nossa equipa.

Un nuosso coincido stá a publicar alhá, an mirandés, ua obra de Jane Austen por capitulos. Se quereis saber mais ide a sachar, nun quergades la papa toda feita.

Este ye un cachico de la traduçon! Parece que conhecemos personages cumo estas!
Ls remanses son miesmo assi, a modos que eimaginaçon/realidade.

…L senhor Bennet era ũa mistura tan rala antre listo, caçuador, calhado i de lhunas, que la spriença de binte i trés anhos nun habie chegado pa que la tie le coincira l carátele. Assi i todo, l deilha era menos custoso d’antender. Era ũa mulhier de pouca anteligença, de pouca cultura i de génio zeigual. Quando se aborrecie manginaba que staba nerbiosa…

Retrato 360º de la Sposiçon Arte i Artesania ne l Museu de l Abade de Baçal

2012-01-04T16:08:00.001Z

Art of Masks and Masquerade by Amável Antão in Portugal

Sangrar andrento

2012-01-03T23:01:00.001Z

Beisa-se la rosa,
topa-se ne ls spinos,
sécan-se ls lábios
para un nun sangrar.
Sángra-se por drento,
sien rosa, sien spinos
cuorre mais sangre
sien un se picar.

Assi se ampeça l Mundo!

2012-01-03T22:49:00.006Z

Nun fosse Eba i l sou antolhar pula maçana i l paraíso serie eiqui na Tierra. Mas nun foi de Eba la culpa, foi l Diabro. Esse tentador d' almas, almanecha de l Diabro que todo anganha i todo quier...

To l mundo que ainda nun tube la possiblidade de ber l teatro popular i que le gusta ber las pessonas de l pobo a representar, cula fuorça de quien sente l peso de las personages que ancarnan, tenen eiqui la possiblidade de ls poder ber.

Por mais palabras que se puodan dezir nun hai cumo ir ber para sentir la fuorça de l sentir de l' alma de un pobo a representar.

Quien puoda i querga, die 14 de Janeiro a las 15:00 horas na Aula Magna-Cidade Ounibersitaira - Lisboua, son solo seis ouros l' antrada.

Alhá arriba puode ber-se l cartaç, eiqui abaixo teneis dous links adonde se puode ber mais anformaçon.

http://www.mogadouro.pt/cultura-mogadouro/noticias-cultura/84-festas-e-romarias-turismo/464-auto-da-criacao-do-mundo-em-urros

http://www.mogadouro.pt/multimedia/galeria-de-videos

Palabras de pastor

2012-01-03T21:27:00.006Z

Pastor na Sierra de la Streilha, 1911, Retrato ancuntrado na Anternet

Fui hai trés dies, neste Demingo, a la nuite. Staba you a ber l noticiário na RTP anternacional (que ye l mesmo que l de la RTP nacional) i desta beç de l ampeço até al fin; cousa que nien siempre m’acuntece porque aqui passa siempre ua hora mais tarde que an Pertual i para mi yá ye algo tarde; por outro lhado ye ralo you l ber quando stou ende an Pertual, pula cierta por falta de tiempo i porque acho siempre outras cousas mais antressantes para fazer. Para quatro dies por eisemplo que passei ende cumo me acunteciu neste Natal, nun faltaba mais nada que star a perder tiempo a prestar atençon ou a dar tamien la mie bénçon a cousas que nien siempre aprecio cumo ciertos monopólios relegiosos ou financeiros inda bien presentes na telbison pública pertuesa eisercidos inda hoije cumo tal pula Eigreija ou esse sacrosanto sporto nesse paíç que ye l futebol. I inda se you achasse algua anspiraçon stética na maneira de se bestíren, de se peináren ou de se pintáren las jornalistas desses canales pertueses talbeç menos bien pagas que l un puode pensar por bezes, mas ye que nien esso ! You que procuro antes de todo la simplicidade, acho ciertos peinados por eisemplo que alguas úsan … cumo bos poderei dezir ?... arteficiales ? Si, probablemente. Ganhában alguas an reaprender a ser mais naturales… mas talbeç tamien cun melhores salários i mais cunsideraçon (de la parte de ls homes ?) pul trabalho que cunséguen assi i todo realizar i talbeç cun mais deficuldades que ls jornalistas homes que dében de tener bien mais tiempo çponible que eilhas afinal de cuontas... Digo esto yá que uns (mas uas ?) até cunséguen eiditar todos ls anhos calhamaços cun cientos de págenas que acában por ser bendidos an grande scala por esse paíç fuora quando nun ye ne l strangeiro até…
Mas you acabo por gustar de l ber assi i todo l noticiário de la RTP, aqui an mie casa an França, yá que tamien ye un de ls raros canales an lhéngua pertuesa de cierta culidade i de serbício público que un ye capaç de recebir quaije de graça aqui ne l strangeiro… i nun ampide que un faga assi i todo alguas obserbaçones cumo you stou a fazer agora…

Hai trés dies, dezie you anton, a la nuite, chamou-me a l’atençon ua antrebista que habie sido feita pal telejornal de la RTP a uas trés ou quatro pessonas an Riu de Onor i ne l cunceilho de Bimioso. L tema dessas antrebistas era subre l euro, las sues cunsequéncias i l’ouportunidade que haberie se zaparcisse i fusse substituído outra beç pula antiga moneda nacional que era, mas desso inda mos lhembramos bien todos, l mais que secular scudo que ancontra la sue ourige, pul menos ne l que respeita al nome, yá ne l tiempo desses purmeiros reis de Pertual, na realidade talbeç eilhes yá bien mais ouropeus que l que un puode pensar por bezes…
Cumo nun podie deixar de ser nun paíç tan católico cumo Pertual, até fui antrebistado l padre de Bimioso para que disse tamien la sue oupenion subre essa queston de l euro. Ah, afinal tamien l’Eigreija s’antressa (i Dius anton, sien dúbeda ningua!) pula amportáncia que puode tener ou nó l euro! Quien dirie ?! Ye que todo ten l sou balor, parecendo que nó !
Mas you para ser sincera, dei subretodo oubidos a ua mulhier yá puls sous setenta anhos, cun un lhenço na cabeça i toda bestida de preto, mas bien guapa na realidade i bien mais natural que muitas jornalistas de la RTP que deberien ir a tirar un curso de stética mas ye, ende ne l Nordeste trasmuntano (eilhas que pul cuntrairo dében de pensar que nó, que las mulhieres de l nuosso Nordeste ye que son uas atrasadicas… !). Acabou anton essa mulhier tan parecida cun muitas ties que cunhecemos todos nós nas nuossas tierras de Miranda i alrededores antre ls mais afastados de Lisboa por dar ua oupenion que serbiu tamien de cuncluson i que a a mi me pareciu dua sperteza total, un eisemplo de raciocínio simpres mas sano, realista i cuncreto até para ls mais sprientes i sabidos eiquenomistas pertueses ou mesmo strangeiros.
― Acabar cul euro…?!, dixo eilha mais ou menos assi mas muito serena. Agora que stamos aquestumados, que mos deixen star ! Que stamos bien tamien !

Cumo quien diç : Yá mos custou habermos sido oubregados a mudar de moneda inda hai tan pouco tiempo. Nun faltaba mais nada agora tener que mudar outra beç ! Nun custa tamien denheiro andar a mudar siempre ? Só nun custa para quien nun s’amporta ou ten mui pouco juízo !

Mas fui l que dixo un tiu tamien ne ls sous setenta anhos, nessas antrebistas subre la deficuldade que uns tubírun para se adaptar al euro faç agora dieç anhos eisatamiente, que inda nun me saliu de l oubido porque me chamou tamien l’atençon… Un pastor que staba a guardar las sues canhonas i que stubo an França cumo eimigrante até hai uns binte anhos; dixo assi el anton, an pertués, mas cun ua pernúncia mui parecida cula nuossa que usamos nós an mirandés :

― An França nun angánhan a naide ! Eiqui an Pertual, son mui aldrabones ! Son mui trafulhas ls Pertueses ! Son ! Son !

Palabras de pastor… ! An Riu de Onor ou ende ne l Cunceilho de Bimioso… i nun de ls canales de la RTP a ua hora sien dúbeda de grande scuita…

Mas son palabras i antrebistas antre outras assi que me cumbéncen assi i todo que inda puodo e debo de cuntinar a ber l telejornal de la RTP, anque nó todos ls dies porque quando acaba l programa yá son aqui adonde you bos stou a screbir mais de las dieç de la nuite; i « neste paíç adonde nun angánhan a un » afinal cumo diç l pastor de Riu de Onor, you a las 7h30 (son ende las 6h30 de la manhana) yá tengo que me poner lista para salir de casa, sendo inda de nuite cumo ye l caso nesta altura de l anho, i ampeçar l trabalho cinco dies por sumana siempre a las 8hoo… quando son ende las siete !

Mas bá, talbeç bala la pena cuntinar assi… Se neste paíç nun angánhan a un !

Palabras de pastor !

N.B. Na realidade tamien nun ye bien cumo diç esse pastor. Bien gustarie you tamien que ls Franceses tubíssen só culidades. Mas culidades tamien eilhes las ténen ou son capazes de las tener quando quieren. Só que por bezes tamien hai cousas que mos assústan… cumo ua ambora que mais dun cumo you oubiu ne l rádio hoije pula manhana. Debien de ser las siete… Mas bá ! Yá an Abril, bai haber eileiçones...
I depuis?
Depuis... só quiero sperar e desear ua cousa a todos: Un feliç Anho Nuobo cun muita paç i subretodo l percipal que ye muita salude i siempre ua buona çposiçon para todos !

Amanhando suonhos

2012-01-03T17:24:00.003Z

L mar fui als poucos angulhindo l monstro marinho i an golfiadas botando pa la arena la jamanta de cara de peixe sapo.
L peixico nada inda algo andeble naquel mar de óndias i bai sendo lhebado na scuma dóndia para curar las maleitas de sues scamas an formas de charrascas adonde se metie tanta beç.
Há-de la jamanta anterrá-se na arena de tan ressequida tener las moncas que le cobrien l cuorpo an regubiuras i de que deixaba rastro cumo se ua lhezma fura, siempre que se assobaba al monstro,
Cuntina l peixico a amanhar ls suonhos i a saber de ls corales...
Saltará pa las poçacas deixadas pulas marés altas, assi que l mar nun lo arrolhar de feiçon, nó por se cagar de miedo de las óndias gigantes mas por bias de querer melhor ber la lhuna, las streilhas i la bida.

HOIJE

2012-01-03T16:29:00.001Z

RESUMO DE LAS AMBORAS DE L’HOIJE NA SEGUNDA METADE DE L’ANHO DE 2011

Onte fui l bideo de la purmeira metade de l anho, hoije ye de la segunda. Fui un anho an que l HOIJE lhebou até ls sous leitores cientos de amboras i amostrou cumo pul Praino la cultura ten tamien ls sous dies. Son las associaçones, que tantas bezes son mal antendidas i até zacraditadas. Solo quien bibe eiqui sabe l munton de giente que dá muito de l sou tiempo para que l Praino seia ambora.
Muitas bezes oubimos ls que stan fura a dezir que nun hai nada, que pouco se faç. Mas mirai para este bideo i dezi alhá se l Praino nun dá tanto ó mais a la cultura que ua grande cidade. Cabiemos nua rue de Lisboua, mas durante l anho somos mais atibos i tenemos mais atibidade cultural i mais partecipada.
Hai ls que bénen ne ls dies nomeados i cúidan que nun hai mais nada a nun ser adonde eilhes stan. Mas hai muito mais. Eiqui queda ua pequerruchica parte de l que las associaçones fázen, sien andáren a toda la hora a saber de ua zmola. Para fazer bonda gana de l fazer.

HOIJE

2012-01-02T19:15:00.003Z

.
RESUMO DE LAS AMBORAS DE LA PURMEIRA METADE DE L ANHO DE 2011 NE L HOIJE
.
Fúrun muitas las amboras de l HOIJE, ls bídeos i ls retratos na purmeira metade de l'anho de 2011. Deixamos eiqui un bídeo de parte d'alguns bídeos que podereis ber ne l Sendin an lhinha (HOIJE). Speramos amostrar manhana l referente a la segunda metade de l'anho.
Muitas tierras de l Praino fúrun ambora i l trabalho de muitas associaçones fui eiqui mostrado. Neste pequeinho trabalho podeis ber qu'inda hai quien trabalhe pula cultura de la nuossa region.
L HOIJE cuntinará a lhiebar l que de melhor se faç a todos ls que bénen bejitar l nuosso sitio.

Ir a scuola

2012-01-01T19:23:00.001Z

Cuncurso “Cuontas de Natal 2011”

2012-01-01T16:21:00.005Z

Acabado l tiempo de l concurso “Cuontas de Natal 2011”, eiqui queda un resume de ls outores que cuncorrírun i de las cuontas apersentadas a concurso, al todo 11 outores i 26 cuontas [an 2010 habien sido 12 outores a concurso cun 20 cuontas]:

Adelaide Monteiro (4): "Ye un diospiro", “L pinho d’abó”, “Ye tiempo”, “Un berdadeiro facanito”;

Alfredo Cameirão (Tortulhas) (1): “L suonho”;

Ana Maria Fernandes (2): "Nun pares mais Abó!"; "i mui pouco até a arroç doce cun zeinhos feitos cun canela...";

Antonho Cangueiro (4): “Antonho rebuscaba…”, “Botas nuobas”, “L çtino ten hora marcada”, “Alma de nino”;

Antonho Carrrasqueiras (2): “Natal son to ls dies”, “Un teçtónico pa l nino Jasus”;

Conceição Goncalves Lopes (Scacição) (1): “De l suonho a la rialidade”;

Faustino Antão (3): “L deseio cumpriu-se”, “La catequese que tenemos de fazer”, “L rabico”;

José Almendra (1): “La melhor prenda de Natal”;

José António Esteves (3): “L dr. Pedro”, “La biaige”, “Será que Dius eisiste?”;

Leonardo Antão (3): “Ne l miu die d’anibersário squecírun-se de mi”, “L nino Jasus reberdecedor”, “Suonhos”;

Valter Deusdado (2): “Habie poucos meses…”, “Eilhes yá tenien…”.

Ye tiempo de le agradecer als cuncorrientes, tamien pul cuntributo que dan pa la nuossa lhéngua i esso ye l mais amportante. Assi i todo, pul númaro de cuncorrientes, pul númaro de cuontas i pula sue culidade pouode-se dezir que l cuncurso,mais ua beç, fui un éisito. Para mi fui un gusto ler cada ua deilhas. Nestes dous anhos que ten l concurso, son yá 46 cuontas de Natal que quédan screbidas i esse ye un patrimonho lhiterairo de la nuossa lhéngua. An próssimos Natales teneremos que cuntinar.

Agora bai a ser nomeado l júri que scolherá la melhor, cunsante las regras stablecidas, i desso tamien eiqui daremos amboras.

Amadeu Ferreira

Bun anho de 2012

2011-12-31T19:42:00.006Z

para toda la quadrilha, que ten mantenido este blogue cumo ua de las percipales refréncias de l mirandés screbido na anternete i para todos ls que porqui ban passando, solo lendo ou tamien comentando, para todo mundo deseio un bun anho de 2012 i que l nuosso blogue se cuntine a zambolber i la quadrilha nun deixe de crecer: assi, poderemos cuntinar a dar la nuossa houmilde, mas siempre cuntina upa a la nuossa lhéngua, siempre bielha i cada beç mais nuoba; a la sue moda, este blogue yá faç parte de la stória moderna de la nuossa lhéngua i por esso ye ua honra pertencer a esta grande quadrilha.

Abraço arrochado i bun anho para todas(os) i cada ua/un.

Amadeu Ferreira

L suonho (cuncurso)

2011-12-31T18:09:00.001Z

1. Iba cunsemido. Habien salido de lpobo inda cun de nuite, i para alhá daquel ser un caminho que nun coincie i poradonde nunca habie passado, ls modos de ls companheiros de biaige nun le agradábannada: calhados, cismáticos, l home delantre a puxar l’arriata, i la tie atrás,cun ua bardasquica dun galho cun que le iba dando ne ls quartos donde an onde,nien palabra habien soltado çque habien salido de l pobo. Más a más, la cuostaque íban chubindo agora ampinaba-se i yá le custaba a angarrar culas suespiernas cada beç más brandas i bambas. Resfolhegaba i l bafo que le salie de lsnarizes formaba nubres que se çfazien sien rastro. Un frio de rachar fragas,que ponie l camino arresbaladiço cula carambina que nun habie zaparcido de lscachos adonde nun batie l sol i que l podie fazer atupinar a cada nuobachancada.

Yá nun iba para nuobo. Anhos i anhos,siempre cul mesmo duonho, ua bida de canseiras i trabalhos, a acarretar dunlhado par’outro, dies i dies de nabego, barriga quando nó chena, remediada,graças a Dius, mas sien grandes grácias nien rasgos, tirando-se un agrado de laduonha de beç an quando, ua manada de grano solo para el, ua festica ne lcachaço, cousa pouca i sien zmandos; las grácias de l filho quando era garotoi, de l duonho, trabalho i uas porradas certeiras por to ls serbiços malfazidos, a la par de l quemer que chegasse para ir bibindo.

I aquel ferron que nun se le tiraba de lsantido. L burro nuobo, l burro que sou amo habie trazido para la corte, unburro na fuorça de la mocidade al lhado del na manjedoura. Muito serbiçohaberie que fazer para ser perciso dous burros!, quando el mesmo habie dadosiempre cunta de l recado. Pus más balie que houbírun traído l burro nuobo, quebun cuorpo tenie, para aquel carreto tan loinge i que nun habie maneira de berquei iba a tener que alhumbeirar para casa na buolta.

2. Agradeciu bien quando parórun nunçcampado, yá zbiados de l camino, cerca de dues ó trés carbalheiras queanfeitában la borda daqueilhas paredes. Yá daba la cera bien barata, apuis dela caminada, que le fazie tembrar las piernas i resfolhegar l fuolhe de lacaixa. Nada que se acumparasse a quando era nuobo, que nun habie cuosta nienlhadeira que l atermantassen, por taluda que fura la carga; quando le daba uastrepas balientes a las burrancas nuobas que acaçaba pul termo, a mordé-las ne lcachaço, a sentir l biento i l sol a berdascá-le l lhombo. Isso ye que erabida, i nó esta tristeza de ser un poldras que nun arrastraba las patas, porçcargado que fura.

Mas, afinal, quei diabos habien idoeilhi a fazer? Un çcampado, nun se bie un germo, nun habie nada que le puníssenanriba l lhombo. Cun un friu daqueilhes, a la purmanhana cedo, ua caminada assipara loinge, para l meio de nada, buona ambaixada nun habie de ser.

L home dou-le l’arriata a la tie i puso-sean zlhado del. L’ama falou-le a mod’ameroso i fizo-le uas festicas ne l cachaçoi ne ls narizes, mas an beç de l assossegar solo l alberotou más l sprito. Queistában eilhi a fazer? Que trejeitos éran aqueilhes que le dában aqueilhasquelobrinas na spina?

Mei de sgueilha, biu que l home staba apurparar ua ouparaçon qualquiera. La tie zanrebulhaba un farrapo de l bolso del mandil i cuntinaba a fazé-le fiestas, agora culs uolhos rasos de auga.

- Çpacha-te cun isso!

- Nun chores mulhier. Chorar mas ye por ua alma de giente! Státan podre que nien ls ciganos le pégan. Ye melhor assi do que séian ls lhobos adar cabo del.

Nun antandie las palabras, mas mesmoantes de l’ama l’ampeçar a atar l farrapo als uolhos, biu relhuzir la fuolha deua nabalhota na mano de l home. Cumo un relhistro, fizo-se claro ne l souantandimiento animal. Anton era isso! Ua muorte mesericordiosa para paga de uabida anteira de trabalho i serbidon. Tirar l tropeço de casa antes que labelhice i la falta de fuorça le fazíssen más strobilho do que yá era. Cumo eraadmirable la gratidon houmana!

Nó! Antes ls caneiros de un lhobosfamiado, que l fierro friu i traiçoneiro de l amo mal agradecido. De un tiron,soltou l’arriata de las manos afrouxadas de l’ama i scapou a fugir, nunscatrapolhar torpe i trubio, sien tino i ciego de ganas de bibir. La bida que lprópio amo le querie negar.

3. Nun daba fé de quantos dies i nuitesandaba yá por aqueilhes termos, a scundé-se de bichos i giente, zbiando-se depobos i caminos, a rapar ls fenascos que ancuntraba i mal chegában para leaguantar la pouca chicha que le mantenie ls uossos juntos andrento de l saco del çamarro. Frius i fames cumo dies, al Dius dará a bagamundiar puls montes,tenie bien cierto que se iba arrumando al fin i fazie las cuontas de arremate.Nun habie tenido ua bida mi mala, nada de luxos, mas inda assi remediado, apoder de muito trabalho, claro, mas adonde hai nada que pague la palha ciertana manjedoura al fin de l die? Nun fura la redadeira çfaçateç de sou amo i nunhaberie rezones para muita queixa. Benie-le muita beç a la lhembráncia lamocidade, ls retouços culas burrancas puls lhameiros, l scatrapolhar a lasuolta por caminos i prainadas cul biento i l sol a berdascá-le l lhombo, lretesar ls musclos quando era perciso fazer ber cumo se puxaba ua carga al cimo...passaiges que agora nun éran más que ua lhembráncia doce.

Altreceiro die sien sequiera achar un ranqueirico de yerba para quemer, la fameampurrou-lo para cerca de un pobico pequeinho adonde nun tubo coraige deantrar. Sien dar tino de l que fazie, anfunisgou-se para andrento de un buracoambaixo uas peinhas, a modo corriça cun algua palha ne l chano i tumbou-se alfondo acontra las fragas, sien se dar de cuonta que ne l outro canto staba uabaca a mirar para el cun uolhos grandes i mansos.

Sentiu un friu que nun era l de la nuitea arrepassá-le ls uossos. Tenie pena de nun haber fazido parte de nadastrourdinário i formidable durante to la sue bida, custaba-le que an menos quenada yá nun sobrasse lhembráncia daquel burro na stória de l mundo.

4. Deixou tumbar la cabeça anriba lapalha cula lhembrancia de la duonha a chamá-lo anquanto el fugie trás de uaburranca pulas eiras de l sou pobo, lhembrou-se-le l filho de ls duonhos i lbrincote que fazien nas eiras i ne l curral; sonhou cula corte caliente depalha i stierco nas nuites de ambierno, sonhou cula yerba fresca de lslhameiros i l’auga que relhuzie prateada puls rigueiros, ó aquel relhampo friuera de la fuolha de la nabalhota de l duonho?... ambaranhórun-se-le ls suonhos ila rialidade i biu ancher la corriça de giente i de ua lhuç caliente que leapartaba l friu de ls uossos; biu streilhas, anjos, reis i pastores armanados dezinolhos delantre de un Nino znudo i deitado na palha als sous narizes, que secalcie cul sou bafo agora caliente i l miraba culs uolhos de l filho de sousamos; un Nino que scapou cun el a scatrapolhar pul aire poriba de cabeços iprainadas, arrepassando las nubres que le fazien fiestas amerosas, anquanto l Nino se agarraba al sou cachaço cuas risadas que le fazien renacer la sangre de la mocidade nas benas.

Sentie-se agora anchoquecido d’uaalegrie çcunhecida i nun era yá capaç de çtrinçar la frunteira antre suonho irialidade, mas dua cousa l sou anstinto animal staba cierto quando ancostououtra beç la cabeça a la palha de l chano i cerrou ls uolhos nua drumideira doce:habie fazido parte de ua cuonta stroudinária i marabelhosa; durante muitotiempo aquel burro habie de quedar na lhembráncia de l mundo.

* Feliç Anho Nuobo *

2011-12-31T17:25:00.003Z

Buôno Anho

2011-12-31T15:07:00.001Z

2012

Que grande bentaneira a l´antrada
parece que pulhi fuora nun se bei quaije nada
You que cuidaba que se iba abrir ua rodeira lharga
beio ua caleija apertadica, chena de regubiuras

Que penhascal ye aquel ne l sitio de l miu praino?
Qu´amboras me traem ls uolhos de l´ ancerteza?
Que lonjura de rábia me quier assigurar más alhá?

Nó, nun bou por ende, cumo l poeta dezie
Quiero ber l´outro mirar, l´outra alegrie
L feturo reimbentado que you leio, si
Ne l mirar dun nino que joga sien miedo
Al ampeço de l´anho, al ampeço de la bida
Fazendo sou própio camino.

Teresa Almeida 31.12.2011

Páixaro d´ alas feridas II

2011-12-30T03:51:00.004Z

Páixaros que andais pulas nubres

dezi-me que tiempo stá ende!

Mui loinge ando you
i de tan acupada andar
nien me dá para eimaginar
que tiempo fazerá porende!

An bolos altos chubis

i you nien chego a sbolaciar!
Tengo ls pies presos ne l chano
i la cabeça a antrubiar.

Dezi-me se hai cinta

de la raposa a relhampar,
dezi-me se hai gotas d´ourbalho
cun que me puoda molhar.

Dezi-me s´ende haberá
ua nubre adonde me deitar
alba que nien roupa lhabada
a la berdura a abranquiar.
Tengo ua nubre tan scura
adonde nun sou capaç
nien de drumir nien çcansar.

Páixaros que bolais ne l cielo
lhebai-me pal pie de bós
que yá se me çqueciu l bolar!

28 de Dezembro de 1895

2011-12-29T00:22:00.000Z

Yá stou un cachico atrasado para assinalar l' efeméride, mas inda assí, bale la pena fazé-lo. A 28 de Dezembro de 1895, ls armanos Auguste i Louis Lumière amostrórun l cinematógrafo i l purmeiro filme ne l Grand Café, an Paris.

Ls armanos pensában que l cinema serie ua moda pouco duradoura. Feliçmiente nun tenien rezon.

Eiqui bos deixo l purmeiro filme de la Stória de l Cinema.

Suonhos

2011-12-28T22:36:00.002Z

(cuonta a cuncurso-3)

Sonhei que na pastelarie mais próssima de la mie casa stában a bender suonhos que trasmitian a quien ls comisse un super-poder, l poder de cuntribuir pa la melhorie de la bida an to l mundo.

Para esso, tenerie de scolher un de ls dous: ó suonhos de cenoura ó suonhos de bóbeda. Passo a splicar: a quien comisse suonhos de cenoura serien dados ls poderes para acabar cul zamprego, cula fame, cula delinquéncia, cula bioléncia, cula droga, …, cun todo l qu'hai de malo ne l mundo. A quien comisse ls suonhos de bóbeda, serien dados ls poderes para zambolber nas pessonas la paç, la justícia, l perdon, la bondade, la generosidade, la fraternidade, la sperança, l'alegrie …, cun todo l qu'hai de buono ne l mundo.

Pensei i refleti lhongamente (a sonhar), ne l tipo de suonho que deberie scolher i berifiquei que, se comisse suonhos de cenoura tenie mui que fazer para acabar cun todo l qu'hai de malo ne l mundo i anté cunsidrei qu'aqueilho que tenerie poder para fazer era l mais urgente ne l mundo, mais necessairo de l que zambolber nas pessonas todo l qu'hai de buono, se scolhisse ls suonhos de bóbeda.

Anterroguei-me, (cuntinando a sonhar):
- Mas será buono pa las pessonas acabar cun todo l qu'hai de malo ne l mundo?
- Haberie algua garantie de que las pessonas se sentissen mais felizes?
- Acabar cun to l tipo de malinas trarie felicidade a las pessonas?

Nesta lhonga reflexon (sonhando) lhembrei-me de pessonas que ténen todo aqueilho que se puode desear, na sue cultura i cuntesto social, i que son anfelizes. Pensei que nun ye l mui que tenemos que mos torna felizes, mas si l que fazemos cul que tenemos. Tamien pensei (sonhando) que nun ye l que mos acuntece que mos trai felicidade, mas la forma cumo acuntece.

Cuntinei a pensar sonhando, qu'acabar cun todo l qu'hai de malo ne l mundo podie tener balor pa la subrebibéncia, mas zambolbendo nas pessonas todo l qu'hai de buono ne l mundo ye que se alcançarie la melhor culidade de bida, i anterroguei-me outra beç, (cuntinando a sonhar):
- Será que ls dous tipos de suonhos seran necessairos pa l mundo?
- Será que ls dous tipos de suonhos cuntribuen pa l bien-star i la felicidade de las pessonas?

Depuis d'outra lhonga reflexon (sonhando) scolhi comer ls suonhos de bóbeda, culs poderes para zambolber nas pessonas la paç, la justícia, l perdon, la bondade, la generosidade, la fraternidade, la sperança, l'alegrie …, cun todo l qu'hai de buono ne l mundo.

I assi percurarei comer suonhos de bóbeda, por bós, por todos, para qu'hoije, manhana i siempre cuntine a ajudar a zambolber nas pessonas todo l qu'hai de buono ne l mundo.

Leonardo Antão

Díbedas

2011-12-27T17:13:00.000Z

Que Natal? Si, que Natal?

2011-12-26T23:25:00.001Z

Que Natal
Para ti, sin trabalho,
Para ti, sin casa,
Para ti, sin salude,
Para ti, rejeitado de ls cuncursos a amprego,
Para ti, marginalizado?

Que Natal
Para ti, sin lhei que te proteija,
Sin família que te caleça,
Sin Gobierno que t'olhe,
Sin naide que t'acuolhe?

Que Natal
Para ti, ampurrado pa la delinquéncia,
Pa la droga,
Pa l spital,
Pa la prison?

Que Natal? Si, que Natal?
Este que nós festejámos,
Que nós ambentamos,
Ye l tou, ye para ti?
Nó! Este Natal, nun ye l nuosso Natal.

Este Natal serie para ti,
para mi,
para todos,
se hoije,
manhana,
i siempre,
bibissemos la fraternidade,
l'alegrie,
la paç,
i la houmildade.

Alma de nino

2011-12-26T21:50:00.003Z

cuonta para cuncurso

Nun se soltan las palabras que gorgulhan ne l caldeiron de las mimórias. Stala l racho ressequido çtruindo-se nas chamas que l ban tragando. Lhiberta-se la calor que lo abrasa i an brasas se bai tornando. Cinza i pó lo spera. Neste acunchego de lhume an nuite de Natal, depuis de missa de l Galho, que galho yá nun canta an siléncios de madrugada porque galhos nun hai an capoeiras de aldé. La calor que me calece las manos, amolece l'alma i arrolha l coraçon, deixa-me seguir na biaige de mimórias. Meias grossas feitas por manos de fada deixan correr-te çcalço a pousar ne l murilho l çapatico. L murilho: palos yá nun seguraba i cinza muralhaba. L çapatico, las botas, que durante la nuite tenerien la bénçon de l Nino que dece pul chupon i algo trai para alhá deixar. Na einocéncia anterroga-se cumo haberie l nino decer? Chupon nun habie, solo lhares çpinduradas que segurában caldeira i que upa serie pa l Nino na decida. Mesmo assi, cumo antrarie, se las teilhas, poisadas an ripas i caibros i bigas einegrecidos, todo tapában? Habie buraquitos. Frinchas que deixában l bento i la lhuç passar. L filo de lhuç redondo adonde las poeiras beilában…era por ende, era por ende que l Nino Jasus antraba i apuis agarrado a las lhares podie decer até al murilho. Mas de nuite nun habie sol! Habie streilhas i lhunar i siempre daba para se agarrar a la lhuç que todo eilumina i ir de casa an casa para deixar l sou persente de Natal. Bou quedar a la spera. Bou bé-LO chegar i assi siempre dá para pedir l que you quejir. Nó! El solo ben quando stubires a drumir, nunca ben antes. Na sperança d'oubir sous passos no telhado a passar, ls uolhos quedában abiertos i oubidos çpertos mas nunca l bi chegar. L suonho chega purmeiro. Mas El tenie stado alhá. Tenie deixado pouco que era pouco l pouco que habie. L rastro de mimória einocente de nino que acradita: trés rebuçados. Solo! L nino Jasus astanho tubo que cumbidar muitos mais ninos i pa ls poder cumbidar a todos solo te deixou trés rebuçados a ti. Alma de nino que acradita na bondade de outro Nino que a todos cumbida i todos bigie. Este nino sabie que outros ninos habie que çapatos nun tenien pa l Nino Jasus pousar trés rebuçados.

Tradiçones (dadonde mos bénen!?)

2011-12-26T10:41:00.008Z

Jugo, forno, pan lhebe (pan de lhó) i polbo cun batatas

I ampeço mesmo porqui.

Dius tenga sue alma an paç, çcanso i an sue cumpanhie (porque yá mos deixou hai muito tiempo) quien fizo l jugo de l retrato que stá ambaixo, assi cumo todos i todas ls i las de l sou tiempo que fazien jugos, carros de las bacas mirandeses, canhiças, rastras, arados, puortas i portaladas, talhos i scanhos, cubas, fornos a lheinha, ne ls telares panhos para las mantas, las alforjas, sacos pa l grano, miotes, jiquetas i chambres, ne l forno de cozer, las fogaças, ls roscos, l pan lhebe (pan de lhó), sien spráncias nien fé de recebir un só teçton de naide.

Até l pior puodie acuntecer, era l produto de l sou sfuorço, ser pedido an décimas i licencias a las finanças.

Este jugo nun ye de bacas, tamien nun ye de béstias (machos ou burras) ye misto, l duonho (recebido de hardança, nunca se fai a çfazer del) lhougo que bir l retrato bai a conhecer-lo, ye miu amigo i cuido que nun me lhieba a mal fazer esta publicaçon, até porque ye respeitador i admirador de ls balores houmanos que mos chégan de ls nuossos antepassados.

Porque solo stá nas mies antençones dibulgar un património i un saber que tenien ls nuossos pais i pais-abós, saber esse que stá cheno de tecnologies para l tiempo, i assi bencir ls porblemas i atalancadeiros, bonda star atiento a las cousas i tener conhecimiento de la natureza i de ls questumes.

Tamien ye un fato que nesta temporada natalicía, quaije todo se mos afigura i peçque nada hai para alhá de la celebraçon de l nacimiento de l Nino Jasus, mas a miu ber nun ye bien assi, hai muita lhigaçon i ben al de riba tanta tradiçon i questumes que las gientes d’hoije ténen porque la trasmisson de l saber até eiqui chega, bonda pensar ne l polbo, no bacalhau, las fatilas paridas, ls bolhos i todo al que ponemos na mesa para quemer.

Bolbendo al jugo (misto), l dunho sabe que you andube por sue casa scando retratos. I spertou-me curjidade este jugo, puis retratos de jugos mirandeses tengo muitos, i fui por ser misto, i ber que l custrutor tubo la preocupaçon de çtribuir bien las fuorças, puis adonde bai a quedar l sobeio nun stá bien al meio, mas si pa l lhado adonde se bai ounhir la baça, seinhas de que la béstia que eiqui ponir l cachaço ten menos fuorça. Tamien adonde se pónen las cornales, ten dues hastes de palo, puis las béstias nun ténen cuornos (las de trabalho) i agarrar doutro modo.

Hoije yá nun se fázen jugos, destes, ye mui ralo ber ua junta de bacas, mista, par de béstias ou burras, yá stá quaije todo mecanizado, mas you tengo las mies dúbedas se ls mirandeses nun ténen outros jugos, por bentura bien piores. Mas ua cousa you sei i engo la certeza, dou-me cuonta quando por alhá ando, als mirandeses nunca les faltará ganas de mantener i guardar todos ls cunferrumes i demais outencílios, la mimória de l sou pobo cun denidade.

I porqui me quedo, deixo-bos retratos, un dua pieça para mi i ls de la mie geraçon tan conhecida, puis an mi casa muita beç i muitos anhos se fizo la sementeira cua junta mista, mas quien sabe para las geraçones mais nuobas nun seia ua pieça çconhecida, outro dun forno de fazer pan adonde mie mai cozie to las sumanas ua fornada, i cumo nun puodie deixar de ser un prato cua polbeira i un dun pan lhebe, quemido desta temporada, porque era tradiçon i que inda hoije se fai na maiorie de las casas.

(jugo, pieça an madeira bien trabalhada, que ten l oujetivo d’ounhir las bacas pa l trabalho ou outras béstias, forno de cozer, adonde se fazien las fogaças, polbeira que se mercaba seco i apius de cozido quedaba assi, pan lhebe, bolho feito cun farina i uobos, que inda hoije la mie tie pon muitas i muitas bezes a la mesa an special quando tenemos besitas)

"Pertual deceu a la foia"

2011-12-25T19:06:00.010Z

Un cachico de la antrebista que Eduardo Lourenço deu al Jornal Expresso-Rebista Atual
....

La sociadade tornou-se andiferente? La prática houmana ancuontrou drento deilha cada beç mais rezones para nun recorrer a esses oussílios, a essas refréncia de tipo trascendente. La cunfiança de ls homes ne l domínio de l sou própio çtino fui oumentando cada beç mais. La Eigreija quedou cumo ua refréncia eideal, i esso cuntribuiu para centrar la cuntradiçon antre las dues cousas. Nien sequiera hai cuncéncia de l'afastamiento. Hai andiferença.
Esso ye un bien ó un mal? L home ye ua rialidade relegiosa. L porblema ye que essa refréncia puoda aparecer cumo oubjeto, cumo se Dius fusse manipulador ó manipulable. Ua spece de ser magico de que todas las cousas dependen. Outra cousa ye ser algo de que l home se sirbe para dominar. La maiorie de las religiones son máçcaras dessa buntade de poder, de dominar ls outros, de ls subordinar, de ls houmildar. Aqueilho que ye l sou ampulso mais puro, lhibertador, trasforma-se ne l sou cuntrairo. L que la cristandade trouxe fui que Dius nun ye poder. Ye l nun-poder. Mas nun fui assi que la cousa fui traduzida. Pula purmeira beç, bibemos nun mundo al mesmo tiempo mais materialista ne l sentido antigo de l termo i mais birtual. La nobidade, agora, ye que la birtualidade ye mais amportante que la materialidade. Nesse capítulo, cuntina a ser un mundo houmano. Solo ls homes son capazes d'ambentar algo que nun eisiste.
…
Eduardo Lhourenço 88 anhos, un rapaç nacido nua remota aldé. Cumo ye que se mobimenta naqueilha que ye la sue aldé de l mundo? Solo hai aldés. Porque mesmo las pessonas que biben ne ls grandes meios scolhen siempre un canto que les sirbe d'aldé. L'aldé ye un cunjunto de casas. I ne l meio de las casas hai la casa. I nós solo percisamos de bibir nua casa. L porblema ye aqueilhes que saben esso i que nun ténen casa. Que la tubírun i deixórun de la tener. Ye un pouco l miu causo.

....

Em português

"Portugal desceu ao túmulo"

…
A sociedade tornou-se indiferente? A prática humana encontrou dentro dela cada vez mais razões para não recorrer a esses auxílios, a essas referências de tipo transcendente. A confiança dos homens no domínio do seu próprio destino foi aumentando cada vez mais. A Igreja ficou como uma referência ideal, e isso contribuiu para centrar a contradição entre as duas coisas. Nem sequer há consciência do afastamento. Há indiferença.
Isso é um bem ou um mal? O homem é uma realidade religiosa. O problema é que essa referência possa aparecer como objecto, como se Deus fosse manipulador ou manipulável. Uma espécie de ser magico de que todas as coisas dependem. Outra coisa é ser algo de que o homem se serve para dominar. A maioria das religiões são máscaras dessa vontade de poder, de dominar os outros, de os subordinar, de os humilhar. Aquilo que é o seu impulso mais puro, libertador, transforma-se no seu contrário. O que o cristianismo trouxe foi que Deus não é poder. É o não-poder. Mas não foi assim que a coisa foi traduzida. Pela primeira vez, vivemos num mundo ao mesmo tempo mais materialista no sentido antigo do termo e mais virtual. A novidade, agora, é que a virtualidade é mais importante que a materialidade. Nesse capítulo, continua a ser um mundo humano. Só os homens são capazes de inventar algo que não existe.
…
Eduardo Lourenço 88 anos, um rapaz nascido numa remota aldeia. Como é que se movimenta naquela que é a sua aldeia do mundo? Só há aldeias. Porque mesmo as pessoas que vivem nos grandes meios escolhem sempre um canto que lhes serve de aldeia. A aldeia é um conjunto de casas. E no meio das casas há a casa. E nós só precisamos de viver numa casa. O problema é aqueles que sabem isso e que não têm casa. Que a tiveram e deixaram de a ter. É um pouco o meu caso.

....

SENDIM

2011-12-25T09:50:00.005Z

FOGUEIRA DE NATAL
.

Mais un Natal i mais ua fogueira a cumpríren la tradiçon. Las pessonas pássan, mas las tradiçones ban quedando anquanto las geraçones se sucedíren ne l tiempo. Nin todo se mantén eigual, pus cada geraçon bai antroduzindo nuobos hábitos, nuobas eideias, mas l'eissencial cuntina.
Ye buono ber la fogueira i la praça eiluminadas culas quelores de l fuogo. Ye guapo para quien stá, mas tamien para quien bir este bídeo, que bai lhebar a cada sendinés de la diáspora, ua mensaige de suidade.
Para quien nunca stubo an Sendin na nuite de cunsoada, puode ber i sentir nel cumo son fuortes las tradiçones i cumo pul paíç se comemora l Natal.

L(s) TIEMPO(s)

2011-12-23T11:18:00.000Z

ANFORMAÇON AMPORTANTE PARA PORSORES I OUTROS SOBRANTES

i mui pouco até a arroç doce cun zeinhos feitos cun canela…

2011-12-22T22:20:00.007Z

Al telfone…

― Puis olha, Zabel, inda hai poucos dies, pensei que tubíssemos que poner cumpletamente de lhado l’eideia de ir a passar ende l Natal cun bós. Hai yá uns dies por acaso, l carro ampeçou a dar sinales que qualquiera cousa nun staba a funcionar normalmente i l mecánico acabou por mos anunciar que iba a ser neçairo mudar la caixa de belocidades. Mais ua despesa amportante an perspetiba que desta beç mos cumbenciu que l melhor era mudar de carro i nada mais. Mas yá faltában mui poucos dies antes de l Natal i até mos pareciu ampossible cunseguir comprar outro nun prazo tan cúrtio… Mas olha, afinal cunseguimos i depuis de manhana, se todo correr bien, ende staremos todos reunidos depuis de tantos meses sien mos bermos.
― Ancrible, Joana ! Mesmo que tu yá me tubisses anformado, nestes dies, eimagina que you, esta manhana cedo, sonhei que habiedes cunseguido ancuntrar ua soluçon assi i todo. Afinal ye l que stá a acuntecer !
― Ye de sperar que si, Zabel, cumo nós todos deseamos. Por esso tamien te querie dezir que bamos a lhebar ua cousa que tu gustas para comermos juntos na cunsuada mas que quaije nun s’ancontra ende an Pertual : ostras, Zabel !
― Que marabilha, Joana. Hai yá un par d’anhos que nun como ostras !
― Será anton un de ls pratos mais franceses de l jantar. Ostras que bundará abrir un pouco antes…
― Puis, porque cumo yá sabes haberá tamien l que aqui se come tradicionalmente nesta altura de l anho.
― Yá sei que bai a star todo mui buono. I defrente afinal, mui defrente até, dun Natal francés. Só tengo pena de nun bos tener podido ajudar a purparar todo uns dies antes cumo habie pensado fazer einicialmente.
― Nun te preocupes, Joana ! Bai todo a correr bien.
― Mas ajudo-bos a fazer todo l que fur preciso ne l die de Natal. Si ye berdade que bai haber chicha assada ?
― Chicha assada i outras cousas... Mas chicha nun falta. Fazimos ls chouriços esta sumana !
― Ancrible ! Sodes mesmo balientes ! Ten que correr todo bien anton para mos bermos i starmos todos juntos este Natal. Un beiso para ti Zabel i un grande abraço para todos.
― Para bós tamien, Joana. Que todo bos cuorra bien i ua buona, mui buona biage !

… i aqui stou you a transcrebir este pequeinho diálogo. Ye berdade que daqui a solo dous dies bai mesmo a ser l Natal… Mas inda acá stou you nua tierra adonde inda nun me chega l cheiro a fumeiro i a lhume i mui pouco tamien a polbo, a bacalhau, a rabanadas i até a arroç doce cun zeinhos feitos cun canela…

LA MELHOR PRENDA DE NATAL

2011-12-22T09:41:00.005Z

LA MELHOR PRENDA DE NATAL

Toca l telifone, era Miguel. La mai atende i oube de supeton:
- Joana stá prenhada!
- Mas quien!? La brasileira?
- Si.
- Mas sós tu l pai?
- Claro.
- Tenes la certeza?
- Tengo, anton!
- Nun quiero que nada le falte, liga-le a tou armano para que le marque yá ua cunsulta adonde andubo la mulher del.
Ligou-le al armano i este i la mulhier lhougo le tratórun de todo. Cumo Miguel staba desampregado, lhougo se pronteficórun a pagar la cunsulta.
La cunhada de Miguel lhigou pal suogro toda cuntenta. L sou filho yá iba a tener un primo!
- Stá todo cuntento, cun mais un nieto.
- Bó, nun me digas que bás a tener outro?
- Nó, ye Miguel!
- Stás a gozar!
- Nun me diga que inda nun sabe!
- Nun sei l quei?
- Joana, la que stá cun Miguel. Nun dezie que nieto ye siempre nieto i las mais, se son mais, son todas buonas. Nun me diga que nun quedou cuntento!?
- Tu trocabas l tou filho pul euromelhones?
- Nunca na bida.
- Pus tamien nun trocaba este nino pula lotarie de Natal.
Ne l die seguinte, ls pais de Miguel fúrun a ber Joana. Era la purmeira beç que iban alhá. Miguel nunca le falara nada de la sue bida. Chegados al andar, Joana speraba-los a la puorta, antrórun i apresenta-le un rapaç de ls sous 23 anhos:
- Miu armano, diç Joana. I este, ten diç anhos, miu filho.
Las mulheres trátan de falar de l nino que iba a nacer i l pai de Miguel fala culs rapazes.
L mais bilho desampregado cumo Miguel, l pequeinho habie benido quando Joana ampeçou a bibir cun Miguel. Ne l Brasil ralamente iba a scuola, eiqui bino pal terceiro anho i este anho anda ne l quarto.

- Teneis que ir a mie casa, agora teneis outra familhia.
Un nino bino pul Natal! Trouxo ua nuoba spráncia de bida melhor a todos, fui la melhor prenda de Natal.

Nota:
Esta cunta ye berdadeira, acunteciu este Natal. Será que bal para l cuncurso!?
Nun fui corregida, fui screbida tal cumo la iban cuntando.

Para haber un mundo melhor, solo praticando i nó falando.
Cumo dizen ls eibangeilhos:
“Puls fruitos ls conhecereis”
Feliç Natal para todos…

L rabico

2011-12-22T08:34:00.004Z

Cuonta para cuncurso(3)

L rabico

You sabie que benie de riba, mas nun era de l pólo norte, loinge staba you até d’eiumaginar que habie un sítio adonde ls nebones durában l anho anteiro.

I tamien sabie que benie d’Alcanhiças ou de Mobeiros, isso a mi nun se me scapaba, puis oubie mi mai anquemendar a la nuossa bezina tie Adília uns meses antes de l Natal que querie ua buona polbeira cumo ls outros anhos.

I era assi to ls anhos, smirrado, que nien palhas dun restroilho, botando ls uito rabos cumo se fúran greinhas, mui ouloroso a modos de quien nun bie pinga d’auga hai muito tiempo, cumo se stubíra ancarcerado ou passado nun zerto, sabendo you que l pior que habie passado era la raia seca pur Samartino ou l Cabeço de la Lhuç, nua nuite scura i frie, puis la nuossa bezina cuntrabandista era siempre nestes sítios i nuites que fazie las sues idas i benidas a Spanha.

Nunca antendi muitas cousas, i ua deilhas era esta dependéncia, esta serbentie que teniemos de l lhado d’alhá de la raia, las alparagatas, la pana, ls garfos de quemer, las pechorras, i cantaras de barro, las fouces, lhatas de scabeche, quantas bezes até las tortas (pan), l polbo pul Natal, nunca antendi bien porque éramos tan probezicos i ls nuossos armanos tan ricos! Mas esso son outras cuontas que nun cáben ne l Natal.

Mas las cunsumiçones nun se quédan porqui, tamien l polbo me daba i dá cobradeiros de cabeça, esse smirrado, oulourento, aburmelhado, que passaba uns tiempo a las scuras de quarentena na spensa por bias de miedo de ne ls redadeiros dies nun haber, de quien you birei zed pequeinho admirador i assi quedei pula bida afuora, inda hoije ye de las cousas que gusto muito, seia el purparado de l modo que fur, porquei apuis de mie mai l meter ne l pote i tomaba la calentura de l lhume, anchaba i quedaba taludo a modo de se botar fuora!?

Passadas que éran estas cunsumiçones, digo-bos siempre adorei esta ceia de cunsoada, i quemer l rabico de l polbo, cun patatas que tomában la quelor de bino benidas de la cozedura, i regadas cun azeite mercado als azeiteiros que benien pulas puortas i éran de ls lhados d’Argozelo i Carçon, puis nesse tiempo ne l termo de Zenízio nun habie oulibeiras.

Nunca me fui pormetido nanhua prenda trazida pul pai natal, mas sien pormessa, ls mius pais que nunca mos faltórun cun esta baliente ceia de polbo, que para nós, se calha porque to l anho quemiemos chicha i caldo, yá andabamos un cachico anfastiados i poucas serien las bezes que mos passaba outra cousa pulas gorjas, esta cena de polbo era un manjar de ls diuses.

L Natal para quien fui nino na década de cinquenta sessenta de l seclo datrás, era marcado pulas farturas que trazien, era marcado pul que se quemie ou bestie puis nuossas mais fazien proua an mos ampimponar nas temporadas festiba, porque l restro de l anho nun éran todos que se puodien dar al luxo fazer essa bida, las pribaçones de las lhambisquiçes era regla ampuosta pula necidade, arrebanhar l caçuolo, limpar l prato cun cacho de pan, aporbeitar las códias, éran l pan nuosso de cada die de la maiorie de nós.

Cuido que solo tenie ua birtude, era que todo este quemido sabie bien era mui gustoso, porque nun se quemie siempre ou porque teniemos mais ganas, tradiçon ou nó, puis para alhá de la calor benida dun bun cepo que ardie ambaixo la chamineia, habie la calor houmano que ambolbie i anchie la cozinha, mais que l oupor que oupie de l prato culas patatas i la polbeira a ferber.

Inda hoije ye de las cousas que me fai mais falta, ua família numerosa cumo naquel tiempo, puis inda tube mie bó Felisbina, de las saias, cun nós, mais mie mai, miu pai, dous armanos i ua armana, porque auga na boca inda tengo quando me lhembro dessas nuites i de la pratada que benie para la mesa.

Nun cuido que seia un lhambisqueiro, se l fusse por un bun prato de polbo cumo se fai an trás ls montes, an special nas tierras mirandesas, anton habie pur ende muita buona giente cun esta nomeada.

La paç pula música

2011-12-22T01:10:00.000Z

Calhando nun bos fintais, mas yá uns dous Natales que andaba para poner este scrito, mas nun era capaç de chubir l bídeo... peç-me que agora yá dei ne l gato.

Esta ye talbeç la grabaçon más coincida de l porjeto "Playing for Change", la paç pula música, para armanar ls homes de l mundo anteiro pula música. Cumo mos bamos arrumando al Natal, nun me parece mal - buono, ye ua eideia que nunca parece mal - i la cantiga i ls músicos son formidables, de maneira que eiqui queda.

Indas que, a bien dezir, esta grabaçon tenga ua falta, i que nun ye nada pequeinha: falta-le ende pul meio, cumo tal, miu Abílio Topa a antrar i a botá-le ua gaitada de riba de l cabeço de la Trindade. Topa ó outros desse donairo, graças a Dius, hai-los cada beç más i más derrramados. Anton si quedaba la cousa cumpleta i bien amanhada!

I, más a más, quien sabe alhá se este "Stand by Me" nun ye la Lhéngua Mirandesa que mos lo canta a nós - cumo ye Natal puode-mos dar assi pal santimiento! -, de maneira que nun hai que fazer oureilhas moucas.

Las Buonas Fiestas de l Senhor Persidente

2011-12-22T00:56:00.000Z

Mensaige de Natal de 2011

Mensaige de Natal de 2010

Soutrodie oubi la mensaige de Buonas Fiestas de l persidente de la República i quedei tan ampressionado, mas tan ampressionado, que pensei lhougo que habie eilhi matéria para ua tese an Ciéncias de la Quemunicaçon. Ó nesso ó an Psicopatologie.

Tengo ua cousa a dezir a todos ls detratores de Cabaco Silba: nó, l persidente nun fizo “copy paste” de l çcurso de l'anho passado. Pul cuntrairo, eisisten tantas melhories, que nin sei por adonde ampeçar.

Solo para tenéren ua eideia, l çcurso de 2010 ampeçaba assi: “Deseamos a todos ls pertueses un feliç Natal i un buono Anho Nuobo. L Natal ye la fiesta de la familie”. Yá an 2011, ampeça de un modo cumpletamiente defrente: “l Natal ye la fiesta de la família”. Ende stá! L home nun se lhemitou a fazer “copy, paste”, fizo “copy, paste, delete”. Ls que l acusan de star siempre ne l facebook, squecen-se de que el yá sabe mexer ne l Word.

Mas tamien hai melhories ne l domínio de la lhenguaige i de las técnicas cinematográficas. Reparai: l anho atrasado l home dixe lhougo a que iba, quedamos lhougo a saber que mos deseaba Buono Natal i Buono Anho Nuobo. Astanho l home cria suspense. Será que l senhor Silba i la senhora sue tie mos deseian Buono Natal i buono 2012? Se quejirmos saber, bamos tener que oubir todo até al fin… Quien ye que andou a ber muitos filmes de Hitchcock, quien foi?

L cenairo stá mais probe, stamos de acuordo. I astanho, culs cortes de l Biegas ne l setor de l cinema, nin sequiera hai denheiro para fazer zooms. An 2010 filmórun nua sala de l Palácio de Belén, chena de luzes, quelor i Arbles de Natal. An 2011 filmórun na marquise de l casal Silba, junto a un presépio modesto, que nun ten sequiera ls reis magos. I este pormenor nun ye çpiciendo. Ye que qualquiera pertués cun buono senso sabe que nun debe deixar antrar un Gaspar an casa.

La direçon de atores ye outro aspeto a salientar. Ambora l Aníbal i la Marie passen muito tiempo a ler l telepuonto sin grande spressebidade, hai pequeinhas bariaçones de spresson, mui subtis, quaije ampercetibles, mas dignas de registar. Reparai ne l mobimiento de l cachaço de Marie, cheno de xarme i de swing. Quando l persidente acaba de dezir “ye na familie que podemos ancuontrar ls afetos que mos dan fuorça”, eilha mira para el, cun proua de l sou home, que le dá muitos afetos, muita fuorça i l'ampede de bibir solo cula reforma de 800 ouros.

L persidente cuntina, amostrando las melhories na capacidade de síntese. Anquanto an 2010 falou pa ls que sofren “de l drama de l zamprego, de la malina, de la solidon”, astanho falou na “crise”. Ende stá, la palabra “crise” resume todo, podemos abançar, qu'este assunto stá çpachado.

Chega la beç de la Purmeira-Dama falar. Ls cínicos speran que Cabaco la cuntemple cun admiraçon, cumo eilha fizo antes. Mas el, solo para mos surprender, mira-la de lhado quando eilha diç “partilha”. Bé-se claramente l pensamiento “stá bien, filha! Falas an partilhar, mas quien traç mais denheiro para casa ye eiqui l Aníbal”.

I ye percisamente Marie Cabaco Silba, na sue grácia femenina, que çfaç parte de l suspense criado ne l ampeço de l bídeo: “deseamos a todos un feliç Natal”. “Anton i un buono Anho Nuobo, nun mos deseian un bouno Anho Nuobo?”, pregunta l spetador, anquieto. I l buono persidente dissipa lhougo las dúbedas reforçando que mos deseia “un anho 2012 tan buono quanto possible”.

Todo stá bien quando acaba bien! Quedámos cuntentos, ambebecidos cul sorriso de la Purmeira-Dama, sclarecidos cul brilhantismo de l senhor persidente i surprendidos cula bofetada de lhuba branca a todos ls que acusan Cabaco de falta de ouriginalidade. Falta de ouriginalidade ténen ls que se lhemitan a desear buono Natal i buono 2012. Mas quantos se lhembran de dezir “tan buno quanto possible”? Quantos?

I pronto, foi la mie análese. Deseio-bos a todos un buono Natal i un buono Anho Nuobo. Ó pul menos, que seian tan bounos quanto possible.

Hai paç an tues antranhas!

2011-12-21T22:50:00.004Z

naide te diç
naide te fala.
Percisas dezir
percisas falar...,
scatrapulha te l silénço
cumo se las palabras nun te falássen.
Dues buoltas a l'aliança, miras te de dentro
i nun sabes l que dezir.
Son mafarricos teus pensares que se rebuolben:
l que dezir? Nun digas nada. Queda-te an silénço. Mas nun te sossega l remolino de lhuzicas a piçcar na mioleira. Fálas-te. Dizes-te an silénço, mirando la pantalha i oubes las ruodras dos carros a ruodrar na rue i l lhadrar de l perro. Yá chega de baboseiras. Calha-te, calha-te, assossega-te i bai te drumir. Bou drumir. L formigueiro, l remolino...que cousa quando un se queda solico an casa. Toca l telifone: yé para me ires bescar a las onze i cinco a corroios. Assossegueste. Hai paç an tues antranhas.
ac
21Dez11

Un teçtonico pa l nino Jasus (2)

2011-12-21T11:29:00.001Z

Cuonta para l Cuncurso

Un teçtonico pa l nino Jasus(2)

Zbalidos mas zirros, ls raticos, era assi que éran conhecidos, ua família de feirantes, festeiros, arraialistas.

Ls mais de bós, lhougo que oubistes falar de raticos cuidestes que ende benie mais ua fábula, que se trataba de falar de ls pequeinhos bechicos robidores, que se dan bien adonde haba ferranha, batatas, lhatas cun garbanços, huortas cun lheiras i tulhas de grano.

Mas se a esta família, sien eira nien beira, l pobo le botou esta nomeada, fui porque ls acumparou, i nun fui por acauso, l pobo nisto ye eisato, nunca s’anganha, fai siempre las cousas bien, até ye questume dezir, se l fizo alhá ancuntrou las sues rezones.

Eilhes éran cumo ls raticos de l campo, nun s’íba a feira, fiesta ou arraial adonde queilhes zbalidos nun stubissen, gozában la fiesta cumo naide, l die de manha nun staba nas sues cuntas, dunhos dua lhibardade que até metie ambieja, nun fusse la outra parte, tal qual raticos ne l campo. Amperrunhadicos, mielgos de figura, éran ua catrefa deilhes, até peçque habien benido al mundo todos na mesma nialada, na cara, se dúbedas habisse, staba bien strilhada las afrícas que passában to ls dies por estas ruas, terreiros, tourales i caminos de l praino.

Sue mai, de pelo negro atado cumo rabo de mula, bestisse cumo cigana, ouferecendo ls sous serbícios, para ler, ber i adebinar na palma de la mano l feturo de ls outros, ne ls aires deilha, fartas fertunas stában siempre prontas a aparecer ne l die de manhana, de amores anchie un celeiro porque esses stában ciertos i mesmo que fussen trocados puls falsos eilha nun cobraba nadica. Era de la bida de ls de mais, de la sina de ls outros, porque de la sue, nun era perciso bruxo nien bruxa, peçque era conhecida de to l mundo, ls filhos habie-los botado al mundo sabe-se alhá cumo, agora que nien pita porteje-los de to ls peligros, que éran tantos, menos desta cundiçon de bida, de las faltas, de las misérias, de ls atrasos de la bida.

Spiertos, zirros que nien raposicos, furában por todo quanto era sítio, nun habie maleita bastante que ls adominasse, quijo Dius pula cierta cumpensar-los de nunca tenéren nada de sou, nien spráncia un die benir a tener por hardança, puis nun sabien quien era l pai, que ye la mais de las bezes donde ben algun bien de raiç.
Naide dá fé d’algun die ls haber bisto nua scuola, a daprender a ler,screbir i cuntar, tamien nun tenerie sue mai tino que bonde para ls matricular, eilha cumo muitas, siempre cuidou que esso nun era amportante para se ganhar la bida, pedir ua croua, rascanho ou cachico de marrana sabien fazer-lo de boca, screbir cartas al pai-natal tamien nun staba na moda.

Para aqueilhes rapazicos pouco amportaba la figura de l pai-natal, l que le íba cuntando pur esses natales todos tamien nun éran las nomeadas, mas si ls teçtonicos que íban recebindo de puorta an puorta de to l mundo.

“Pula buossa almica, dai-me un teçtonito pa l nino Jasus”

Será que algue mudou?

2011-12-21T11:11:00.002Z

Se dúbedas habisse que ls tiempos mudórun, cul que bemos i scuitamos to ls dies, las dúbedas quedán bien salagres, bonda star listo a todo, fazer ua refleçon subre l tiempo dantes i d’agora, mas nun sei adonde stan las demudas.

Mas será que algue mudou i qual fúran las demudas!?

Stabamos ne la fin de berano de l anho de mil nuobecientos i sessenta i cinco de l seclo datrás, staba ua tarde soalheira, de l més de Setembre, ls dies amorrínhan mais debrebe, las nuites quédan mais fries i maiores. L miu armano mais bielho que staba de besita, habie-me cumbidado a scapar-me cun el para las Astúrias, cun permisson de pai, a la purmanhana dixo-me an segredo, ye hoije, bas a bestir dous pares de calças, dues camisas i botas la jaqueta puls ombros, na cerrona l menos possible, nun fagas causo de mai que te quier poner de quemer para ua sumana, naide puode al loinge suspeitar que bamos de beç.

Tiremos a caras a la Pincha, ls Chanos, Senhora de l Picon, ende yá cul Cabeço de la Lhuç a la bista, yá sol çpuosto, zbiemos-mos de giente i poboaçones, cun madrugada alta cheguemos a Mobeiros, you lhougo que l sol deixou d’alumiar, l clareio de las streilha nun fui capaç de saber l camino, sabie si que fúrun muitas horas d’andadura, muitos carreirones, saltei paredes, chubi la sierra i benci outibales.

Para trás habie quedado l miu termo, l de la Pruoba i de Custantin, l acunchego de la mie casa, muitos anhos de pastor i de buieiro, muitas lhabutas, muitos anhos a guardar bacas i canhonas, dando las upas que éran possible als mius.

Ambaixo de la sacada dua Eigreijica ende mos quedemos, anroscado na jiqueta tenteba bencir la friura de las laijes atamar ls pensamentos de miedo, ganhar esta abentura nun mundo çconhecido, era assi la purmeira nuite que drumie fuora de l miu paiç, nun fuora de casa, porque cun essa eidade yá nun tenien cuontas las bezes que habie drumido cul ganado pul termo, mas era si ua nuite a resjistrar para l’eiternidade, mui armano quando biu que l camino staba lhibre de carabineiros, agarremos la carreira até Çamora i apuis l camboio até Oubiedo.

You staba fugindo, fugie por montes i balhes de nun ser bisto i caçado pula Guarda Fiscal, de ls bufos, de la pide an pertual, de la Guardia Cibil, de ls Carbineiros an Spanha, dua bida probe sien bistas dun feturo melhor, dua tierra que nun daba pan, ouprimida, sien lhibardade, sien cundiçones de daprender i ser home realizado. Querien-me eiqui, que nun me scapasse, porque era rapaç i serie pula cierta un bun çfensor de la pátria (habie la guerra colonial).

Amouchado, fugindo als oulhares i a las scundidas de las outoridades de Spanha assi fiç al camino i andei muito tiempo, nas muntanhas de las Astúrias abrindo galatons, para meter ls filos de l’eiletridade, porque mesmo sendo pastor, tenendo mudado muitas canhiças i cabanhas, tamien sabie l que era un biendo porque tirar l stierco de las loijas, sabie l que era ua patarra i un çadon, porque scababa las huortas i las guinchas de tratar las binhas, yá tenie fuorça ne ls braços.

Sien formaçon para antender porque habie caído nesta bida de fugido i apartado de la mie casa i paiç, sabie que nun tenie ls mesmos direitos porqui porque nun era dacá, mas sabie que tenie l dreito a fazer todo esso adonde naci, mas nun puodie, era na berdade un ampuntado pulas cundiçones de miséria.

Sien legalidade, nien spráncias de l ser, ls cunsolados (uorganos oufeciales de l nuossos paiç spargidos pul mundo) andában a cata i tenien orden para mos agarrar i debolber a la raia.

Cumo son las cousas, i se dúbedas habiesse que ls tiempos mudórun, eilhas stan bien salagres, hoije nun me scunderie. Bien al robés, starie a las bistas de toda la giente na praça central d’Alcanhiças,de Mobeiros ou outra qualquiera, mirando i zafiando las outoridades oufeciales a dezir-le que ende staba you, cul acuordo i cunceilho de ls de l miu paiç.

Nun ye bien la mesma cousa, a puis nó, porque hai bários modo de cumbidar un a salir dacá, só que uns son chenos de mesuras outros ye cun punta pie ne l culo, mas son todos porque l oulor ye malo.

Mas tamien la tristeza d’abandonar al nuosso sítio, casa, família, paíç duole de l mesmo modo, apierta l coraçon, anubra l’alma, seia-se pastor ou buieiro, xartre ou çapateiro, anfermeiro ou porsor.

I diç muita giente, i you sei que ye berdade, duol tanto nun ser realidado, poder fazer, dar l que se sabe, ne l nuosso sítio todo aqueilho que tenemos para dar.

Ye pula manhana…

2011-12-20T10:58:00.004Z

Ye cedo, pula manhana
que me chega la lhuç sien aranheiras,
l aire sien polagueiras,
ls sonidos sien zgrácias trazidas de l mundo.
Ye pula manhana que me dou screbindo,
sien que se me lhembre que bibo
ne l meio dun pulburino,
nobidades que muita beç nien cumprendo.
Que denheiros,
qu´ antresses fázen ir de cachafun ls pobos,
las naciones;
que credos, que religiones,
lhieban a matar sien tino?
Ye cun este torpor de la manhana,
quando inda nien quaije spertei
palas rialidades deste mundo
que melhor me dou nas palabras,
anquanto las notícias
inda las sinto ancarambinadas
pula gilada de la nuite.
Apuis,
quando alguien me dá ne l boton de la telbison,
chega-me un Natal a cheirar a anjustícias i a fome,
a muortes por un saco de ouro que há-de ser mercado
por quien cun el bebe l sangre de l´armano.
Ye pula manhana que l sol m´ entra stremunhado,
mas que debrebe bai a beisar relhamposo,
l coubal
para bibir sien crise esta Natal,
puis la tierra acarinada
nun sinte la crise de ls mercados.
Ye pula manhana
que melhor ls paixaros me cántan
ne l boucin de casa
an ourquestras afinadas,
foutos,
nun fugírun al friu de l´eimbierno,
nien deséian mais de que aqueilhas sementicas
que fúrun sobrando de l berano,
ó que, sembradas,
nun passórun de grano.
Muito ten a daprender l´ houmanidade
cun estes paixaricos que me cántan pula manhana
ne l boucin de mie casa!...
Nunca se fártan ls homes!
Nun haberie crise
cun estes paixaricos
qu´agora beio pousados, a scabar,
antre las yerbicas cargadas de gilada.
Ye pula manhana…

Sodade, sodade...

2011-12-20T02:42:00.007Z

Nun bou a dezir grande cousa subre Cesária Évora…

Mas quando penso neilha, ben-me lhougo l refran : « Sodade, sodade, dess nha terra São Nicolau… » i la música ritmada mas melancólica, triste até que acumpanha essa cançon.

Chega-me tamien l’eimage deilha a cantar al bibo, çcalça cumo questumaba fazer l mais de las bezes, nun palco an Paris, un anho an que l salon d’Expolangues fui cunsagrado a la lhéngua pertuesa. Fui eilha anton que fui chamada i scolhida na altura cumo ua de las representantes mais amportantes de la lusofonie, na música i na cançon. La sala staba chena de giente i até hoije - hai yá mais de quinze anhos - nunca se me squecírun comentairos feitos, ne l fin de l spetaclo, al lhado dun grande baso cun crabos burmeilhos, por franceses que çcubrien essa cantora pula primeira beç : habien quedado ancantados… i you tamien !

Tamien me lhembro de reportaiges, na telbison, aqui an França…. Eimages de tierras secas i áridas l mais de las bezes adonde nun chube an ciertos sítios i ilhas durante anhos i adonde la bida ye todos ls dies un berdadeiro milagre… cumo tamien finalmente la música i la poesie simpres mas einesquecible que habie na boç i pula cierta tamien ne l coraçon de Cesária Évora…

Quem mostra' bo
Ess caminho longe ?
Quem mostra' bo
Ess caminho longe

Ess caminho
Pa São Tomé

Sodade sodade
Sodade
Dess nha terra Sao Nicolau

Si bô 'screvê' me
'M ta 'screvê be
Si bô 'squecê me
'M ta 'squecê be

Até dia
Qui bô voltá

Sodade sodade
Sodade
Dess nha terra São Nicolau

La catequese que tenemos que fazer

2011-12-19T15:57:00.002Z

Cuonta para cuncurso (2)

Ls tiempos son outros, naide ten dúbedas, son tiempos modernos, defrentes daqueilhes an que you fui nino, mas cuido que na cabeça de ls ninos d’agora, nun hoube assi tantas demudas.

You cuido que cula eidade de l miu nieto, ten agora un anho i tal, cumpletará dous ne l próssimo berano, que yá nun tenien cuonta las bezes que mie mai i miu pai m’habie lhebado a l’Eigreija, se era buono ir ou nó nun stá an queston, la mai de l miu nieto s’algua beç l lhebou, a ber algua fui por acauso, muito menos a missa.

Tamien diga-se la berdade, habie de ser buono, star quedo i assossegado, guardar siléncio nesse lhugar, serie mais la cunsumisson que l porbeito, i stragaba la de ls outros, puis nun ye rapaç para se quedar quedo muito tiempo ne l mesmo lhugar i a oubir la mesma cousa, a nun ser quando bota ua buona sonada, i ende puode un cura botar prática a siete bozes ou passar un camboio a pie del, quel nun dá por eilha, nun sperta.

Mas dezie you, you dado l modo de pensar de ls mius i la bida que tenien, pula cierta yá era fragués cierto, i cuido que nun me fizo mal nanhun, nun debe tener sido por esso que me quedei un fraca figura, nien anrezinado i malo de feitiu.

Astanho stá nas mies cuontas, porque el yá ten mirar para todo, a fazer fé ne ls modo cumo oubserba las eimaiges de ls lhibros, de la telbison, de ls caramonicos ne ls sotos de brinquedos, cun anterder mais spabilado, an lhebar-lo a besitar ls persépios, an special, l de l’Eigreija de Nuossa Senhora da Graça an Corroios, puis ten siempre un persépio bien amanhado i s’habir bagar outros adonde stéian to ls simblos desta quadra natalícia.

A miu ber, ne l mundo de ls ninos tamien ten que antrar este mundo de suonhos i fantazie, l persépio, l Nino Jasus, sue mai, sou pai, na sue cabecica an formaçon todo ye amportante, las lhuzes queloridas, l sou piçcar, las baquitas, l burrico, ls me-més, l au-au-au a pie de l pastor, ls tius Magos, ye berdade que para un nino todos ls dies ténen que ser Natal, nunca haberá perdon para naide se assi nun fur.

Mas pribar-los de ber i conhecer l sprito desta quadra nun será cierto, se ne l feturo nun fur assi i seguíren outra direcion, será porblema deilhes, agora l mundo de l pai-natal nun puode ser eignorado, nien tan pouco ser só un home de barbas claras i lhargas bestido cun capote i un gorro de burmeilho carregando un grande saco culas prendas mais caras que habie ne l comércio de la baixa de la capital.

L papel de ls pais i pai-abós nun puode quedar-se por arrolhar ls sous nietos quando ténen ls denticos a salir, nien só poner la mano an baixo quando quieren fázen ls tenténs (ls purmeiros passicos) i s’amedróncan quando se chímpan ou dar ua upa nas cuntas para mercar l melhor canastrico, botar mano de la caneta i meter ne l mealheiro mais un pouco, l papel de ls pai-abós ten que ir para mais loinge, ténen que fazer la catequese, para queilhes fágan la defrença, para que manhana nun seian uns cifrones apagado, ls batotas de la sociadade.

Hai an todos nós ua hardança deixada puls nuossos antepassados, un património que mos ben de las nuossas ouriges, seia eilha religiosa, houmana, lhiteraira, patrimonial que ten que cuntinar, fazer camino ne l sentido d’aperfeiçoar i armanada an balores, para que l feturo seia mais justo, mais houmilde, menos eiguista. Cuido ser tamien esta la grande mensaige que mos deixa l símble de la comemoraçon de l nacimiento de l Nino Jasus pul Natal para toda l’houmanidade, ye ende que mos debemos ampenhar, i quanto mais temprano melhor.

L mundo de ls ninos stá nas nuossa manos (de ls crecidos) será melhor quanto melhor fur l nuosso ampeinho, quanto mais mos antregar-mos a esta lhabuta que ye eiducar i ansinar. La quadra natalícia, siempre fui, zde ls tiempos de mius pais i pai-abós ua buona temporada para dar i recebir, para alhebantar l sprito, refazer la spráncia, eibocar i lhembrar la sagrada família.

Adonde moramos nun hai galhos para cantaren a meia nuite, até porque pa l miu nieto agora son todos pius-pius, séian eilhes, palombas, pardales ou gaibotas que porqui essa spece hai-los que até apéstan que era cfícele el nun ls conhecer, mas garanto-bos l you, un die el há de saber cumo éran las missas de l galho na mie tierra, cumo las bibí i cumo inda hoije nun las squeci.

Mas essas cuontas quédan para mais tarde, you apuis digo-bos-lo.

SENDIN

2011-12-19T13:58:00.001Z

.
SIEN COMENTAIROS

SERÁ QUE DIUS EISISTE

2011-12-19T10:54:00.004Z

CUONTA PARA CUNCURSO

SERÁ QUE DIUS EISISTE

L cielo staba por aqueilhas nuites mais relhuziente que nunca, éran carreiras i carreiras de Renas puxando ls pais Natales carregados de presentes, las streilhas essas almiában

las Renas para eilhas nun s´anganhar ne ls caminos, ó carreirones que tenien que ancuntrar para chegar a horas al sitio cierto, adonde ls habien feito ls pedidos cun tanto amor i tanta fé.

Puis l amor esse ye la celeste atraçon de las almas.

Ye l mirar de Dius subre las criaturas,i subre ls mundos.

Nun se puode cunfundir, porém, cun tal nome, la ardiente paixon que atiça ls deseios carnales.

Esta nun passa d´ua eimaige, ó d´ua grosseira falsificaçon d´amor.

L amor ye l sintimiento suprior an que se funden i se harmonizan todas las qualidades de l coraçon.

Ye l coronamiento de todas las birtudes houmanas de la doçura, de la caridade i de la bundade.

Ye la manifestaçon na alma de ua fuorça que mos lhebanta arriba de la matéria até las alturas dibinas, ounindo todos ls seres e spertando an nós la felicidade berdadeira.

Amar ye sintir-se bibier an todos i por todos.

Ye cunsagrar-se al sacrifício, até la muorte, an benefício d´ua causa nobre ó d´un ser.

Se quejirmos saber l que ye amar, debemos lhembrar de ls grandes bultios de la houmanidade i, arriba de todos eilhes, de Cristo, para quien l amor resumie toda la lhei de Dius.

Alén disso, nun dixe El: Amai ls buossos einimigos?

Por essas palabras, Jasus nun pretendiu eisigir-mos ua afeiçon que mos fusse ampossíble.

Sue ourientaçon pretendie, sien, sugerir-mos la ousência de l ódio, de todo l deseio de bingança.

Almiaba l Cristo que mos spusissemos sinceramente a ajudar nels mumentos necessários mesmo aqueilhes que mos prejudican i firen, ouferecendo-les todo l oussílio que mos seia possíble.

Nun se puode progredir eisoladamente.

Por isso, ye preciso cumbibier cu las pessonas, bendo-las cumo presenças necessárias a la nuossa eiboluçon.

Deixemos que nuossos coraçones se abran.

Precisamos ourgentemente zambuolber la capacidade d´amar i de permitir que seiamos amados.

Nuossa simpatie debe atingir a todos ls que mos rodeian.

Principal atençon deberimos dar als nuossos pais.

Eilhes que mos mantubirun durante la nuossa anfância, mos acalantórun i mos calcirun i mos ansinórun las cousas de la bida.

Belórun cun ansiedade nuossos purmeiros passos i las nuossas purmeiras delores.

L amor, profundo cumo l mar, anfenito cumo l cielo, abraça todas las criaturas.

Dius ye l sou foco.

Assi cumo l sol se projeta, sien sclusones, subre todas las cousas i recalece la natureza anteira, tamien assi l amor beneficia todas las almas.

Sous raios, penetrando atrabeç de las trebas de l nuosso eigoísmo, eiluminan cun trémulos clarones ls recantos de cada coraçon houmano.

Todos ls seres furan criados para amar.

Las partículas de la sue moral, ls germes de l bien que an si repousan, fecundados pe l Foco Supremo, iran-se spandir-se un die.

Ende, anton, floresceran até que todos seian reunidos an ua única comunhon d´amor, i an ua só fraternidade ounibersal.

Nun amporta quien seiamos hoije.

Amporta apenas que steiamos çpuostos a anfluenciar un al outro, ne l sintido de l bien.

Filhos de Dius, somos todos membros de la grande famílha de l Sprito Santo.

Tenemos marcados an nuossas caras l sinal da debindade.

Somos todos armanos i stamos çtinados a mos cunhecer i mos ounir an harmonia, loinge de las paixones i de las grandezas ilusórias de la bida.

Cunta-se que un farmacêutico que se dezie ateu, i bangloriaba-se de l ateísmo, afirmando: Dius, cun certeza, nun será mais que ua quimera, dessas fantasies para anganhar las pessonas ancautas i menos lhetradas…

Talbeç alguas mais zaspradas que necessiten de cunsolo i sprança…”

Un die, yá quaije a la nuiteira, i por altura de l Natal.

Bie-se pulas lhuzes que relhuzien nas casas bezinas, que yá stában todas angalanadas cun lhizicas i arberes de Natal, pais Natales, i dessas cousas que se beien nesta altura de Natal.

Anton iba you deziendo que antrou na farmácia ua nina. Antrou na farmácia de l dito senhor.

Era lhoura, de tranças, i trazie un semblante priocupado. Antregou ua receita médica i pediu que la preparasse. L farmacêutico; ambora ateu, era home sensíble i eimocionou-se al ber l aparente sufrimiento d´aquela garota, que, anquanto el se purparaba para preparar la fórmula, assi se spressaba.

- Prepare rapidamente, por fabor, pus l doutor dixe que la mie mai precisaba cun ourgéncia dessa medicaçon.

Cun hablidade, pus era muito buono ne l sou oufício, l farmacêutico preparou la fórmula, recebiu l pagamento i antregou l ambrulho pa la nina, que saliu apressadamente quaije a cuorrer.

Buolbiu l porfissional pa las sues prateleiras i purparaba-se para recolocar ne ls sous lhugares ls frascos de ls quales retirara ls angredientes para abiar la receita.

Ye quando se dá cônta de l que habie feito, que cumetira un terríblel angano. An beç de ousar ua cierta substância medicamentosa, ousara alta dosaige d´un beneno biolento, capaç de causar la muorte a qualquier pessona.

Las patas tremirun-le. L coraçon batiu descumpassadamente. Fui até la rue i, nerboso mirou pa l dreita i pa la squerda… nien seinha de la garota.

Adonde procurá-la ? L que fazer? De repente, cumo se fusse tomado d´ua fuorça mistriosa,l farmacéutico anterroga-se, I se Dius eisiste?

Coloca la mano na tiesta i an zespero chama.

« Dius, se eisistes, perdona-me. I manda alguien de tue cunfiança, puode ser l nino Jasus mas. Faç cun que acunteça qualquier cousa para que naide beba d´aqueilha droga que purparei çtraidamente… Salba-me, à Dius, de cumeter un assassinato mesmo que imboluntário» Inda s´ancuntraba an oraçon, quando alguien toca la campainha. Pálido, priocupado bai atender. Era la nina de las tranças douradas, culs uolhos chenos de lhágrimas i uns cacos de bidro na mano.

- L senhor puode-me purparar de nuobo por fabor?

-i splica, ansiosa -

Un nino pequeinho fizo-me atropeçar, i cai, i partiu-se o frasco. Perdi todo l remédio. Puode fazer de nuobo, puode?…

L farmacéutico reanima-se. Purparou nuobamente la formula, cun todo l cuidado i antrega l produto, dizendo de coraçon alegre.” bai depriessa, que agora, you le garanto, que esse nino nun precisa de te fazer cair”.

I inda formula botos de saúde pa la mai de la garotica.

La criança, sien bien tener antendido, agradeciu i saliu apressadamente.

Desse die an delantre, l farmacéutico moderou sues eideias. Decidiu-se seriamente a lher, studar i pedir mais splicaçones subre aquel mistério an que dezie nun acreditar.

Porque, apesar de la sue cumbita çcrença , cuncluiu deste acontecimento:

“ Nó , Dius nun puode ser ua quimera, ua dessas fantasies para anganar las pessonas ancautas i menos lhetradas…

Dius, standiu-me la sue misericórdia.

Apartir desse die l dito farmaceutico diçque nunca mais deixou de festelar l Natal cun presépio i todo, assi cumo manda la lhei de la Santa madre Eigreija. Tamien a nós mos fazie falta ua seinha para amolcer alguas eideias mais duras, pus a las bezes un ampurronico fai muito geito…

José António Esteves

Lar de San Jesé Bumioso

Cuntigo

2011-12-19T10:20:00.002Z

Caiu la gilada, tan branca i tan frie

i las berduras de la huorta drobados i andebles,

fazírun la bénia, al sol que nacie.

La nuite sien ti era muito mais frie.

Ls chupones alhá ambaixo,

na aldé belhica, píden que ls caléçan

que l déian bida

i a pouco las casas son uobos a abrir,

i anriba ls telhados,

l fumo ancomeça, a golfiadas a chubir.

La bida cuntigo ten outro sentir.

l sol almeia l termo delorido

i las berduras de la huorta spértan a pouco

lhebántan ls benairos, sous benairos brancos,

cuorren-le las lhágrimas, chóran d´alegrie,

apedúran fuorça pa la nuite frie.

Cun ls dedos na botoneira, miro bien las bistas

i la aldé solica yá deixa de l ser

i l die cuntigo ten outro correr.

Un cachico más felizes

2011-12-19T00:15:00.000Z

Quadros de Teresa Almeida, sacados deiqui

Cunforme ambora dada eiqui, na sesta, die 16, la porsoraTeresa Almeida, nuossa camarada eiqui de la quadrilha, einougurou ua sposiçon depintura – Pinceladas Poéticas - i apersentou l sou purmeiro lhibro de poemas -Ousadia. Fui ua fiesta mui bonita i bien merecida! Ye ua pruoa para todos eiquitener ua camarada desta culidade.

You amento nisto por dues rezones: a la ua, para le agradeceri renobar ls parabienes a la porsora Teresa i dezir-le que yá stamos a spera dela cuntinaçon; a la outra, para le amostrar als que nun tubírun la suorte dehaber stado alhá dous testos subre la pintura/poesie de la porsora Teresa queson, eilhes mesmos, tamien dues obras de arte:

L purmeiro de la tamien pintora i poetiza mirandesa AdelaideMonteiro, si, la nuossa Delaide.

“Arrebenta la ousadie an telas i poemas, a la par d´uacierta suabidade i einocéncia capazes d´amerosar fraguedos ne l sou modo muiprópio d´ apaziguar todo l que stá a la borda deilha.

Béilan las lhetras dun poema nas saias sbolaciantes de labeiladeira de rapassiado, an manchicas cun ganas de salir de la tela, ampuxadaspor baláncios de la música que d´andrento de l´outora bai salindo.

Na scrita i na poesie, Teresa Almeida stramite serenidade,al miesmo tiempo que spechuca l deseio de rumper regras, de passar lhemites.

Oubrigada Teresica, por todo l que mos dás!”

L segundo, de Júlio Meirinhos, Bice-Persidente de l Turismode l Porto i Norte de Pertual, antigo Persidente de la Cámara de Miranda i,nunca será de mais repisá-lo, “pai” de la Lei que recunheciu la LhénguaMirandesa:

“La lhuç debelgada por remiles de cintas-de-raposa arramaba-sepula tierra mirandesa. Apuis, la mano hable de la pintora ajuntou-la iangalanou-la. Tenhiu cembones de eideias: dou-le sabor a quelores amerosas,cheirosas daquel dóndio caliente que las palabras inda nun aprendírun a dezir,mas que ls uolhos ampálpan ne l scurrir de las selombras. Prendiu ls spetroscul feitiço de l sou mirar azul zberdiado, i pa ls oubrigar a dezir l soumundo, zlingou-los de guapos barandins, donde cuorren riqueiros de formasmansas. An “Pinceladas Poéticas”, Teresa Almeida amplacha las paisaiges de lssous mirares, para lhougo a seguir las ampimponar a rigor, todo, solo para mosfazer un cachico más felizes.

Que Dius te lo pague, Marie Teresa”

Sfregantes de Ternuna

2011-12-18T21:56:00.002Z

Zlizan-se dedos tateando la calor de ternura;

carícias an bicos de peitos floridos,

tremelican cuorpos meio znudos;

eimana oulor a guisado an panela de fierro,

ferbe la ferbura an bálsamo de ternura;

na percura, clausura-se l tiempo i l spácio i;

ne l ferbor, l caldo há-de tener buona cozedura.

A ti

2011-12-18T17:13:00.000Z

Chegueste-me an Dezembro

Fai hoije trinta i seis outonhos

La prenda de Natal mais perciosa

Que algua beç tube:

Sien lhaços a fechar la caixa

Mas cun lhaços bien mais fuortes

que l corte de la bide nun aparta.

Eras…

Talbeç rapaç dezie you

I quando pa la mie barriga mirában

Tamien las curjidosas dezien:

Bai a ser un rapaç!

Solteste-te i apuis bozieste

I cumequiera me deziste:

Este que bés, sou you!

You deixei-te

Deixei-te medrar ouserbando-te

Deixei-te bolar seguindo l tou bolo

Abintureiro i repunsable

Cun antegridade i caratre

Sós tu próprio

Sien nunca deixares de ser, miu tamien.

FUONTE ALDÉ

2011-12-18T16:45:00.006Z

.
XIII REZOSA - I SARTI WINTER FEST
.

La ACREFA, ls GALANDUM GALUNDAINA i la SARTIGAILHOS pelgrinos, ourganizórun mais un fin de semana cultural an Fuonte Aldé

.
An 1998 l Jornal de Notícias daba la ambora de l festibal Rezosa an Fuonte Aldé i ne l segundo die fui assi:
“L segundo die de festibal, manhana, ampeça a las 10.30 horas, na Scuola Purmária de Fuonte Aldé, cun ua cunfréncia subre Lhéngua Mirandesa adonde, até a las 16.30 horas, se falará, dun modo giral, de las questones relacionadas cula respetiba preserbaçon i dibulgaçon, assi cumo de l'amportança de las modas tradecionales cantadas an lhéngua mirandesa ne l cuntesto de defesa i promoçon. Seran cunfrencistas l Prof. Demingos Raposo, Júlio Meirinhos, Francisco Prada i Mário Correia.”

Este anho ls cunfrencistas fúrun:

-Francisco Manuel Esteves, licenciado an ciências ampresariales área financeira i pós-graduaçon en higiene, salude i sigurança ne l trabalho, que falou subre las potencialidades gastronómicas i turísticas de l cunceilho de Miranda de l Douro i subre la cerbeija artesanal Sarti.

-Jorge dos Santos Rodrigues Fernandes, licenciado en angenharie agrícola i frequência de mestrado en Zambuolbimiento rural, que falou apicultura i mel biológico.

-António Afonso Pimentel, licenciado en beterinária, secretário tequenico de l lobro genealógico de la raça bobina mirandesa, que falou subre raça bobina mirandesa ua aposta de feturo.

Assomou-se la primabera

2011-12-18T10:42:00.001Z

Chegueste an die soalheiro
a calcer-me ls pies
pousados ne l absedo.

Nunca hai sol que caleça
aquilho que só se calece
cun un mirar doce
cun ua mano de lhana
cun un cuorpo de liana.

Çfiso-se la carambina
adonde ls pies sgobiában
adonde ls beisos se me anregelában
ne l modo de beiso adiado

Chegueste
i cuntigo
assomou-se la primabera
pul alçapon de casa

L SÉTIMO CHEGOU ESTA NUITE

2011-12-17T11:07:00.002Z

L sétimo chegou esta nuite

A anunciar la buona nuoba

I you todo cheno de poua

Desse resultado dou pruoba

Bieno la Tresa toda cuntenta

Para mos anunciar l Natal

A darmos la buona nuoba

Chegou nun parto normal

Que nun fui preciso cuortar

A sue mai que staba pronta

I aspera deilha chegar

Nina i sue mai, na maternidade

Inda stan a scansar de la biaige

Para depuis ancarar la bida

Cun mais fuorça i mais coraige

Puis coraige tamien ye preciso

I las dues tenen que la tener

Para dar cuonta de las cousas

Que na biba l bai aparecer

La mai para cuidar de la nina

Ne ls púrmeiros tiempos de bida

I la nina quinda nun cunhece

Esta bida tan querida

Por agora ye só mamar

De las tetas de sue mai

Sien de nada se priocupar

Culas cousas que la bida fai

Essas cousas son para nós

Para neilhas arreparar

I dar-le muitos beisicos

Anquanto eilha stá mamar

Deixo-le un beisico bien grande

Deste abó queilha nun cunhece

Mas da-le un beisico bien taludo

Tal i qual cumo eilha merece

José António Esteves

Era nuite i tanto die

2011-12-17T02:05:00.000Z

Era nuite, tanta nuite

era nuite i l die benie.

Benie l die an tanta nuite,

Siempre que la trocida ardie,

a ancendiar la nuite

cun l sol que an nós ferbie.

Ferbie-mos tanto la nuite

que até streilhas acendie.

E quando al cuidar que la nuite

yá quedaba siempre die,

chegaba anton l çponer

de la calor qu´an nós decie

i chegaba-mos la manhana

ourbalhada an nuosso cuorpo,

ne l cuorpo que inda ardie.

Apuis bolbie a ser nuite

nun suonho qu´ apetecie.

L çtino ten hora marcada!

2011-12-17T00:46:00.002Z

Cuonta a cuncurso

Apuis Bacances de Natal ye tiempo, mais ua beç, de deixar sue tierra, sues pais i bolber al grande reboliço de Lisboua. La carreira sale a las uito de la manhana. Apuis las çpedidas, mete la mala i l saco na bagajeira, mostra l bilhete al motorista i percura lhugar. Nun le gusta ls sentalhos traseiros. La carreira yá benie bien cumposta. Lhugares lhibres nas delantreiras solo un. Puodo sentar-me? Faç fabor. Saca l lhibrico, la quimica de la bida, mete l mirar nas lhetras i la carreira ruodra sou çtino. L silénço agarra-se-le a suonhos que le sónan dies de solidon. Acanhado, nien palabra bota. Stratégia? Nó. Solo acanhamiento i pouco dado a falas cun outros. Mesmo que l outro seia ua rapaza guapa que mira a miedos. Ganas de soltar palabras nun le faltaria mas l acanhamiento...nien sabe l que dezir. L melhor yé quedar-se calhadico. De Miranda a Lisboua son nuobe horas de diçtança. Horas de almuorço, nien chiu nien cheta..., nien combite. Que falta de eiducaçon. Caras conhecidas d'outras biaiges dan para zanferrujar la lhéngua. Siete horas de biaije dá para todo: drumir, lher, mirar la paisage, suonhar de uolhos abiertos... nun le dá para botar fala cula rapaza a seu lhado. Arrima-se la capital i la fileira de carros afunila-se i la carreira para fazer cinco kilometros demora-se dues horas. Quaije siete horas a par i nada, nien ua palabrica. Solo l transito para forçar cumbersa. Nunca mais chegamos a Lisboua i apuis ainda se ten que andar mais ua ou dues horas até chegar a casa. Tiempo de apresentaçones. You chamo-me Jesé Albes, sou anfermeiro militar de la marina. You sou Marie, sou porssora purmaira. Praça de las cebolhas. Tiempo de sacar malas. You bou para l Terreiro de l Paço apanhar l barco para cacilhas. You tamien bou para esses lhados mas apanho l barco para l Barreiro. Caminórun juntos, cada un cun sue bagaige, antre silénços i larachas.Nun se le çprendan las palabras al rapaç. Las apresentaçones yá habien sido feitas. Agora siempre era mais fácil cumbersar. Buono, you quedo-me eiqui. Ls barcos para l Barreiro son de meia an meia hora. Acabou de salir un, agora tengo que sperar. Para Cacilhas hai de siete an site minutos. Fago-te cumpanhie até l próssimo barco. Yera la purmeira beç que miraba ls uolhos de Marie que se amostraban cumo dues azeitunas longales sberdeadas. Sabes, benimos la biaije toda quaije sien falar i agora ye que mos stamos a conhecer. Nun sei se tenes telifone i se mo quejires dar apuis telifono-te i l próssimo fin de sumana podemos salir? Nun yé hábito miu dar l telifone a naide mas puodo dar-te l numáro de la casa adonde stou a morar. L çtino ten hora marcada. Tantas biages i bolandas i sereia algua le tenie anganchado.
La cumbersa yé cumo las cereijas i meia hora passa-se que nien relampago. Jesé yá se tenie çprendido de seu acanhamiento i agora quien lo bisse nun habie d'acreditar. Tagarelas. Ligaçones, reaçones. L seu sangre haberie de ter mais bolhicas de ocigénio!!! Quimicas de bida. Algo tenie chiscado la cerilha i l amor ye fuogo qu'arde. L miu barco ya chegou i tengo que ir. Telifono manhana a ber se todo stá bien. Dous beijicos nas faces rosadas de çpedida i mira-le mais ua beç ls uolhos longales sberdeados i l coraçon de Jesé bombeia cula fuorça de la eiquiaçon de aceleraçon. Tenie quedado anfeitiçado.
Manhana de segunda-feira. Cumprimenta ls camaradas, toma conta de l serviço. Lista de dolientes, medicamentos i andicaçones. Albes, Jesé Albes, parece haber moura na costa...nun ye moura mas deixaste rabo de saia na santa térrinha.... Jesé solo sunrria i un brilhozico no seu oulhar mostraba la sue satisfaçon. Apuis de fazer la ronda a todos ls dolientes i le dar la medicaçon bai-se al gabinete i pede a la telifonista que le fazisse la ligaçon.
-Stá, yé Marie, sou Jesé Albes, l mudo de la carreira.
Risos de l'outro lhado de la linha.
- Nun sei porquei mas fiquei cun ganas de falar, falar, falar tantas horas cumo aqueilhas que beni calhadico a teu lhado.
Mais risos i ainda nun se le tenie soltado ua palabra, ou Jesé nun lo tenie deixado, puis nun se calhaba.
-Ainda nun oubi tu boç.
-Ainda nun me deixeste falar!
Jesé calhou-se.
-Gostei de te oubir mas nun dá para falar.
-Buono, manhana torno a lhigar-te, puode ser?
-Si.
-Até manhana.
Jesé Albes zligou l telifone i ficou bolando antre nubes brancas i zeinhos ne l aire. Starie apeixonado? Hai que tiempos nun sentie tamanha lhebeza.
Todos ls dies de la sumana Jesé telifonaba a Marie. Eilha pouco falaba i quaije solo lo oubie.
Sexta-feira. Jesé nerbioso i cun l sou coraçon a pulos telifona.
-Buonos dies, Marie, uolhos berdes de azeitunas longales.
-Quei???
-Çculpa mas nun me sales de la cabeça i cada beç que fecho ls uolhos beio ls teus grandes uolhos berdes que parecen azeitunas longales. Manhana siempre mos ancuntramos?
-Tu nun sabes nada de mi i nun me parece cierto ir salir cuntigo!
-Seia l que for que you nun saba, salimos i cuntas-me l que you nun sei de ti.
Silénço.
-Nun me parece cierto salir cuntigo...silénço.
-Uolhos grandes, guapos, berdes, azeitunas longales. Que mal puode fazer salires cumigo?
Silénço....
-Que mal puode fazer...buono manhana a las dues i meia de la tarde a salida de barcos do barreiro.
Zligou l telifone.
Meia hora antes alhá staba Jesé Silba mirando ls quiosques i spreitando a ber se chega algun barco. A la dues i meia, uolhos agarrados a la multidon que se çprende de ls portalós de las dues portas de salida do barco. Ls cabelos pretos als caracoles i casaquito de malha azulado mostra-se a salida de la puorta. L coraçon de Jesé deu ua batida mais fuorte i acelarada. Spera mais un cachico i quaije a salida fai un aceno a miedos mostrando-se. Recibe outro. Dous beijicos de cumprimentos i ampeçan a caminar caras a Baixa.
Tarde soalheira cumbida a passeio lhargo. Passadas bagarosas, mirando montras, falando de cousas banales, ende ban falando i rindo, mirando todo sien priessas. Meia tarde. Tiempo de antrar nua pastelarie, sentaren-se de fronte i anquanto l ampregado nun chega «uolhos berdes de azeitunas longales». Riso solto i lhiberto çprende-se de Marie.
-Ancata-me l tou sunrriso!
Marie mira-lo cun ls sous uolhos grandes, berdes, azeitunas longales i cun un sunriso triste diç:
-Sabes, yé que you namoro cun un rapaç alhá de mie tierra i nun me parece cierto salir cuntigo.
Jesé, simulando la serenidade que seu coraçon nun tenie, diç:
-Que mal puode fazer salir cumigo? You só te puodo dezir que yá muito tiempo que nun me sentie assi tan lhebe. Parece-me que l mesmo se passa cuntigo. Se assi ye nun puode haber mal que dende benga.
La tarde passou-se. La hora de cena achega-se i Jesé cumbida Marie para cenar. Marie eisitou mas apuis: «que mal puode fazer?»
Caminórun arrimado a Bairro Alto para un restourante que Jesé conhecie que fazie naco de cochino brabo mui buono.
La cena staba a ser mui agradable. La cumbersa sobre sues bidas i tiempos de ninos nas sues aldés. Risadas atrás de risadas. Maire nun se cansaba de agabar l Naco de Cochino brabo. Sobremesa. Jesé íba comer ua bavaroise. Marie diç: « l que tu comeres you como.»
Jesé, nun sfregante i cun ar mais sério de l mundo, mirando ls uolhos berdes azeitunas longales de Marie, diç:
-Sabes, l miu coraçon bate cun ua fuorça i acelaraçon que solo puode querer dezir que stá einamorado de ti.
Silénço. Jesé pagou la cuonta i salíran caras a Cais do Sodre. Na rue Jesé torna:
-puodo dar-te la mano?
Mantenendo la stantida. Marie, mirando Jesé bien adrento de seus uolhos, stica-la i caminórun de mano dada.
Quatro meses apuis tenian-se casado. Binte anhos se passórun i ainda se passeian de mano dada pulas rues de Lisboua.

COPRATIBA RIBADOURO

2011-12-16T20:57:00.006Z

.
COPRATIBA RIBADOURO
.

Que melhor persente de Natal que ber ls binos de la Coperatiba Ribadouro ne l Guia Popular de Binos 2012, de Aníbal Coutinho? Son ls melhores binos que stan alhá i mais inda, l nuosso bino ye de ls mais recomendados i cun dues streilhas. Para recolher hai que sembrar i la Coperatiba Ribadouro stá ne l bun camino.
Naide ye santo na sue tierra!

Aníbal Coutinho quien ye?
Ne l final de 2002 ampeçou a screbir subre binos i a antensificar l sou trabalho de crítica specializada, colaborando cun bárias publicaçones nacionales. Publica, zde 2005, dues seleçones anuales de bino: “Copo&Alma, Melhores Binos” i “Copo&Alma, Guia Popular de Binos”, eiditado pula Persença i premiado cul Gourmand Award, l purmeiro an Pertual cun ua seleçon, an proba ciega, de ls melhores binos de ls de cunsumo diairo, que pretende ser ua ferramienta d'apoio al cunsumidor qu'adquire ls sous binos na moderna çtribuiçon.
Ye outor de l guia “TOP10 Binos Pertual”, eiditado pula Dorling Kindersley-Cibeli¬zaçon. Ne l strangeiro, scribe pa la Bino Magazine (Brasil), Argi (Spanha) i ye co-outor, cun Michael Oulebier i Neil Pendock, de l guia sul-africano de binos The People´s Guide.
Ye júri de bários cuncursos anternacionales de bino, cumo l Cuncurso Mondial de Bruxelles, Anternational Wine Challenge ó l Mundus Bini.
Antre las colaboraçones cumo formador i cunselheiro, çtacan-se las parceries cula Scuola de Houtelarie i Turismo de l Storil, culs Houteles Tiboli, cul grupo Portugália, cula Miele i cula Sonae Çtribuiçon.

Ua arte que surge de la natureza i de a mimória

2011-12-16T15:31:00.002Z

Antrebista d'Amable Anton ne l Mensageiro de Bergáncia

L Nino Jasus Reberdecedor (cuonta a cuncurso)

2011-12-16T00:28:00.002Z

Hai cerca dua dúzia d'anhos, nua nuite de la quadra natalícia sonhei que bibi an Zenízio, un Porsor de Mirandés qu'era cunsidrado l'home mais sábio i l melhor adbinho de l cunceilho de Miranda. Toda la giente acraditaba ne l qu'el dezie.

Ua sumana antes dun die de Natal anunciou que nesse, 25 de Dezembre, l Nino Jasus benie hospedar-se an casa dua pessona qualquiera de Zenízio, mas naide sabie an qual.
Esta ambora correu debrebe de boca an boca i to la giente redobrou sfuorços para pintar i arranjar l melhor possible la sue casa pa la tornar mais guapa. Ls maiores i melhores amblezamientos fúrun feitos na casa de l tiu Antanho, qu'ansiosamente speraba que l Nino Jasus benisse hospedar-se na sue casa.

Na manhana desse die de Natal batiu a la puorta de l tio Antanho un pobre nino, cujo pai por bezes se amburrachaba i le daba muita porrada. Batiu a la puorta mui aflito, cheno de maçados bien negros, a pedir ajuda para passar eilhi l die. Tiu Antanho respundiu: Nó, hoije nun te puodo ajudar, spero un nino mui amportante.
L nino maçado, zolado, fui-se ambora mui triste.

Por buolta de l meidie batiu a la puorta un nino coixo, magricelas i cheno de friu i dixe: caminei la manhana to, stou cheno de fame i stou mui cansado, por fabor dai-me de comer i deixai-me calcer i çcansar un pouco na buossa casa.
Respundiu l tiu Antanho: lhamiento muito, mas hoije nun bos puodo acuolher porque stou a preparar la mie casa para recebir ua bejita mui amportante. Nun oubistes dezir que l Nino Jasus ben quedar hoije nua casa de la nuossa tierra? You tengo l pressentimiento que la casa scolhida bai ser a mie.
L nino coixo, zolado, fui-se ambora mui triste.

Al meio de la tarde batiu a la puorta un nino çcalço, cula roupica mui suja a sangrar de ls zinolhos i de las manos, porque tenie caído nun camino ruin i pedregoso quando ía a correr a buscar las bacas al lhameiro de Ourrieta Ferreiro.
Quando l tiu Antanho abriu la puorta l nino, olhou-lo cun cara mui meiga i nun dixe nada.
L tiu Antanho olhou l nino i dixe: pobrezico, cumo tengo pena de ti, se fusse outro die, mas hoije spero ua pessona mui amportante.
L nino çcalço i a sangrar, quedou desolado i fui-se ambora mui triste.
L die staba a chegar al fin, l sol a çponer-se i l tiu Antanho anterrogaba-se: l Nino Jasus tenerie ido hospedar-se noutra casa?! Éran yá cerca de la meia nuite i staba a quedar zolado, porque El nun aparecie i to l sou trabalho tenie sido an balde.

A la meia nuite cierta batiu a la puorta un nino guapo, bien bestido, parecido cul Nino Jasus de la Cartolinha. Quando l tiu Antanho abriu la puorta bibrou de cuntentamiento, cumbidou-lo para antrar i preguntou-le sodes bós l Nino Jasus. L Nino respundiu, cun aire mui sério i amargurado, reprendendo-lo mais cul mirar do que culas palabras, Sou! L Nino Jasus Reberdecedor! anquanto l tiu Antanho, que nin antandiu l nome Reberdecedor, dezie entrai, entrai, que a mie casa stá guapa i bien adornada!

L Nino Jasus Reberdecedor, dixe: Trés bezes bati hoije a la buossa puorta, amplorando socorro i cumpaixon i bós trés bezes me sprezestes i çpedistes sin me dar ningua ajuda. L tiu Antanho mui aflito sclamou: Perdonai-me! Perdonai-me! Nun sabie que éreis bós L Nino Jasus!
L Nino Jasus Reberdecedor dixe: Si perdo-bos, mas perdistes hoije las cousas buonas que trazie para bós, porque l que deixeste de fazer l'als outros ninos, fui a Mi que deixeste de fazé-lo. Mas dou-bos l'honra de quedar na buossa casa, cun ua cundiçon i ua misson mui amportante para todos ls mirandeses, la de me ajudardes a reberdecer la lhéngua mirandesa.

L tiu Antanho mui cuntente dixe: Stá bien quedai! Mas reberdecer l qué?
L Nino Jasus Reberdecedor dixe: muitos mirandeses parécen-se culs galhos dua arble ne l'ambierno, sin seiba, sin fuolhas, sin fruitos. Mas an todos ls mirandeses eisiste un filico de “seiba” de lhéngua mirandesa, que se puode trasformar an primabera lhenguística, ó seia, reberdecer totalmente la lhéngua, tal cumo ls galhos de las arbles quando botan fuolhas, flores i fruitos na primabera, assi acuntecerá a la lhéngua mirandesa, se la falardes i la screbirdes todos ls dies, cun houmildade, sin banglória i cun sprito de Natal, la lhéngua reberdecerá an lhibros, an blogues i sites cun guapos testos, poemas i comentairos, an palhestras i an çcursos, i nunca mais se morrerá.

L Nino Jasus Reberdecedor cuntinou: Nun ye Natal siempre que l'home quejir!? Para esso, lhembrai-bos, bós mirandeses, de l Nino Jasus Reberdecedor i falai i screbei la lhéngua mirandesa, se possible, todos ls dies de la buossa bida.

L tiu Antanho quedou cuntentico i you çpertei… Que suonho!?

Leonardo Antão

Cuonta de Natal (Cuncurso)

2011-12-15T12:29:00.002Z

Eilhes yá tenien muita eidade. Yá habien passado de ls oitenta anhos. Ye obra, que nun ye para todos.
Anton de casados!... anton bó, a las bezes tenien que fazer cuontas para acertar ne ls anhos ciertos. Eran sessenta e dous. L die, esse lhembrabam-se siempre.

   Era guapo bé-los dambos ls dous siempre juntos. Todo l mundo arreparaba nisso. Nun habien tenido filhos, las cousas nun se tenien birado para ende. Ls familiares mais acerca yá se tenien morrido todos. Sobraban ls sobrinos, que era mui ralo aparcer puli, passabam-se anhos. Mas la bida iba andando, un arrimado a l´outro. Todo fazien dambos ls dous an conjunto. Eili nun habie tarefas de home ou mulhier. Cada un fazie aquilo que le custasse menos ou fusse mais capaç.

   Quando salien a la rue, salien siempre ambos. Caminaban un al lhado de l´outro, ambora eilha se atrassasse de beç an quando i anton el, speraba por eilha i buoltaban a caminar al lhado. Esta anho, agora que l Natal bem ende, Marie, assi se chama eilha, pus-se mala, i tubo que benir ua ambulância para la lhebar pal spital. Alfredo, acumpanhou-la i quando le deziran que Marie tenie que ficar anternada, el pediu par el ficar tamien. Nun pude ser, deziram-le. Fui defícil cumbance-lo, e a la nuite quando querien cerrar ls puortas, Alfredo tubo que buoltar solo para casa. Santi-se mui stranho nunca amdubira solo, zde que se casara cun Marie. Ne l die adelantre inda toda la giente drumi i el yá staba a la puorta de l spital. Querie que Marie buolbisse para casa. Nó, nó,... nun pude ser, eilha ten que quedar eiqui. Mas manhana ye die de Natal, dezie el. Pus ye, pus ye,... mas nun podemos fazer nada.

   Todos ls Natales, eles fazien an casa l presépio. Era un presépio de barro que habien mercado nua feira hai muito tiempo. Punien-lo eili anrriba de ua mesica i ficaban eili a mirá-lo. Marie gustaba siempre de l cumponer cun un musguito que apanhaba na rue i uas palhicas cun que fazien l berço de l menino Jasus.
    Alfredo lhembrou-se anton de lhebar l presépio para l spital para l fazer alhá para la sue Marie. Cedico, quando chegou a la cama de Marie biu que eilha nun staba alhá, i pansou para el que starie a purparar-se para ir para casa. Fui andando pul curredor e preguntou a la anfermeira se Marie de la cama 6, staba a purparar-se para salir. La anfremeira olhou para el i ficou sin palabras. Dixo-le passaba un cachico. L Senhor nun arrecebiu hoije ningun telefonema? Nó, nó! La anfermeira dixo-le para la acumpanhar i furan l gabinete de la anfremeira chefe. Sperai un cachico. Eilha antrou purmeiro i passado puoco tiempo mandoran-lo antrar. La anfremeira chefe ampeçou.

   - Lhamentamos, mas la sue tie faleciu. Seguiu-se un strondo i cousas a partir. Quando ampeçou abrir ls uolhos nun sabie adonde staba. Era todo defrente de la sue casa. Birou ls uolhos i biu l presépio eili anrriba de la mesa de cabeceira. Quijo lhebantar-se mas arreparou que tenie um braço eimobilizado, la cabeça ambulta nua benda i nun tenie fuorças para se lhebantar.
   Habie passado um més sin el se dar de cuonta, ne l spital ye coincido pul doente de l presépio, ou pul home de l Natal.

Valter Deusdado

L mirandés na Scuola EBI de Vale Rosal

2011-12-14T23:39:00.008Z

Fuolha mirandesa-Jornal Nordeste 13Dez11

La lhéngua mirandesa bai-se mostrando a todos ls que se anteressan i gustan de saber mais sobre la nuossa lhéngua. An dous meses ye la segunda beç que bejito a EBI-Escola Básica Integrada do Agrupamento de Escolas de Vale Rosal na Charneca de Caparica a combite de porssores.
La purmeira beç stube, a cumbite de l porssor de pertués, José Manuel Teixeira, cun la turma de l 5º B. L atrasado die 21 de Nobembre, a cumbite de la porssora de história i pertués, porssora Ana Rodrigues stube cun la turma 5º A.
Tengo cuncéncia que l miu saber sobre la lhéngua mirandesa nun ye tan ancho cumo gostarie mas fago l possible para mostrar que la nuossa fala yé tan capaç de dezir i cantar ls poetas de Pertual cumo l próprio pertués. Assi lo mostran muitas obras, sendo las derradeiras: ls Lusíades de Camões, la Mensaige de Fernando Pessoa i Ls Quatro Eibangeilhos, traduzidos para la lhéngua mirandesa hai bien pouco.
Toda la classe sabie quien tenie sido l purmeiro rei de pertual - D. Fonso Anriqueç - i cumo se chamaba sue mai - Dª Teresa - . Tamien sabeis cumo se chamaba l pai de D.Teresa i qual era l sou reino? La classe: -nããão. Anton scuitai: l pai de D. Teresa chamaba-se D. Fonso VI....l seu reino era Lhéon... la fala desse reino era... l lhionés....las tierras adonde hoije se fala l mirandés pertencian al reino de lheón que yé la fala mirandesa. Agora bamos todos a pensar un cachico... i pergunto: ls filhos falan l quei?...Claro que la mesma fala que seus pais... lhogo Dª. Teresa falaba lhionés ou seia mirandés i seu filho D. Fonso Henriqueç que fala poderie falar?... La miesma que sue mai...dende se puode dezir que l nuosso purmeiro rei falaba mirandés. Assi, brincando se foi passando l tiempo.
Falei le que arrimado a 1900, un grande studioso, José Leite de Vasconcelos, fizo studos i eiditou la Filologie Mirandesa, sendo un de los purmeiros a dezir que la fala mirandesa tenie strutura de lhéngua.
Tamien dixo que la lei 7/99, de Janeiro, aprobada na Assemblé de la República, por ounanimidade, diç que la lhéngua mirandesa passa a ser tamien lhéngua oufecial de Pertual.

Terminei lendo alguns bersos de bários autores mirandeses.

Apuis hoube muitas perguntas sobre la lhéngua que you fui respondendo cumo sabie. Acho que l resultado foi buono cumo se puode ber pul postal que la classe i sue porssora, Ana Rodrigues me mandórun i que ende bai.

25/Nov/2011

António Cangueiro

Cada beç mais medonhos

2011-12-14T12:55:00.001Z

Cada beç mais un se perde ne ls touçones!

Será que tamien ls rocos i marifusas ténen yá miedo deilhes i por isso nun nácen a pie de las urzes i de ls pinhos? Nien un se bie!

Fui a ber ls pinhos para ber se habien medrado cun l boro que l botei hai mais dun anho. La pormeira tierra, na Malhada si la achei i que guapicos stan de tan berdes séren i sien ls capulhos de ls burgos.
Dezie-me Porfírio: Toda essa malina se l bai assi que ancomeçáren a medrar cun l boro. A bien dezir ancuntraba you que solo un milagre de Nuossa Senhora de l Naso ls salbarie de tamanha purga, eilha que ls mira de l cabeço alhá loinge. Quien sabe, sabe i, por isso, fui acarditando cumo quien nun quier çfazer de las palabras de ls antendidos. Ne l berano nun tube modo de alhá ir, talbeç por ne l berano ls touçones inda séren mais medonhos cun aquel modo de ancomeçáren a arder cumigo andrento...
Apuis dixe-l a la mie perra: Queda siempre a la mie borda, nun benga un lhobo i te coma, al miesmo tiempo que puxaba un trampo seco para me stribar i lo amenaçar s´acauso el assomasse por trás dua touça. Metimos-mos por ua rodeira para ber se assi seguiemos melhor camino i eibitába ua lhumbeirada cun un pie preso a ua carqueija.
Porque an camino seguido se abanta, acabemos por mos meter Moura adrento i perdimos-mos. Mas adonde seran ls pinhos aqueilhes?
Apuis seguimos al para baixo, a búltio, por antre aqueilhes touçones de lheinha rebielha, cargadica de mofo quelor de prata. Son guapos aqueilhes tunes cinza azulada cun chano berde adonde ls pies s´angarabielhan. Tornei a birar a la squierda i apuis, por antre aquel monte todo alhá abistei un berdico mais bibo. Mira que guapos stan Jomba!, dixe-le you a la mie perra! Se la giente fur falando siempre queda un pouco mais afouta. Apuis lhadraba la perra cumo se houbira antendido la mie cumbersa. Bamos a cantar Jomba! Cau, cau!, dezie eilha.
Mal será que oubindo la mie boç, l lhobo nun se baia. Jumbica!, siempre arrimada a mie, mie linda, para ber se chegamos al Natal sien caneiradas ne l cuorpo.

Adonde fuste?, percurórun-me yá acerquita de casa.

Ui tan loinge! Parende yá nun puode ir un solo! Mira se partes ua pierna!? Bá, inda tenes la perra que lhebarie la giente al sítio...

Teneis rezon tie Sabel, yá nun se rompe porende afuora!

Meti la mano ne l bolso de la çamarra i bi que nun habie lhebado l telemoble...

Nun tarda que ls touçones mos éntren casa adrento!...

L eissencial

2011-12-13T19:50:00.004Z

« Só se bei bien cul coraçon. L eissencial ye ambesible pa ls uolhos»
- Sacado de Le Petit Prince (L Princepico) de Antoine de Saint-Exupéry -

[ Traduçon mie]

Las pessonas grandes nunca anténden nada eilhas solas, i ye cansatibo, pa ls ninos, tener que star siempre a dar-les splicaçones. (cap. I)

Las pessonas grandes gústan de númaros. Quando les falais dun nuobo amigo, nunca bos fázen preguntas subre l eissencial. Nunca bos dízen : « Qual ye l sonido de la boç del ? Quales son ls jogos de que gusta mais ? Coleciona paixarinas ? » Eilhas pregúntan-bos : « Que eidade ten? Ten quantos armanos? Quanto pesa ? Quanto ganha l pai ? » i só júlgan que l cunhécen depuis desto. Se dezirdes a las pessonas grandes : « Bi ua casa guapa de tejolos quelor de rosa, cun geránios nas jinelas i palombas ne l telhado… » eilhas nun cunséguen eimaginar essa casa. Un ten que les dezir : « Bi ua casa de cien mil francos. » Anton scláman : « Que guapa ye ! » (cap. IV)

[An francés, ne l oureginal :

Les grandes personnes ne comprennent jamais rien toutes seules, et c'est fatigant, pour les enfants, de toujours leur donner des explications. (cap. I)

Les grandes personnes aiment les chiffres. Quand vous leur parlez d'un nouvel ami, elles ne vous questionnent jamais sur l'essentiel. Elles ne vous disent jamais: "Quel est le son de sa voix ? Quels sont les jeux qu'il préfère ? Est-ce qu'il collectionne les papillons ?" Elles vous demandent: "Quel âge a-t-il ? Combien a-t-il de frères ? Combien pèse-t-il ? Combien gagne son père ?" Alors seulement elles croient le connaître. Si vous dites aux grandes personnes: "J'ai vu une belle maison en briques roses, avec des géraniums aux fenêtres et des colombes sur le toit..." elles ne parviennent pas à s'imaginer cette maison. Il faut leur dire: "J'ai vu une maison de cent mille francs." Alors elles s'écrient: "Comme c'est joli !" (cap. IV)]

Un berdadeiro facanito! ( Para cuncurso)

2011-12-13T17:26:00.002Z

Saltában anraibados ls castelhanos andrento l forrador de calor. Las chamas spargien-se pulas paredes de fierro yá caldiado.
Alhá na rue fazirie friu, a abaluar pul aire a fungar ne ls piedamigos de cantarie.
L nieto scuitaba ancandilado la cuonta que sue abó l´ampeçou a cuntar apuis que ambos a dous fazírun l lhume i se aponien a anfeitar l pinho mais pequeinho a pie de casa i a fazer l persépio na sala.
Á abó, mas ne l tiempo de que tu me stás a falar, l tiempo an que tu tenies l miu tiempo, nun habie Pai Natal cun renas?, percurou-le el, assi qu´eilha parou un cachico para pensar ne l andruminar de la stória.
Que garotos tan zapacenciados son estes que nien podemos parar un sfregantico sien que eilhes mos bumbardéien cun outras cousa!
L´abó piçcanhou antes de l respunder para nun perder l filo a la miada que staba a debanar, la cuonta, más ua cuonta.
Nó nun habie, respundiu-le. Nien renas nien esses cunferrumes todos cun que jogais agora.
Tu yá m´habies cuntado isso abó, mas parece-me ua cousa tan ampossíble l Nino el solico ser capaç de bos traer las cousas pa l çapatico!
Cun esta ye que tu m´amuleste!, pensou sue abó.
Que garotos tan sabidos son estes deste tiempo! Nunca you tube deficuldade cun tou pai, i agora,… hai que ber!...
Inda quaijeque nun habie acabado de tener este pensar yá el staba: anda abó, cuntina la tue stória. Habies quedado nas farrapas d´algodon que ponies ne l presépio para fazer las bezes de la niebe. Nós tenemos aqueilhes”sprays” ora si abó?
Cumo podie, eilha iba andunando la stória…
Si. Poniemos-le algodon para dar fé de l friu que fazie na cabanhica adonde naciu l Nino Jasus.
Gustei de la stória abó! Mas á abó!, yá podemos ir a mofo?
Si, mas tenes que bestir la jaqueta i poner la gorra na cabeça.
Á bó!, puodo lhebar esta pedrica berdica que stá eiqui na parede, cargadica de mofo a parecer beludo?
Á bó! Á bó!!!!!!....

LA PAXARINA

2011-12-13T16:43:00.001Z

Un die, ũa pequeinha brecha aparciu nun casulho i un home quedou a ousserbar l sfuorço de la paxarina pa fazer l sou cuorpo passar pulhi i oubtener la lhiberdade.
Por un sfergante, eilha parou, aparentemente sien fuorças pa cuntinar.
Anton, l home decidiu ajudar i, c'ũa tejeira, cortou delicadamente l casulho.
La paxarina saliu facelemente. Mas sou cuorpo yera pequeinho i tenie las alas amassadas.
L home cuntinou a ousserbar la paxarina puis speraba qu'a qualquiera momiento sues alas s'abriríen i eilha ampeçarie a bolar!

L home, qu'an sue gentileza i buntade d'ajudar, nun antendiu que l casulho apertado i l sfuorço yéran neçairos pa la paixarina bencir essa çficuldade.
Yera l zafio de la naturaleza pa mantené-la biba. L sou cuorpo se fuortalecerie i eilha starie pronta i dreita pa bolar ũa beç que se lhibertasse de l casulho.

Algũas bezes, l sfuorço ye tudo l que necitamos an la bida. Se Dius mos premitisse passar la bida sien oustaclos, nun seríemos cumo somos hoije. La fuorça ben de las çficuldades; la sabedorie, de ls porblemas que tenemos que resolber; la prosperidade, de ls miolhos, i musclos pa trabalhar.
La coraige ben de l peligro pa bencir i, a las bezes, questionamos: ‹Nun recebi nada de l que roguei a Dius!› Mas, an la berdade, recebimos tudo que necitamos. I nun mos damos cuonta.

(Outor çcoincido)

Nuobas Pedagogies

2011-12-12T23:20:00.002Z

Nuobas Pedagogies - Matemática

Problema para resober:
6 + 7 = ?

Resultado apersentado pul aluno:
6 + 7 = 18

Comentairos i abaluaçon de l porsor:

La scrita de l númaro 6 stá cierta i l mesmo se puode dezir de lnúmaro 7.
l sinal de andicaçon de la cuonta (+) tamien está cierto i andicaclaríssemamiente que se trata de ua cuonta de mais.

De l resultado apersentado, bei-se que l purmeiro númaro stábien scrito i ye l númaro cierto para la cuonta pedida.
l segundo algarismo puode muito bien ser antendido cumo un 3 screbidosimétricamiente – arrepare-se na simetrie, cuntando un eixe bertical!
Desta maneira, l aluno anriqueciu l eisercício, botando mano a outroscunhecimientos i saberes.

Abaluaçon:

de todo l que dezimos nestes comentairos, puode-se chegar a las seguintescunclusones:

La atitude de l aluno fui positiba: sforçou-se por fazer bien.
Ls passos para chegar al resultado final fúrun dados na orde cierta; to lseilementos stan tamien ne l campo cierto.

Ne ls cunceitos solo se anganhou nun (1) de ls seis (6)eilementos que fáien l todo de l eisercício, cousa a que se le puode dar un çcunto.

Berdadeiramiente, l aluno acrecentou-le balor al eisercício, altraer para la perpuosta de resultado final outros cunceitos studados nasnuossas classes de matemática – las simetries – sublenhando i amostrando bienlas lhigaçones matemáticas a que tenemos l deber de dar atençon an qualquieraeisercício.

Cumo acima se amostra bien, este aluno ye merecedor de un“EICELENTE” i puode-se dezir cun proua que “passa de anho cun çtinçon”!

De L Suonho a la Rialidade (Cuncurso)

2011-12-12T14:36:00.003Z

De l suonho a la rialidade
Era ua beç...
Tiago era ua nino cun solo quatro anhos, mas nun le faltaba dinamismo.
Depuis dun die prenchido na Scuolica i chegado a casa, tomaba un banho relaxante de spuma, cenaba cun sous pais i, depuis d'algue brincadeira, éran horas de ir a la cama.Stamos na béspera de Natal i Tiago adrumeciu i sonhou cul Pai Natal.
- Pai Natal, Pai Natal! - chamou la rena de nome "Luzica".
- L que fui, Luzica? - respundiu l Pai Natal.
- Stá na hora d'arranjarmos ls persentes para çtribuir puls ninos.
- Tenes rezon, mas you astanho querie dar als ninos algo de çfrente. Todos ls anhos son brinquedos!!! Acho que eilhes gustarien de recebir outra cousa...
- Outra cousa, Pai Natal? Mas ls ninos l que gustan ye de brinquedos. L que serie?
- Nun sei - dixe, quedando pensatibo... - Qualquiera cousa çfrente mas mui special.
- Special? - Dixe Luzica.
- Si. Yá sei. I se nós astanho díssemos als ninos un animal de stimaçon?
- Buona eideia. I adonde bamos arranjar tantos animales? - bolbiu a preguntar Luzica.
- Ye mui fácele. Até yá tengo ua eideia.
- Bamos als caniles buscar todos ls animales abandonados i ouferecemos-los de persente als ninos.
- Ai Pai Natal, ls ninos ban quedar tan cuntentos!!! - dixe Luzica emocionada.
- Tamien acho, i assi podemos fazer felizes ls animales i ls ninos...
Nesto l çpertador tocou, Tiago çpertou i lougo puso an prática l sou suonho. Pediu a sue mai que l'ajudasse a screbir al Pai Natal, i, cumo prenda, Tiago solo pediu un animal de stimaçon...

LA BIAGE

2011-12-12T11:16:00.004Z

CUONTA PARA CUNCURSO

LA BIAIGE

Naquel die, l bento sopraba cun tanta fuorça. Ampeçara lhougo pu la manhana un pouco mais, suabe, muito suabe; depuis decidira spurmantar nuobos passos de baile: cuorrie deiqui pali, anchaba i ondulaba cada beç mais fuorte.

Aquel bento parcie dibertir-se a mandar pu ls aires ls cascóles de ls passantes i a fazer rodopiar las poucas fuolhas de las árbeles caídas ne l chano.

I eili stában aquels trés ninos, que sprában, uas pessonas para iren todos juntos, para casa de sous abós, que moraban alhá Pa ls meios de ls praino, adonde por aqueilha oucasion só habie niebe, i mais niebe.

Ls pais de ls ninos inda nun puodien ir cun eilhes naqueilha oucasion, por mor de ls sous afazeres, mais tarde se juntarien todos, an casa de ls abós de ls ninos, para festejaren juntos aqueilha quadra tan buona cumo era la quadra de Natal.

Berta Rosa cumo la mais bielha de ls trés fui quien assumiu la respuonsabilidade de lhebar ls sous armanicos uns dies antes para iren a tener culs abós. Ls abós esses ls starien sprando alhá pal nabalho, que quedaba nun scampado, cun muitos cerrados i alguns montes. Habie eili un sitio adonde ls outelizadores de l Carril Mourisco puodien párar para quemer la merenda i tamien dar-le algua cousa als sous burros.

Zulmira era la armana que se seguie a Berta Rosa, mas inda era mui nuobica para puoder terminar por eilha sola l que staba bien ó staba mal. Cuntentaba-se i debertie-se Zulmira cun cadernico que lhebaba para ir anotando las cousas que se iban passando na biaige.

Zéfiro por sue beç era l mais pequeinho de ls trés armanicos, i cun nada mais s´ampuortaba de que cu l sou camboio de madeira que l habien dado ne l die de ls anhos.

Por isso el tenie tanta prou cun dito camboio, i yá nun bie la hora de chegar a casa de sou abó para que l l´aperta-se ua ruoda de l camboio que staba meio zangonçada.

Nun lhargues la mie mano! - repreendie-lo Berta Rosa, priocupada cu la possiblidade de perder ls pequeinhos ne l meio de la multidon que anchie aqueilha staçon adonde se mudában ls burros..

Faltában poucos dies pal Natal i, na berdade, éran muitas las pessonas que carregadas de malas i d´ambrulhos, i de presentes, seguien biaige para passar la mais ampuortante fiesta de l anho na cumpanha de ls parientes i amigos.

Ls trés armanicos sprában por uas pessonas para iren a tener cu ls abós que morában nua outra tierra mais alhá pa l meio de l praino; l pai i la mai irien juntar-se a eilhes deilí a dous ó trés dies.

Fui Berta Rosa que cumbenciu ls pais a deixa-los biajar solicos i, por fin, bencida la resisténcia i oubidas trés mil recuomendaçones, cunseguiu la autorizaçon.

Mui cuntenta, Zulmira, que quando fússe grande querie ser sploradora, tenie acuolhido la noticia de la biaige cumo la sua purmeira i berdadeira abintura.

L próprio Zéfiro staba feliç porque querie berificar cu l abó se l sou camboio de madeira funcionaba.

Assi, na mano squerda seguraba l camboiozico que l tenien oufrecido pu ls anhos cumpuosto por ua lhocomotiba i dous bagones, cumo fazie siempre queston de dezier.

Zulmira, cunsentradíssima, miraba aqueilha roçnadeira de burros que benien de todos ls lhados Carril Mourisco arriba.

- Son ls nuossos amigos! - dezie agitada Berta Rosa. Haber se puortais cumo debe ser

I nun me fazeis anfadar, puis bós bien sabeis cumo you sou quando stou anfadada.

Nun fui preciso mais pa ls armanicos antenderen l recado, pus naide ls buolbiu a oubier.

Chegórun ls amigos cula carroça i mais dues ó trés mulas para se fazie-se falta puone-las a la quarta, nunca se sabe l que irien ancuntrar pu l camino.

Bien ambrulhadicos ls ninos nuas mantas que lhebaban yá d´aprepósito, ls trés armanicos. Depriessa ampeçorun a calcer-

Berta Rosa, que plantas son estas, Scribe-me l nome eiqui ne l cadernico.

Mas que plantas dixo Berta Rosa

- Aqueilhas alhá riba, respuondiu Zulmira cumo se fússe la cousa mais ancantadora de l mundo.

Al lhonge bien-se alguns freixos i carbalhos, alguns carrascos, bien-se tamien alguns sobreiros l qu´andicaba que starien yá bien cerca de l cabeço de la Santissima Trindade.. Sien l dar qualquier respuosta, Berta Rosa segurou la mano i ampeçou a

Scantorolar ua moda de l Galandun Galundaina.

Acampada an buolta d´ua lhagona, protegida pu las lhiendas i a la selombra de las árbeles, ancuntraba-se ua carabana cumpuosta por pessonas. Talbeç quemerciantes, i dibersos animais. Un home, alto i delgado, cun piel scura i las roupas brancas bordadas, dou uns passos na direçon de ls três pequeinhos i cumbidou-los a sentaren-se i a beberen un pouco de agua fresca.

- Seian bien benidos, queridos amigos - dixe Baltasar a sunrir, puis era assi que se chamaba aquel home. - Estes son Melchior i Gaspar.

Un home mais bielho i outro de meia eidade, c´uns fatos marabelhosos de tecido precioso i tenien-se aprossimado antretanto de las crianças que, por sua beç, se apresentórun eiducadamente deziendo-le que iban a tener cu ls sous abós.

Las trés misteriosas pessonaiges cuntórun-le que éran ls reis Magos que, porbenientes de l ouriente, de la lhongínqua Pérsia, yá andában hai muito de biaige.

- Somos sábios, cunhecemos de las streilhas i studamos l cielo.

- splicou Gaspar a Zulmira.

Apareciu-mos ua streilha relhuziente cumo nenhua outra i stamos a segui-la.

- Mas para iren adonde?

- Para adorar l Rei de ls Reis i lhebar-le presentes - decidiu Zéfiro, mirar l home cun grande antresse.

Melchior sunriu.

- De cierta maneira…

- I que presentes son?

Baltasar respuondiu:

- Ancenso que, quando ye queimado , spalha ne l aire fumos aromáticos; l ouro que relhuç i ye precioso, i la mirra que ye ua pomada muito perfumada.

Zéfiro i Zulmira mirórun-lo perplexos; l ancenso i la mirra nun éran sous cunhecidos, mas sprában que mais tarde ls reis Magos ls mostrassen. Berta Rosa, por sou lhado, nun cunseguie acreditar: cunhecie la stória de ls reis Magos, mas cumo era possíble qu´eilha i ls armanos tubissen acabado drento d´ua stória? Resumindo, starien a suonhar? Ó serie ua brincadeira stranha? I, ne l antanto, eilha bie-los, oubie-los… Tentara pedir splicaçones , mas de ls trés tubirun apenas cumo respuosta uns mirares cúmplices. Assi, decidira cuntinar a participar naqueilha stranha biaige cun alegrie i la surpresa por todo l que staba acuntecer.

Anton Gaspar propuso:

- Quereis benier cun nós? La meta nun debe ser loinge:

Ls criados preparában las mulas i los cabalos, carregados de sacos i de ambrulhos, i ls camelos, cubiertos cun eilegantes panhos; papagaios de prumas queloridas sbolaciában antes d´antrar na gaiola trasportada por ua mula. Zéfiro quedou deberas radiante quando se biu a «muntar» un grande eilefante i quando un macaco l trepou pa las cuostas, anquanto las sues armanas seguien nun camelo só para eilhas.

Nuite drento, la fantasmagórica carabana ancaminhou-se na direçon de la lhuç de l cometa. Parecie puolo de prata i relhuzie ne l cielo, almiando l camino i criando ua atmosfera mágica ne l zerto. L percurso prosseguiu ne ls dies que se seguírun, cun Zulmira pedindo a cada paraige ajuda para screbier i zenhar la crónica de la biaige, i l armano aprendendo cu ls criados a domesticar la macaquita.

Chegando por fin als arredores d´ua lhocalidade chamada Belén, birun que la strada se animaba cun pastores i las respetibas canhonas: todos se dirigien pal punto ne l qual l cometa se fixaba. Assi, ls reis Magos i ls trés armanos ancuntrórun-se delantre d´ua cabanha..

Zulmira i Zéfiro abrirun la boca sien cunseguir cerrá-la, tal era la surpresa: tenien chegado al presépio! I eili staba l Nino Jasus na maijadoura, cun Marie i Jesé, la baca i l burro, eigualico al que bien an tantas eimaiges de l presépio.

- Berta Rosa Berta Rosa! Mira! - bóziórun antusiasmadíssimos, apuontando cu l dedo.

- Chiu !, nun bózieis! L Nino stá a drumir - dixe eilha al mesmo tiempo que se iban aprossimando.

Ls reis Magos oufrecírun ls sous presentes, azinolhando-se. Anton Zéfiro chegou-se a alantre, timidamente i colocando ne l chano l sou camboiozico, l miu presente.

- Será que bai a gustar? - sussurrou a Melchior.

- Tengo la certeza que si! - sunriu el.

Als poucos, un bentico suabe i tépido que abanaba las puntas de las arberes i brincaba cu las franjas de ls reis Magos i parecie acariciar docemente las cousas, ls animales i las pessonas, ampeçou a soprar. Ls trés armanos dórun las manos i apertórun-las fuortemente cu ls uolhos puostos na streilha cometa. Cerrórun ls uolhos eimocionados i cuntentos por stáren junto a assistir a un acuntecimento tan special.

- Anton? Que tal bos pareciu la biaige… - sacudiu-los ua boç bibrante, - Nun me bengades a dezier que se aborrecirun. Tenereis muita cousa para screbier i cuontar!

De pie, tirando cu la mano las mantas staba sou abó.

Berta Rosa, Zulmira i Zéfiro mirórun-se cunfusos i depuis birórun-se para ber adonde stában ls reis Magos, mas atrás deilhes nun habie naide. L zerto zaparecira lhentamente dando lhugar a ua paisaige feita de alguas casas i árberes, i suabes colinas i muntanhas cuobiertas de niebe. Até que, abrandando la marcha, la carroça parou.

- À, abó se bós soubisse. que andube d´eilefante andube d´eilefante! - bóziou Zéfiro, abraçando-se a sou abó.

- De eilefante! Cuonta-me alhá, cuonta-me alhã dixo l abó de Zéfiro…

José António Esteves

Lar de San Jesé Bumioso

La fantasie de l Natal

2011-12-12T10:28:00.002Z

L sprito festibo de la temporada de Natal nun puode muorrir-se por bias seia de l que fur.

Ten que haber siempre algue andrentro de cada un de nós, fuorças, motibaçones para pormober i eilebar esta quadra natalícia, nun solo pa ls ninos i ninas, ls mais pequeinhos, que míran i acradítan que ye neste tiempo que l nino Jasus pon ne l çapatico ou l pai-natal trai ne l saco las mais deseadas cousas queilhes mais quieren, mas tamien ls mais crecidos ténen que arranjar fuorças para nun se deixar bencir pulas remordidelas de la bida que mos metiu ne ls redadeiros tiempos.

Nun ye squecir-los, poner-los para atrás de las cuostas, naide resolbe nada squecindo seia l que fur muito menos aqueilho que ten que ser resolbido para nuosso bien de ls nuossos i de todos, até que hai bida para alhá de l Natal, mas mesmo que isto seia cumbersa feita, esta temporada festiba debe ser aporbeitada para fortalecer l’ounion de la família, tantas bezes doliente por bias de nun haber muita pacéncia para atamar las canseiras de l die a die, que mos chégan pul anfernizamiento i males dun goberno ou de la ganáncia que mos arrodeia, la falta de stima que ténen por nós.

L sprito natalício, ne l que toca als mais nuobos (aqueilhes qu’inda acradítan) dá uas buonas upas na sue formaçon psicológica i mental, dízen-lo ls specialistas, i you i la maiorie acradita i antende, que esta ambolbéncia amistosa de la fiesta de la comemoraçon de nacimiento de l Nino Jasus yé carinosa l bastante para anchir ls pequeinhos de felcidade. Assi sendo serie mui malo nun fazer i armar todo l que cuidarmos ser amportante an nuossas casas, eigreijas ou spácios públicos cun aluson al fato.

I para que esse sprito de pureza, bundade, simplecidade, hounestidade, de melhores modos chegue ls ninos i ninas, l mais de las bezes até nien ye perciso tener muito, i bibir atolhado an bienes, todo se puode fazer a la medida de l que podemos, puis to ls sabemos que l crecimiento i zambolbimiento destes tesouros se fai to ls dies, cul acunchego i l sustento que le damos siempre.

I quanto mais rial fur l Natal mais fácele será splicar todo, seia el farto seia el mais ancolhido.

Nun me lhembro de l que recebie ne ls natales quando era garoto, hai sessenta anhos datrás éran na berdade outros tiempos, mas tamien nun tengo lhembránçias malas, sei que se botaba mais fé nas manifestaçones religiosas, l serano até la missa de l galho que era a meia-nuite, l beijar de l nino, la sagrada família, i sei que nesses dies habie muita fartura de quemer, la mesa staba siempre chena de cousas buonas i gustosas, ambora la bida que bibien ls mius nun fusse nanhun cielo na tierra, fui un nino feliç.

Para fazer la felcidade de ls ninos i de ls outros até nien ye perciso muito.

Buonas fiesta para todos, bamos fazer deste Natal un repiquete para las nuossas bidas.

Mai nun se mexe, mai stá muorta

2011-12-10T18:26:00.003Z

Stamos an 2011 mas inda aparécen amboras cumo esta (screbida an spanhol i sacada de El País.com) que ancuntrei hai poucas horas ne l sítio que ten por títalo « La Tulha » cun essa mesma eimaige …

Mostrai-la bós tamien…

Anda buono l nuosso mundo ?

Inda nun anda anfeliçmente i ye por esso que a mi nun me dá buntade de rir cumo alguns fázen por bezes, cumo se stubíssen a cuspir pal cielo. Inda porriba quando un ye porsor i que la sociadade até mos paga nó apenas para ansinar quatro lhetras mas tamien para ajudar a fazer cun que este mundo un die nun s’acabe de beç.

Ua mulhier fui assassinada por l tiu deilha ne l andar adonde ls dous morában an Madrid. La bítima, Fátima F., marroquina de 39 anhos, morriu apunhalada, chegou a anformar « Emergencias 112 » i la « Jefatura Superior de Policía ». L crime acunteciu ne l domicílio de l casal, situado ne l númaro seis de la rue Alemania (bairro de la Ventilla de l distrito de Tetuán), adonde s’ancuntrában ls filhos de la bítima, un nino de poucos dies i dues ninas de cinco i seis anhos. Fui ua subrina que çcubriu l cadabre. L home, Alí D., tamien cun 38 anhos i de la mesma nacionalidade, antregou-se a las uito de la nuite ne l comessariado de Tetuán. Nun eisistien denúncias de malos tratos. Cun este crime, chúben a 56 las bítimas mortales de la bioléncia machista an Spanha só neste anho, habendo sido registradas nuobe antre eilhas na « Comunidad » de Madrid - quatro a mais que an 2010 i 2009, i dues a menos que an 2008 -

"Mamá no se mueve, mamá está muerta"

Una mujer ha sido asesinada por su marido en el piso en el que convivían en Madrid. La víctima, Fátima F., marroquí de 39 años, ha muerto apuñalada, ha informado Emergencias 112 y la Jefatura Superior de Policía. El crimen ha ocurrido en el domicilio de la pareja, situado en el número seis de la calle Alemania (barrio de la Ventilla del distrito de Tetuán), donde se encontraban los hijos de la víctima, un recién nacido y dos niñas de cinco y seis años. El cadáver lo ha descubierto una sobrina. El hombre, Alí D., también de 38 años y de la misma nacionalidad, se ha entregado a las ocho de la noche en la comisaría de Tetuán. No existían denuncias de malos tratos. Con este crimen, ascienden a 56 las víctimas mortales de la violencia machista en España en lo que va de año, nueve de ellas en la Comunidad de Madrid -cuatro más que en 2010 y 2009, y dos menos que en 2008-

Notas mies :

1. Tamien hai casos de bioléncia feita por mulhieres contra homes mas ls númaros andícan ua bien mais grande frequéncia de malos tratos feitos por homes subre mulhieres.

2. De todos ls países de l’Ouropa, Pertual ye aquel adonde hai l mais grande númaro de mulhieres que se cháman Fátima sien que eilhas seian oubregatoriamente de relegion muçulmana. Mas l nome « Fátima » de qualquiera maneira ye d’ourige árabe.

PINCELELADAS POÉTICAS E OUSADIA NA CASA DA CULTURA MIRANDESA

2011-12-09T16:27:00.003Z

Tenerei muito gusto an ber ls mius amigos acerquita de mi nesse die.

"Tudo pode ser matéria desta poesia que vai além da poetisa quando a entoa com a música das palavras, esse recurso sempre à mão, obsessão na busca das palavras que redopiam/na roda dos sentidos."

(Amadeu Ferreira, in Ousadia)

Botas Nuobas

2011-12-09T01:32:00.008Z

Cuonta a cuncurso

Bemposta, l nubrinheiro cerrado nun deixaba anchergar un palmo a frente de l nariç. L friu regelaba. Se subísse an riba la burrica chegaba a Ruolos atrecido. Caminaba a trotes i pinotes berdascando las patas traseiras que amenaçaban pinotes. La ourbalheira agarraba-se als pelos de ourelhas d'alerta i las goticas çpinduradas parecían lhuzicas a alhumiar l camino. Ls dous caminában a brincos. Un cula pormessa de botas nuobas. Outra a poder de berdasca. Las alforjas a dlin dlon an riba d'albarda beilában a passos zambultos. L bafo de las narizes i de la boca soltaba-se cula andadura apressada. L çcampado de l alto d'Assemada era l mais bentoso. Arrimado a la fraga de los burrachos la cousa quedaba mais amerosa (la fraga de los burrachos ye cuonta para outros rosairos). L caminar deixaba l alto i ampeçaba agarrar l baixo. L'aire de fazer la barba ampeçaba a mostrar-se mais ameroso. Cun aqueilha andadura la calor achegaba-se i tamien un pouco de cansaço. Tiempo de folgar un cachico. Arrima-se la burrica a parede, scarrancha-se an riba d'albarda i toca d'andar que l die inda solo agora ampeçaba.
Hai mimórias que nun se soltan. Nun bergan. Quedan retesadas i por mais que se querga nun amoleçan. L cantico adonde stan yé tan recondido que nien baraça a sacalas, eilhas se çpreden.
Nun habie scuola mas trabalho habie todos ls dies. Çcanso, solo ls dies santos i demingos. Dies de ir a missa. L feriado nun era santo, nun era die de ir a missa. Mas si, lhembra-se-te desse die. Die de la restauraçon, purmeiro de dezembre. Parece que para l anho yá nun bamos a tener este die de çcanso. La troika diç que ls pertueses nun son produtibos... Tenemos que trabalhar mais, ser mais eificientes. Tanta cousa se perde. Tanto que custou a ganhar. Inté l die de la andependença se perde. Bénen uns de fuora i dízen: nun sodes eificientes, nun teneis rentabilidade...teneis que tener menos feriados. I pronto. Ls gobernantes, ls mandantes...aqueilhes que nun saben l que ye andar anrriba la burra culas manos atrecidas i zás amorfanhan l pouco que se ganha i tanto trabalho deu.
Chegado a Ruolos, l nubrinheiro tenie se çprendido i l sol ampeçaba a zombar. Tiu Antonho Marcos, arrimado a sue pierna manca, tirou las alforjas d'anrriba la burra cun ls butes de bezerro que miu pai habie feito i mandou-me arrimar al lhume.
Apuis de calcer las manos i achegar ls pies a las brasas debrebe me fui tener cun eilhe. Tenie todo pronto: dieç pares cortados, las palmilhas, las biras, todo l que era perciso para fazer ls butes que muitos starían ancomendados para l Natal.
-Bah, yá todo stá pronto puodes seguir biaije.
-Nó, miu pai dixo para lhebar ls cortes de calfe para uas botas númaro trinta i cinco.
-Diç a teu pai que quando benires a traer ls que agora lhebas ls tengo purparados .
-Nó, nun salo deiqui anquanto nun lhebar ls cortes de calfe.
Mesmo ampuntado, l rapaç teima, nun arreda pés. Ls afazeres de Tiu Antonho yá lo tenian çpachado para outras lides mas l rapaç nun salie dan pie la puorta, mesmo que l friu fosse de bater dientes.
-L rapaç ye mais teimoso que ua burra. Antra, senta-te ende i bamos alhá cortar las botas de calfe castanho.
Arrimado a meia hora staba todo purparado. Mais concho que sei alhá i a mirar ls remendos de las botas que traie calçadas yá se miraba cun las botas nuobas que haberie de strenar ne l Natal. Assi seguiu campante caras a casa cun la burrica delantre sien seinhas de friu cun la calor de tener uas botas nuobas.

"La Bouba de la Tenerie" i "Tempo de "Fogo" na Scuola de Miranda

2011-12-08T20:12:00.007Z

(picar l'eimaige)

FILOSOFIE

2011-12-08T17:19:00.006Z

LHIBARDADE EIGUALDADE FRATERNIDADE
.

Três palabras i que quíeren dezir tanto, mas cumo ye defícele antender-las i muito mais pautar la nuossa bida por eilhas.
You sou acontra ls dreitos de outor, porque naide ye outor de nada, yá que todo ten algo de ls outros i l saber anda por ende, ye de todos.
Dezie Lavoisier: “Na Natureza nada se cria, nada se perde, todo se trasforma”.
Tamien quando screbimos ou dezimos algo, outelizamos palabras que son tamien de ls outros, por esso apuis de screbir ó falar, las palabras que botemos a la rue tórnan al sou duonho, que somos todos. Nun bou a poner eiqui l testo que screbiu Amadeu ne l sitio: http://lhengua.blogspot.com/ (calamitas - quelamidade), porque podeis ir alhá a lé-lo, assi cumo als comentairos. Ora cumo se tornou público, debemos analisá-lo bien.
Lido como sendo ua question de orde geral, amostra bien l que ye ser mais culto, mais rico, mais fuorte, mais alto, mais…mais. Nun ye cousa aceitable para l giral de las pessonas, porque ye ua anormalidade. Por esso Merkel i Sarcozy nun son mui queridos.
Lido cumo sendo ua question personal, tamien amostra l que serie ua pessona que se julga melhor, mais sabida i amportante que ls outros. Lhieba lhougo atrás ls serbos para l serbir, faç de ls sous eiguales, seres menores, l que nun puode ser aceitable por giente lhibre.
Testo mui amportante para un teste psicológico, mesmo para cada un de nós pensar l que quíeren dezir las trés palabras lhibardade eigualdade fraternidade. Todos somos giente, uns cun mais talentos outros cun menos. Mas todos somos mais i menos que ls outros nalgua cousa.

froles mirandesas

MUSICA TRADICIONAL MIRANDESA

Sentindo la música de l CD Çanfonices

Parabienes a la Porsora Rita Marquilhas

CULTURA MIRANDESA DE PARABIENES

ÇANFONICES

Apersentaçon de Ls Quatro Eibangeilhos ne l Alto do Moinho

Cumbíbio/Fiesta de "Nuossa Senhora de las Candeias"

L Auto de La Criaçon de l Mundo

L mirandés ne l New York Times

L Ampeço de l Mundo - ressónan sonidos para quien manda

Grupo de amigos de l Centro de Música Tradicional “Sons da Terra”

Anfáncias Trágicas

Statísticas mundiales

La merenda

Será que l aire...

Oubrigado, Sr. menistro!

Quien era Emma Bovary ?

Auto de la Criaçon de l Mundo

La Missa de l Galho

Die de Reis ou ...

Menumiento eideficado

Burro çferrado

Nun fui por falta de sfuorço!

Anho Nuobo Bida Bielha-Ano Novo Vida Velha

Juri de l Cuncurso Cuontas de Natal 2012

Ls Reis

JANE AUSTEN

Retrato 360º de la Sposiçon Arte i Artesania ne l Museu de l Abade de Baçal

Sangrar andrento

Assi se ampeça l Mundo!

Palabras de pastor

Amanhando suonhos

HOIJE

HOIJE

Ir a scuola

Cuncurso “Cuontas de Natal 2011”

Bun anho de 2012

L suonho (cuncurso)

***** Feliç Anho Nuobo *****

Buôno Anho

Páixaro d´ alas feridas II

28 de Dezembro de 1895

Suonhos

Díbedas

Que Natal? Si, que Natal?

Alma de nino

Tradiçones (dadonde mos bénen!?)

"Pertual deceu a la foia"

SENDIM

L(s) TIEMPO(s)

i mui pouco até a arroç doce cun zeinhos feitos cun canela…

LA MELHOR PRENDA DE NATAL

L rabico

La paç pula música

Las Buonas Fiestas de l Senhor Persidente

Hai paç an tues antranhas!

Un teçtonico pa l nino Jasus (2)

Será que algue mudou?

Ye pula manhana…

Sodade, sodade...

La catequese que tenemos que fazer

SENDIN

SERÁ QUE DIUS EISISTE

Cuntigo

Un cachico más felizes

Sfregantes de Ternuna

A ti

FUONTE ALDÉ

Assomou-se la primabera

L SÉTIMO CHEGOU ESTA NUITE

Era nuite i tanto die

L çtino ten hora marcada!

COPRATIBA RIBADOURO

Ua arte que surge de la natureza i de a mimória

L Nino Jasus Reberdecedor (cuonta a cuncurso)

Cuonta de Natal (Cuncurso)

L mirandés na Scuola EBI de Vale Rosal

Cada beç mais medonhos

L eissencial

* Feliç Anho Nuobo *